2 Kronekele 17 - Tshwa Bible

Jehoxafate a hlota Jehova.

¹ A nʼwana wakwe Jehoxafate i lo fuma xikhundleni xakwe, a ti akela mintamu yo cuwukana ni va ka Israeli;

² i lo veka mabutho yakwe lomu makhokholeni wontihe ya ka Juda, a rumela manwani lomu mitini ya ka Juda, ni lomu mitini ya ka Efraime leyi yi nga wa tekilwe hi raru wakwe Asa.

³ Jehova i wa hi zinwe na Jehoxafate, hakuva yena i lo lanzela tindlela to sangula ta raru wakwe Davida; cima a nga hlotangi Baali.

⁴ Kanilezi i lo hlota Nungungulu wa raru wakwe, a lanzela milayo yakwe, na ku nga hi zimaho za va ka Israeli.

⁵ Zinghaho Jehova i lo tiyisa mufumo lowu mandleni yakwe; hikwalaho vontlhe vaJuda va lo ta luva ka Jehoxafate; i wa hi ni tshomba ya hombe nguvu, ni wudzunzo ga hombe.

⁶ A mbilu yakwe yi lo tiya lomu tindleleni ta Jehova, a kala a susa matshamu ma tlakukileko ni zifananiso za Axtarte lomu tikweni ga va ka Juda.

⁷ Hi lembe ga wunharu ga kufuma kakwe, i lo ruma a tinduna takwe, Ben-Haile na Obadia na Zakaria na Nataneli na Makaia a ku ya gonzisa lomu mitini ya va ka Juda.

⁸ I lo ruma kambe ni va ka Levi, Xemaia, Netania, Zebadia, Asaheli, Xemiramote, Jehonatani, Adonija, Tabija, na Tabadonija, a va ka Levi zinwe ni vapristi. Elixama na Jehoramu, va famba zinwe navo.

⁹ Va lo gonzisa lomu tikweni ga ka Juda na va hi ni bhuku ga nayo wa Jehova. Va lo fambafamba mitini yontlhe ya ka Juda va gonzisa vanhu.

¹⁰ Matiko wontihe ma wa tele hi xichawo xo chava Jehova, a matiko lawa ma ranzelekeleko va ka Juda; wona a ma hlomangi yimpi va vukela Jehoxafate.

¹¹ Ku wa hi ni manwani maFilistia ma nga wa luva ka Jehoxafate; hambu ni maArabia ma lo mu nehela mitlhambi ya 7,700 wa tihamba ni 7,700 wa timhongo.

¹² Jehoxafate i lo simama ku enzeleka; i lo aka a tiyindlu ta wukosi, ni miti ya titshomba lomu tikweni ga va ka Juda.

¹³ I wa hi ni mitiro yo tala lomu mitini ya va ka Juda; le Jerusalema i wa hi ni mabutho, a tinhenha ta yimpi.

¹⁴ A tsengo wabye, hi tiyindlu tabye, hi lowu: lomu ka va ka Juda, a tinduna ta khume ga mazana hi Adna a nga wa hi nduna ya hombe, i wa hi ni 300,000 wa tinhenha;

¹⁵ ku gamela Jehohanani, a nga wa hi ni 280,000 wa vavanuna;

¹⁶ ku lanzela Amasia nʼwana Zikri, loyi a nga wa ti nyikele ka Jehova; i wa hi ni 200,000 wa tinhenha.

¹⁷ Lomu ka va ka Benjamini hi Eliada, a nhenha ya ntamu; i wa hi ni 200,000 wa vavanuna, a vakhomi va mawura ni zitlhangu;

¹⁸ ku gamela Jehozabada, a nga wa hi ni 180,000 wa vavanuna va hlomileko.

¹⁹ Hi lavo va nga wa hi valaveleli va hosi, ahandle ka lava va yimisilweko hi hosi lomu mitini ya makhokhola lomu tikweni ga ka Juda.