2 Kronekele 15 - Tshwa Bible

¹ A Moya wa Nungungulu wu lota hehla ka Azaria nʼwana Odedi;

² i lo ya khinga Asa a yaku kakwe: Wena Asa, na nwina nwentlhe vaJuda, ni va ka Benjamini, nzi ingiseni! Jehova i zinwe na nwina, loku nwinawu mu hi naye; loku mu mu hlota mu ta mu kuma; kanilezi loku mu mu tsika, yenawu i ta mu tsika. Deut. 4:29; Jer. 29:13

³ Xikhati xo leha a va ka Israeli na va nga hi na Nungungulu wa zinene, ni mupristi wa ku va gonzisa, ni kambe va wa hi handle ka nayo.

⁴ Kanilezi a xikhati va nga wa hi zikaratweni, va lo tlhelela ka Jehova Nungungulu wa ka Israeli, va mu hlota va mu kuma.

⁵ Zikhatini lezo ku wa nga hi na kurula ka vafambi, ge hambu ni ka lava va nga wa hi makaya, hakuva a zixaniso zi wa tele xikari ka vontlhe vanhu va matiko. Vala. 5:6

⁶ A tiko ginwe gi wa vukela ginwani tiko, a muti munwe wu vukela wunwanyani muti, hakuva Nungungulu i lo va hlokisa hi zixaniso zo tala.

⁷ Makunu nwina, ngha muva ni ntamu, mu nga tsiki a mandla ya nwina mava ni gome, hakuva mu tava ni nchachazelo ntirweni wa nwina.

⁸ Laha Asa a ngazwa a timhaka leti ti nga hlawutelwa hi muprofeti Odedi, i lo tiya hlana, a susa wontihe manyalataniso ya tiko gontlhe ga ka Juda ni ga ka Benjamini, ni lomu mitini leyi a nga wa yi tekile le xitsungeni xa ka Efraime; i lo sasisa a alati ga Jehova legi gi nga hi mahlweni ka nyangwa ya ka Jehova.

⁹ Zonake i lo tsombanyisa vontlhe va ka Juda, ni va ka Benjamini, ni va ka Efraime, ni va ka Manasa, ni va ka Simeoni, lava va nga wa akile xikari kabye; hambu vona va ka Israeli va lota ka yena na va tele nguvu, hakuva va lo wona lezaku Jehova Nungungulu wakwe i zinwe naye.

¹⁰ Va lo tsombana le Jerusalema hi hweti ya wunharu ya lembe ga wu 15 ga kufuma ka Asa.

¹¹ Gwalego siku va lo nyikela miphahlelo ka Jehova ya zifuyo lezi zi nga wa nehilwe, 700 wa tihomu ni 7,000 wa tiyivu.

¹² Va lo funga ku hlota Jehova Nungungulu wa vararu vabye hi timbilu tabye tontlhe, ni mihefemulo yabye yontlhe;

¹³ ni lezaku ni wihi loyi a nga ranziko ku hlota Jehova Nungungulu wa ka Israeli i wa fanelwe ku dawa, a tsongwani ni wahombe, a wanuna kutani wasati.

¹⁴ Va lo ti boha ka Jehova hi kuhlambanya hi gezu ga hombe ni guwa ga kutsaka, ni kuvuma ka mipunzu ni zikoriyo.

¹⁵ Vontlhe vaJuda va lo tsaka hi xifungo xabye, hakuva va lo hlambanya hi timbilu tabye tontlhe, va hlota Jehova hi kuxuva kabye, va mu kuma. Jehova i lo va nyika kuhumula ka wontihe matlhelo yabye.

¹⁶ Hambu nyine wakwe Maaka, i lo mu humesa wuzinzeni gakwe, hikuva a mahile a xifananiso xa Axtarte. Asa i lo khungumula a xifananiso xakwe a xi hisa le xicongwaneni xa Kidroni.

¹⁷ Kanilezi a matshamu ma tlakukileko a ma susiwangi lomu tikweni ga ka Israeli, hambu lezi a mbilu ya Asa yi wa longamile ka wontihe masiku yakwe.

¹⁸ I lo neha lomu ndlwini ya Nungungulu a zilo lezi a raru wakwe a nga wa zi nyikelisisile: a siliva ni nzalama ni zibya.

¹⁹ Cima a ku na ngava ni yimpi a ka malembe lawa ya 35 ya kufuma ka Asa.