2 Kronekele 14 - Tshwa Bible

Asa a fumela va ka Juda.

¹ Abija i lo etlela zinwe ni Vararu vakwe, va mu lahla lomu mutini wa Davida. Zonake a nʼwana wakwe Asa i lo fuma xikhundleni xakwe. Xikhatini xakwe a tiko gi wa rulile 10 wa malembe.

² Asa i lo maha kusaseka ni kululama mahlweni ka Jehova Nungungulu wakwe.

³ Hakuva i lo susa a maalati ya vamatiko, ni matshamu ma tlakukileko, a khungumulela a zifananiso, a tshoveletela a zifananiso za Axtarte.

⁴ Zonake i lo laya va ka Juda a ku hlota Jehova Nungungulu wa vararu vabye, ni ku hlayisa milayo ni zileletelo zakwe.

⁵ I lo suselela matshamu ma tlakukileko ni zifananiso za gambo ka yontlhe miti ya ka Juda. A tiko gi lo rula xikhatini xakwe.

⁶ I lo aka a miti ya makhokhola lomu tikweni ga ka Juda, hakuva a tiko gi wa rulile; ku wa nga hi na yimpi lomu tikweni ka lawo malembe, hakuva Jehova i wa mu nyikile kuhumula.

⁷ I te ngalo ka va ka Juda: A hi akeni a miti leyi, hi yi bhiya hi tigingisi, yiva ni makhokhola, ni tivati ta zikwinyaro, na tiko ga ha hi mahlweni ka hina, hakuva hina hi hlotile Jehova Nungungulu wa hina. Hi mu hlotile, zonake yena i hi nyikile kuhumula ka wontihe matlhelo. Va lo aka va vuvuma.

⁸ Asa i wa hi ni yimpi ya 300,000 wa vavanuna va ka Juda, lava va zi kotako ku khoma zitlhangu ni matlhari, ni 280,000 wa vavanuna va ka Benjamini lava va zi kotako ku khoma zitlhangu ni mawura, vontlhe na va hi tinhenha.

⁹ Kanilezi Zera a muEtiopia i lo hlomisa a yimpi ya 1,000,000 wa vavanuna, ni 300 wa tikareta, a ku talwa na vona; i lota Marexa.

¹⁰ Zonake Asa i lo hlomisa a yimpi a mu khinga, va ya tlhangana lomu mikoveni ya Zefata kusuhani ni le Marexa.

¹¹ Asa i lo khongela ka Jehova Nungungulu wakwe, aku: Jehova, ahandle ka wena, cima a nga kona munwani a zi kotako ku vunetela lava va nga hiko na ntamu, loku va vukelwa hi lava va nga ni ntamu. Hi vune wena Jehova Nungungulu wa hina, hakuva hina hi tsumba ka wena; hi hlomile yimpi leyi vitweni ga wena a ku talwa ni xidlemo lexi. Wena u Jehova Nungungulu wa hina; ngha a nga hi kona munhu a hlulako wena! Vala. 7:2, 7; 1 Sam. 14:6

¹² Zonake Jehova i lo hlasela a vaEtiopia mahlweni ka Asa ni mahlweni ka vaJuda, a vaEtiopia, va lo panzanyeka.

¹³ Asa ni vanhu lava a nga wa hi navo va lo va hlongolisa kala le Gerare, va hihiritwa a vaEtiopia laha kaku ku nga poni ni munwe, hakuva va lo hlaselwa mahlweni ka Jehova ni mahlweni ka yimpi yakwe. Zonake a vaJuda va lo kuma a muphango wa hombe nguvu.

¹⁴ Va lo hlasela a miti yontlhe leyi yi nga wa hi kusuhani ni Gerare, hakuva va wa tatisilwe hi wutoya ga ku chava Jehova; va lo phanga yontlhe miti hakuva yi wa hi ni tshomba yo tala nguvu.

¹⁵ Va lo phanga ni maranga ya mitlhambi, zonake va lo famba ni tiyivu ni makameli va tlhela va famba Jerusalema.