2 Kronekele 11 - Tshwa Bible

A mitiro ya Rehoboamu.

¹ Laha Rehoboamu a ngachikela le Jerusalema, i lo tsombanyisa a yindlu ya ka Juda ni ya ka Benjamini, 180,000 wa milangelwa ya tinhenha, a tinghwazi ta kulwa, kasi ku yalwa ni va ka Israeli va fela ku tlhelisa mufumo ka Rehoboamu.

² Kanilezi ku lota a gezu ga Jehova ka Xemaia a munhu wa Nungungulu, gi taku:

³ Byela Rehoboamu nʼwana Solomoni, a hosi ya ka Juda, ni vontlhe va ka Israeli lava va nga lomu tikweni ga ka Juda ni ga ka Benjamini, uku:

⁴ Jehova i ngalo: Mu nga kanzihi mu ya vukela vanakuloni. Tlhelani, munhu ni munhu aya kaya kakwe, hakuva mhaka leyi yi humile ka mina. Zinghaho vona va lo ingisa a gezu ga Jehova, va tsika ku yalwa na Jeroboamu, va tlhelela makaya kabye.

⁵ Rehoboamu i lo tshama Jerusalema, a aka miti ya makhokhola lomu tikweni ga ka Juda.

⁶ I lo aka a muti wa Betlehema, ni wa Etama, ni wa Tekoa,

⁷ ni wa Bet-Zura, ni wa Soko, ni wa Adullama,

⁸ ni wa Gati, ni wa Marexa, ni wa Zife,

⁹ ni wa Adoraime, ni wa Lakixe, ni wa Azeka,

¹⁰ ni wa Zora, ni wa Aijaloni, ni wa Hebroni, A miti leyi yi wa hi tikweni ga ka Juda ni ga ka Benjamini, a miti ya makhokhola.

¹¹ I lo tiyisa a miti leyo, a veka ka yona a tinduna, zonake a veketela zakuga, ni mafura, ni vinya lomo.

¹² Mitini yontlhe leyo i lo veka zitlhangu, ni matlhari, a yi tiyisa nguvu miti leyo. Kanilezi va ka Juda ni va ka Benjamini va wa lumba yena.

¹³ A vapristi vontlhe ni va ka Levi lava va nga wa hi lomu tikweni gontlhe ga ka Israeli, va lo rurela lomu mitini yabye va ya tshama ka yena,

¹⁴ hakuva a va ka Levi va lo tsika matikwana yabye ni titshomba tabye, va ta aka lomu tikweni ga ka Juda ni le Jerusalema, hakuva Jeroboamu ni vana vakwe va wa va humesile mitirweni yabye ya wupristi ga ka Jehova.

¹⁵ I lo ti yimisela a vapristi va matshamu ma tlakukileko, ni va madimoni, ni va marole lawa yena a ma mahileko. Levi 17:7

¹⁶ A va ka Levi va lo lanzelwa hi vanhu vanyingi va tontlhe tixaka ta ka Israeli, lava va nga wa ranza ku hlota Jehova Nungungulu wa ka Israeli. Va lota Jerusalema a ku ta phahlela ka Jehova Nungungulu wa vadadani vabye.

¹⁷ Zinghaho va lo tiyisa a mufumo wa ka Juda, va nyika ntamu ka Rehoboamu nʼwana Solomoni malembe manharu, hakuva va lo mbheta malembe manharu na va lanzela ndlela ya Davida ni ya Solomoni.

¹⁸ Rehoboamu i lo teka Mahalate nʼwana Jerimote wa Davida, na Abihaili nʼwana wa sati wa Eliabe nʼwana Jese, a maha sati wakwe. 1 Sam. 16:6; 17:13

¹⁹ I lo mu belekela Jeuxi, na Xemaria, na Zahama,

²⁰ Anzhako ka yena i lo teka Maaka nʼwana Absalome; yena i lo mu belekela Abija, na Attai, na Ziza, na Xelomite.

²¹ Rehoboamu i lo ranza nguvu Maaka nʼwana Absalome ku hunza vontlhe vasati vakwe ni mindlukulu yakwe, hakuva i wa hi ni 18 wa vasati ni 60 wa mindlukulu. I lo beleka 28 Wa majaha ni 60 wa vanhwana.

²² Rehoboamu i lo yimisa Abija nʼwana Maaka a kuva hosi xikari ka vanakulobye, hakuva yena i lo xuva ku mu maha hosi.

²³ I lo maha hi mano, hakuva i lo akisela vana vakwe ka wontihe matlhelo ya ka Juda ni ya ka Benjamini, ni ka miti yontlhe ya makhokhola, a va nyika zakuga zo tala nguvu, a va lowota vasati vo tala.