2 Kronekele 1 - Tshwa Bible

¹ Solomoni nʼwana Davida i lo tiyisa mufumo wakwe, Jehova Nungungulu wakwe na hi zinwe naye a mu kulisa nguvu.

² Solomoni i lo wulawula ni vontlhe va ka Israeli, zinwe ni tinduna ta 1,000, ni ta 100, ni Valamuli, ni tihosana ta tiyindlu ta vararu vabye.

³ Zinghaho Solomoni ni wontihe tlhangano va loya xitsungeni lexi xi nga wa hi le Gibeoni, hakuva a tenda ga mutlhangano wa Nungungulu legi Mosi a nanza ga Jehova a nga wa gi mahile le xiwuleni, gi wa ha hi kwaleyo. Ekso. 27:21; 36:8; 1 Tih. 3:4

⁴ Kanilezi Davida i wa tekile a arke ga Nungungulu le Kiriat-Jearimu, a gi neha wutshanwini legi a nga wa gi longisele, hakuva i wa gwimbile a tenda ga kona le Jerusalema.

⁵ Tlhatakumbiri, a alati ga suku, legi gi nga wa mahilwe hi Bezaleli nʼwana Uri wa Hura, gi wa hi kona mahlweni ka yindlu ya Jehova. Hi laho Solomoni ni wontihe tlhangano va nga wa hlotela kona Jehova.

⁶ Solomoni i lo mahela laho munyikelo wakwe mahlweni ka Jehova, a muphahlo wa kuhiswa wa 1,000 laha alatini ga suku legi gi nga wa hi mahlweni ka tenda ga mutlhangano.

⁷ Ka gona wusiku lego, Nungungulu i lo woneka ka Solomoni, aku kakwe: Kombela lexi u lavako lezaku nzi ku nyika!

⁸ Solomoni i te ngalo ka Nungungulu: U kombisile a wunene ga hombe ka dadani Davida, zonake u nzi yimisile a kuva hosi xikhundleni xakwe.

⁹ Makunu, Jehova Nungungulu, a xitsumbiso xa wena ka dadani wa mina Davida a xi tatiseke, hakuva u nzi yimisile a kuva hosi ya vanhu va teleko ku kotisa a tshuri wa misava. Gen. 13:16

¹⁰ Makunu nzi nyike a wutlhari ni kupima, kasi nza fela ku tiva ku maha murangeli wa lava vanhu; hakuva hi mani a nga zi kotako ku lamula a vanhu va wena va ku tatisa lezi ke?

¹¹ Nungungulu i te ngalo ka Solomoni: Lezi u nga ni maalakanyo lawa mbilwini ya wena, a ku kombelangi a pfuno ni tshomba, ni wudumo, ni lufo la valala va wena, ge hambu a ku kombela masiku yo hlaya; kanilezi u kombele wutlhari ni kupima, kasi ku lamula a vanhu va mina lava nzi ku yimisileko a kuva hosi hehla kabye.

¹² Wena u nyikilwe a wutlhari ni kupima; ni kambe nzi ta ku nyika a pfuno, ni tshomba, ni wudumo, lezi a tihosi leti ti nga wa hi kona mahlweni ka wena ti nga kala ti nga wa hi nazo, ni lava va ta ngava kona anzhako ka wena cima va nga ta kuva nazo.

¹³ Zinghaho Solomoni i lo suka mahlweni ka Tabemakeli ga mutlhangano legi gi nga wa hi le xitsungeni xa le Gibeoni, a wuya le Jerusalema, a ta fuma hehla ka va ka Israeli.

¹⁴ Solomoni i lo tsombanyisa a tikareta zinwe ni vakhileli va mahaxi; a tikareta ti wa hi 1,400, a vakhileli va mahaxi va wa hi 12,000 wabye. I lo va veka lomu mitini ya tikareta, ni laha hosini le Jerusalema.

¹⁵ A hosi yi lo maha lezaku le Jerusalema kuva kona a siliva ni nzalama kotisa ku khwatsi maribye, ni tisinya ta sedare ti tala khwatsi mikuwu yi milako lomu tinyakeni.

¹⁶ A mahaxi lawa Solomoni a nga wa hi nawo ma wata hi le Gipite, ma nehiwa hi mitlhambi; ni vamahungani va hosi va lo ya lava mitlhambi hi tsengo wo kari wa mali.

¹⁷ A kareta yinwe ni yinwani va nga yi xava le Gipite yi wa vitana 600 wa maxekeli; a haxi, ginwe gi wa hi 150 wa maxekeli. Va lo zi neha ni ka tihosi tontlhe ta vaHiti, ni tihosi ta vaSiria.