1 Tihosi 7 - Tshwa Bible

A tiyindlu ta hosi.

¹ Solomoni i lo aka a yindlu yakwe; i lo mbheta a yindlu yakwe yontlhe hi 13 wa malembe.

² I lo aka a yindlu ya Khwati-ga-Lebanoni; a kuleha ka yona ku wa hi 100 wa mikono, a kuanama ka yona ku wa hi 50 wa mikono, a kutlakuka ka yona ku wa hi 30 wa mikono. Yi wa akilwe hehla ka mune wa tixaxa ta timhanze ta tisedare, ni mapulango ya sedare ma wa hi hehla ka timhanze.

³ Yi wa fulelwe hi tisinya ta sedare hi le hehla ka tikwarutu leti ti akilweko le hehla ka 45 wa timhanze; a ka lixaxa linwe ni linwani ku wa hi ni 15 wa timhanze.

⁴ Ku wa hi ni tixaxa tinharu ta tinjhanela ti cuwukeneko.

⁵ A tinyangwa tontlhe ni marimba ya tona ti wa hi mune wa matihelo lomu ka zitezi lezi zinharu za tikwarutu a tinjhanela ti wa cuwukana.

⁶ I lo maha ligumbagumba la timhanze; a kuleha ka tona ku wa hi 50 wa mikono ni kuanama ka tona ku wa hi 30 wa mikono; a ligumbagumba linwani li wa hi le mahlweni ka leli lo ranga; na li hi ni timhanze ni mayingo le mahlweni ka lona.

⁷ I lo maha ni hubye ya xitshamu xa wukosi laha a lamulako kona a timhaka; yi wa akilwe hi sedare kusukela lahasi kala le hehla.

⁸ A yindlu yakwe, laha a nga wa tshama kona, yi wa akisilwe zalezo lomu ka xipetso xinwani hi lomu nzeni ka ligumbagumba. I lo akela nwaFaro loyi a nga mu tekile a kuva sati wakwe, a yindlu yi fananako ni ligumbagumba leli.

⁹ Tontlhe leto tiyindlu ti wa akilwe hi maribye yo saseka nguvu, ma vatlilweko hi lipimo; na ma sahilwe lomu matlhelweni, nzeni ni lahandle kusukela xiseketelweni kala le hehla; ni kusukela handle kala le xipetsweni lexi xa hombe.

¹⁰ A xiseketelo xi wa akilwe hi maribye ya hombe yo saseka, ma nga wa hi 10 wa mikono a kuleha, ni manwani ma wa hi 8 wa mikono.

¹¹ Hi le hehla ka wona ku wa hi ni maribye yo saseka ma vatlilweko hi ku ringaniswa, ni tisinya ta sedare.

¹² Ni xipetso lexi xa hombe xi wa akilwe hi tixaxa tinharu ta maribye ma vatlilweko ni lixaxa linwe la timhanze ta sedare; zo fana ni xipetso xa laha xikari ka yindlu ya Jehova, ni lomu ka ligumbagumba la yindlu.

A Timhanze ta Suku ta Tempeli.

¹³ Zonake Solomoni i lo vitanisa Hiramu hi le Tire.

¹⁴ I wa hi nʼwana wa noni ya lixaka la ka Naftali, kanilezi a raru wakwe i wa hi munhu wa le Tire, a mufuli wa suku. Hiramu i wa tlharihile nguvu, i wa hi ni kupima, ni wutivi ga tontlhe tixaka ta mitiro ya suku. Yena i lota ka Solomoni a ta tira mitiro yontlhe yakwe. Ekso. 31:3

¹⁵ I lo maha timhanze leti timbiri ta suku. A kutlakuka ka mhanze yinwe ku wa hi 18 wa mikono. A ngoti ya 12 wa mikono yi wa zi kota ku tsonzela yinwe ni yinwani.

¹⁶ Yena i lo nyekisa tihloko timbiri ta suku a ti veka hehla ka timhanze. A kutlakuka ka hloko yinwe ni yinwani ku wa hi ntlhanu wa mikono.

¹⁷ Hehla ka tihloko ta timhanze leto, kada yinwe yi wa hi ni ntlhanu ni mimbiri mihluto yi komelweko hi zo fanana ni tiketani.

¹⁸ Yena i lo maha a tixaxa timbiri ta mapomegranada ti renzelekela a hluto, ti fenengeta a tihloko leti ti nga le hehla ka timhanze; i lo maha zalezo ni ka yinwani hloko.

¹⁹ A tihloko leti ti nga le hehla ka timhanze lomu ligumbagumbeni, ti mahilweko ku fanana ni makhonwa, ti wa hi ta mune wa mikono.

²⁰ A tihloko leti ti nga le hehla ka timhanze leti ta timbiri ti wa pomelwe hi 200 wa mapomegranada, hi le hehla ka hluto, a manwani 200 wa mapomegranada ma pomela a tixaxa hi le ka hloko yinwe ni yinwani.

²¹ Zonake i lo yimisa timhanze leti timbiri laha nyangweni ya yindlu. A mhanze leyi a nga yi yimisa tlhelo ga xinene i lo yi chula vito ga Jakina, ni leyi ya tlhelo ga xibhabha i lo yi chula vito ga Boazi.

²² Le hehla ka timhanze ku wa hi ni zifananiso za makhonwa. Zinghaho va lo mbheta a ntiro wa timhanze.

²³ Zonake yena i lo maha a bimbi hi suku wu nyekisilweko, gi renzelekela matlhelo wontihe; kusukela tlhelo ginwe kuya ka ginwani ku wa hi 10 wa mikono, ni kuleha ka gona ku wa hi 5 wa mikono. A ngoti ya 30 wa mikono yi wa ringana ku renzelekela kontlhe. 2 Kro. 4:2; Jer. 52:20

²⁴ Gi wa ranzelwe hi zivuvu lahasi ka nomu wa gona matlhelo wontihe, 10 wa zona ka kono munwe, zi renzelekela khati ginwe; ku wa hi ni tixaxa timbiri ta zivuvu ti mehelweko laha ka gona.

²⁵ Gi wa vekilwe hehla ka 12 wa tihomu; a tihomu tinharu ti wa cuwuka le Nwalungu, a tinharu ti cuwuka Mupela-gambo, a tinharu ti cuwuka Dzongeni, a tinharu ti cuwuka Mutsuwuka-gambo. A bimbi gi wa hi hehla ka tona, ni minkila yontlhe yi wa hi lomu xikari.

²⁶ A kudziva ka gona ku wa hi canja ginwe; a nomu wa gona wu wa fanana ni nomu wa gombe go fanana ni khonwa. Gi wa zi kota kuya 2,000 wa tikarafawu.

²⁷ Zonake i lo maha a 10 wa zikhatelo za suku; a kuleha ka xinwe ni xinwani ku wa hi mune wa mikono ni kuanama ku wa hi mune wa mikono; a kutlakuka ku wa hi mikono minharu.

²⁸ A zikhatelo zi lo mahiwa kota lezi: zi wa hi ni matlhelo yo lulama ma nga ni zikhuleketo magumo ka zona.

²⁹ Lomu matlhelweni ku wa hi ni zifananiso za tinghala, ni tihomu, ni makerubima; le hehla ka zikhuleketo ku wa hi zalezo; lahasi ka tinghala ni tihomu ku wa hi ni zitsangi lezi zi nga wa lengalenga.

³⁰ A xikhatelo xinwe ni xinwani xi wa hi ni masonzo ya suku, ni dunzu ga suku; le chokeni ya kona ku wa hi timhonzo. Ni timhonzo ti wa chululwe lahasi ka xinamelo na ti hi ni zitsangi laha matlhelweni.

³¹ A nomu wa kona wu wa hi lomu nzeni ka xikhatelo hi le hehla ka kona, na wona wu wa hi kono munwe, ni nomu wa xikhatelo wu wa hi kono munwe ni khihlanya; lomu nonwini wa kona ku wa kehlelwe; lomu matlhelweni ya zikhatelo ku wa hi ni mune wa zikhuzu, zi wa nga hi xirenzelekwani.

³² A masonzo ya kona ya mune ma wa hi lahasi ka matlhelo, ni mawoko ya masonzo ma wa tiyisilwe lomu zikhatelweni; a kutlakuka ka sonzo ginwe ni ginwani ku wa hi kono munwe ni khihlanya.

³³ A masonzo ya kona ma wa fanana ni ya tikareta; a dunzu ga kona, ni mafelosi ya kona, ni ziruti za kona, ni wugungo ga kona, zontlhe zi wa hi za suku.

³⁴ Ku wa hi ni mune wa timhonzo lomu makhuzwini ya kona ya xikhato xinwe ni xinwani; a timhonzo ta xikhato ti wa humela kwalomo.

³⁵ Le hehla ka xikhato ku wa hi ni xirenzelekwani xa khihlanya ga kono a kutlakuka ka kona; le hehla ka xikhatelo xa kona ni matlhelo ya kona ma wa humela kwalomo.

³⁶ A matshanwini ya mawoko ya kona i lo maha makerubima, ni tinghala, ni micinzu hi lipimo la zona, ni zitsangi lezi zi xaxametilweko matlhelo wontihe.

³⁷ I lo mahisa zalezo a zikhatelo lezo za khume; zontlhe zi wa chululwe hi lipimo linwe ni xiwumbeko xinwe.

³⁸ Zonake i lo maha 10 wa zinamelo za suku; a xinamelo xinwe ni xinwani xi wa enela a 40 wa tikarafawu; a xinamelo xinwe ni xinwani xi wa hi ni mune wa mikono; a xinamelo xinwe ni xinwani xi wa hi ni xikhatelo xinwe.

³⁹ Zonake i lo vekela a ntlhanu wa zikhatelo tlhelweni ga xinene ga yindlu ni ntlhanu wa zikhatelo tlhelweni ga xibhabha ga yindlu. A bimbi gona a gi vekela tlhelweni ga xinene ga yindlu hi le Mutsuwuka-gambo ku cuwukana ni le Dzongeni.

⁴⁰ Hiramu i lo maha zinamelo ni mafoxolo, ni mingelo, a mbheta wontihe ntiro lowu wu mahilweko hi hosi Solomoni lomu ndlwini ya Jehova;

⁴¹ ni timhanze timbiri ni tihloko timbiri ta zirenzelekwani leti ti nga le hehla ka timhanze; ni mitiro mimbiri leyi yi lukilweko kasi ku fenengeta tihloko timbiri ta zirenzelekwani lezi zi nga le hehla ka timhanze;

⁴² Ni 400 wa mapomegranada ma lukilweko, tixaxa timbiri ta mapomegranada a ka yinwe ni yinwani, kasi ku fenengeta tihloko timbiri ta zirenzelekwani lezi zi nga hehla ka timhanze;

⁴³ ni 10 wa zikhatelo, ni 10 wa zinamelo lezi zi nga lomu zikhatelweni;

⁴⁴ ni bimbi ginwe, ni 12 wa tihomu hi lahasi ka bimbi;

⁴⁵ ni timbita ni mafoxolo, ni mingelo, ni zontlhe zibya lezi Hiramu a zi maheleko hosi Solomoni lomu ndlwini ya Jehova zi wa hi za suku wu kutlilweko.

⁴⁶ A hosi yi lo zi tlomba le libaleni la Jordani ni nzhope ya misava le xikari ka Sukote ni Zaretane.

⁴⁷ Solomoni i lo siya zontlhe zibya na zi nga pimiwangi kutika ka suku, hakuva zi wa tele nguvu; a ku pimiwangi a kutika ka suku.

⁴⁸ Solomoni i lo maha zontlhe zibya lezi zi nga hi lomu ndlwini ya Jehova, ni alati ga nzalama, ni meza ya nzalama laha ku nga wa vekiwa kona a zibaba za zikombiso;

⁴⁹ ni ntlhanu wa timeza ta tikandiya ta nzalama hi tlhelo ga xinene, ni tinwani ta ntlhanu hi le xibhabheni, hi mahlweni ga kubasabasa ga lomu xikari; ni zitsangi ni tikandiya, ni mahati zi wa hi za nzalama;

⁵⁰ a mingelo ni mikwana, ni zinamelo, ni zimbitana za libani zi wa hi za nzalama yo saseka; ni mijekere ya nzalama ya tivati ta wutshamu go basabasa ni ta yindlu yi nga tempeli.

⁵¹ Hilezoke wu lo mbhela a ntiro wontihe lowu hosi Solomoni a nga wu mahele a yindlu ya Jehova. Zonake Solomoni i lo neha a siliva ni nzalama ni zibya zi basisilweko hi raru wakwe, a ku zi veka lomu ka mabako ya yindlu ya Jehova.