1 Tihosi 3 - Tshwa Bible

Solomoni a kombela wutlhari.

¹ Solomoni i lo maha wuxaka na Faro a hosi ya le Gipite, hi ku teka a nhanyana wakwe a maha sati wakwe, a mu neha mutini wa Davida, kala a mbheta a ku aka a yindlu yakwe ni yindlu ya Jehova, ni ligingisi leli li renzetekelako Jerusalema.

² Kanilezi a vanhu va wa phahlela le xitsungeni, hakuva kala ka lawo masiku a vito ga Jehova gi wa nga se ku aketwa yindlu.

³ Solomoni i wa ranza Jehova, a famba hi zileletelo za raru wakwe Davida; ntsena lezaku i wa phahlela ni ku hisa libani te zitsungeni.

⁴ A hosi yi loya te Gibeoni a ku ya phahlela kona, hakuva xi wa hi xitsunga xo leha nguvu. Solomoni i lo nyikela a 1,000 wa miphahlelo ya kuhiswa alatini lego.

⁵ Jehova i lo woneka ka Solomoni le Gibeoni ni wusiku hi ku lora; Nungungulu i te ngalo kakwe: Kombela lexi u xi lavako a kuva nzi ku nyika xona.

⁶ Solomoni i lo hlamula, aku: U kombisile tipswalo ta hombe ka nanza ga wena Davida, a dadani wa mina, hi lezi a fambileko hi zinene mahlweni ka wena, ni kululama, ni nongameto ya mbilu; u mu hlayisele a tipswalo leti ta hombe, zonake u mu nyikile u nwanana loyi a tshamileko xitshanwini xa yena xa wuhosi kota lezi zi nga zona nyamutlha.

⁷ Makunu Jehova Nungungulu wa mina, Wena u fumisile a nanza ga wena xikhundleni xa dadani wa mina Davida; na nzi hi nwanana tsongwani, a nzi zi tivi ku rangela vanhu.

⁸ A nanza ga wena gi lomu xikari ka vanhu va wena, lava u va hlawulileko, a vanhu va teleko, va tsanza-vahlayi hi kota ya ku tala kabye. Gen. 13:16; 1 Tih. 1:20

⁹ Hikwalaho nyika a nanza ga wena a mbilu ya ku tivisisa ku lamula vanhu va wena, kasi nza fela ku tiva ku hambanyisa kusasa ni kubiha. Hakuva himani a nga zi kotako ku lamula a vanhu va wena vo tatisa lezi?

¹⁰ A gezu lego gi lo xalalisa Hosi, hi lezi Solomoni a kombeleko zona.

¹¹ Nungungulu i te ngalo kakwe: Lezi wena u kombeleko, na u nga kombeli wutomi go leha, hambu ku kombela a kuva ni pfuno, ge hambu ku kombelela a valala va wena lezaku vafa, kanilezi wena u lo ti kombelela a ku pimisisa a ku tsema timhaka,

¹² languta, nzi ta maha khwatsi hi lezi u wulileko; nzi ta ku nyika a mbilu ya kutlhariha yi nga ni kupima, laha ka kuva cima ku wa nga seva kona a munhu wo kota wena, hambu ni lenzhako ka wena ku nga tava kona a munhu wo kota wena.

¹³ Tlhatakumbiri, mina nzi ta ku nyika lezi u nga zi kombelangiko, wu nga pfuno, ni wudumo, lezaku cima ku nga tava kona wo kota wena xikari ka tihosi ka wontihe masiku ya wutomi ga wena. Mat. 6:33

¹⁴ Loku wena u famba hi tindlela ta mina, u hlayisa zileletelo za mina ni milayo ya mina, khwatsi hi raru wa wena Davida, zonake nzi ku lehisela masiku ya wena.

¹⁵ Solomoni i lo khindlimuka hi lomu wurongweni a wona lezaku ku wa hi noro. Loku a tlhelele Jerusalema i lo yima mahlweni ka arke ga xivumelwano xa Jehova, a humesa miphahlo ya kuhiswa ni ya kurula, zonake i lo maha mubuzo wa malanza yakwe wontihe.

¹⁶ Zonake ku lota ka hosi a vavasati vambiri va zibhayi, va ta yima mahlweni kakwe.

¹⁷ A munwe wa vona i te ngalo kakwe: Hosi yanga, mina ni loyi wasati hi tshama yindlu yinwe. Nzi lo pswala nwanana na nzi hi naye lomu ndlwini.

¹⁸ Zonake hi siku ga wunharu anzhako kakuva mina nzi hefemule, yenawu i lo hefemula. Hi wa hi zinwe; lomo ndlwini ku wa nga hi na munwani munhu, ku wa hi hina va vambiri basi.

¹⁹ Zonake a nwanana wa loyi wasati i lofa ni wusiku, hi kota ya ku mu etlelela.

²⁰ Makunu loyi wasati i lo vuka xikari ka wusiku, a teka a nwanana wa mina laha reveni ga mina, a nanza ga wena na gi etlele, a ya mu lata xifuveni xakwe, zonake a teka a nwanana wakwe loyi a fileko, a ta mu lata laha xifuveni xa mina.

²¹ Makunu na nzi vukile ni mixo a kuva nzi anwisa a nʼwana wa mina, nzi lo wona lezaku i file. Nzi lo mu cuwukisisa ni mixo, nzi wena lezaku i wa nga hi nwanana wa mina loyi nzi mu psweleko.

²² Loyi munwani wasati i te ngalo: A hi zona! Loyi a hanyako i nʼwana wa mina; a wa wena hi loyi a fileko! Loyi munwani aku: Ahihi, a nʼwana wa wena hi loyi a fileko, a wa mina hi loyi a hanyako! Zinghaho va lo kanetisana mahlweni ka hosi.

²³ Zonake a hosi yi lo hlamula, yiku: A munwe i ngalo: A nʼwana wa mina hi loyi a hanyako, a wa wena hi loyi a fileko. A munwani aku: Ahihi, loyi a fileko ngwa wena, loyi a hanyako ngwa mina!

²⁴ A hosi yi te ngalo: Nzi neheleni a supado. Zonake va lo neha a supado mahlweni ka hosi.

²⁵ A hosi yiku: Panzani a nwanana loyi a hanyako hi laha xikari, mu nyika khihlanya ka munwe, a ginwani khihlanya mu nyika munwani.

²⁶ Zonake a nwinyi wa nwanana loyi a hanyako i lo dzuka lomu mbilwini yakwe, aku ka hosi: Hosi yanga: Mu nyike a nwanana loyi a hanyako, va nga kali va mu daya! Kanilezi loyi munwani i te ngalo: Cima a nga ta kuva wa mina, hambu kuva wa wena, a panziwe hi laha xikari! Isa. 49:15

²⁷ Zonake a hosi yi lo hlamula, yiku: Nyikelani a nwanana a hanyako ka loyi wo ranga, mu nga mu dayi, hakuva hi yena a mamani wa nwanana.

²⁸ Zonake vontlhe va ka Israeli va lozwa hi malamulela ya hosi, va hlamala, hakuva va lo wona lezaku a wutlhari ga Nungungulu gi na yena kuxuxeni ka timhaka.