1 Tihosi 22 - Tshwa Bible

Kudawa ka Ahabi.

¹ A tiko gi lo rula malembe manharu; ku wa hi hava kulwa xikari ka Siria ni va ka Israeli.

² Makunu hi lembe ga wunharu, Jehoxafate a hosi ya ka Juda i lo relela aya ka hosi ya va ka Israeli.

³ A hosi ya ka Israeli yi te ngalo ka malanza yakwe: Xana a mu zi tivi lezaku le Ramote-Gileade ka hina ke? Makunu ho miyela, a hi ku teki mandleni ya hosi ya le Siria!

⁴ Aku ka Jehoxafate: U nga ta hloma zinwe na mina hi ya hlazela le Ramote-Gileade ke? Jehoxafate i lo hlamula a hosi ya ka Israeli aku: Mina nzi munwe na wena; a vanhu va mina va zinwe ni vanhu va wena, ni mahaxi ya mina ma zinwe ni mahaxi ya wena.

⁵ Kanilezi Jehoxafate i te ngalo ka hosi ya ka Israeli: Ranga hi ku wutisa vitweni ga Jehova.

⁶ Zonake a hosi ya ka Israeli yi lo tsombanyisa a vaprofeti Xipimo xa 400, aku kabye: Xana nzi famba nzi ya hlasela le Ramote-Gileade, kutani nzi ngayi ke? Vona vaku: Kanziha, u famba, hakuva Jehova i ta nyikela gona mandleni ya hosi.

⁷ Kanilezi Jehoxafate i te ngalo: Kasi a nga kona munwani muprofeti wa Jehova wa kuva hi wutisa yena ke?

⁸ A hosi ya ka Israeli yi te ngalo ka Jehoxafate: I kona munwe loyi hina hi faneleko ku wutisa ha yena ka Jehova, a nga Mikaia a nʼwana Imla; kanilezi nza mu venga, hakuva a ziprofeto zakwe a zi wulawuli kusasa ha mina, ntsena kubiha. Jehoxafate i te ngalo: Ngha a hosi yi nga wuli lezo.

⁹ Zonake a hosi ya ka Israeli yi lo vitana a nanza, yiku ka gona: Hatlisa u yela Mikaia nʼwana Imla.

¹⁰ Makunu a hosi ya ka Israeli na Jehoxafate a hosi ya ka Juda va wa tshamile, loyi ni loyi ka xitshamu xakwe xa wuhosi, na va ambele tinguwo ta wuhosi, lahandle laha nyangweni ya Samaria, vontlhe vaprofeti na va kari va profeta mahlweni kabye.

¹¹ Zedekia nʼwana Kenana i lo ti mahela timhonzo ta ziketse, na aku: Jehova i ngalo: U ta ya panzanya maSiria kala u ma mbheta hi timhonzo leti.

¹² Zinghaho vontlhe vaprofeti va lo profetisa zalezo, vaku: Kanziha uya le Ramote-Gileade, u ta ya hlula; hakuva Jehova i ta gi nyikela mandleni ya hosi.

¹³ A ntsumi lowu wu nga ya vitana Mikaia wu te ngalo ka yena: Wa wona, vontlhe vaprofeti va wulawulile mhaka yinwe; va profetile zo saseka ka hosi! Hikwalaho a timhaka ta wena a ti fanane ni timhaka tabye, u wulawulawu zo saseka ka hosi.

¹⁴ Mikaia i lo hlamula aku: Nzi hlambanya hi Jehova a hanyako, lezaku lezi Jehova a ta nga nzi byela, hi zalezo nzi ta nga zi wula. Mitse. 22:38

¹⁵ Laha a nga wa chikele laha wuhosini, a hosi yi te ngalo kakwe: Mikaia, xana hi famba hi ya hlasela le Ramote-Gileade, kutani hi ngayi ke? Yena i lo mu hlamula, aku: Kanziha u ya hlula, Jehova i ta gi nyikela mandleni ya hosi.

¹⁶ A hosi ya ka Israeli yi te ngalo kakwe: Nzi ta ku hlambanyisa zikhati zingani lezaku u nga wulawuli zinwani ahandle ka lisine hi vito ga Jehova ke?

¹⁷ Mikaia i te ngalo: Mina nzi wonile va ka Israeli vontlhe na va hangalakile lomu zitsungeni khwatsi tiyivu ti nga hiko na murisi. Jehova na aku ngalo: Lava vanhu a va na nwinyi, a munwe ni munwani a tlhele hi kurula le ndlwini yakwe. Mitse. 27:17; Mat. 9:36

¹⁸ A hosi ya ka Israeli yi te ngalo ka Jehoxafate: A nzi ku byelangi ke? A nzi wulangi lezaku a ziprofeto zakwe a zi wuli kusasa ha mina, ntsena kubiha ke?

¹⁹ Kanilezi Mikaia i te ngalo: Wena ingisa a gezu ga Jehova. Mina nzi wonile Jehova na a tshamile xitshanwini xakwe xa wuhosi, zinwe ni wontihe mabandla na ma hi xineneni xakwe ni le xibhabheni xakwe.

²⁰ Jehova na ku ngalo: Himani a ta nga ya kupeta Ahabi, kasi a fela ku kanziha le Ramote-Gileade a ya ti tokometa kona ke? Zonake munwe i lo wula lezi munwani a wula leziya.

²¹ Ku lo huma wunwani moya wu ta yima mahlweni ka Jehova, wuku: Mina nzi taya nzi ya mu kupeta. Jehova i te ngalo ka wona: U ta ya mahisa kuyini? Joba 1:6

²² Wona wu te ngalo: Nzi ta huma nziya kota moya wa mawunwa lomu milonwini ya vaprofeti vakwe vontlhe. Jehova i te ngalo: Hakunene u ta ya mu kupeta u mu hlula. Huma u ya maha zalezo.

²³ Hikwalaho Jehova i enghenisile a moya wa mawunwa milonwini ya vontlhe vaprofeti lava va wena. Jehova i wulawulile kubiha hi tlhelo ga wena.

²⁴ Zonake Zedekia nʼwana Kenaana i lo tshinela kusuhi ka Mikaia a mu phakata laha hlayeni, aku: Wu humisile kuyini a Moya wa Jehova ka mina wu ta wulawula ka wena ke?

²⁵ Zonake Mikaia i te ngalo: U ta zi wona a siku lego u ta nga huma lomu kwarutwini u ya fihlala ka yinwani kwarutu.

²⁶ A hosi ya ka Israeli yi te ngalo ka ginwani nanza: Khoma Mikaia u mu heleketa ka Amoni a nduna ya muti, ni ka Joaxi a nʼwana wa hosi, u ya ku ngalo kabye:

²⁷ A hosi yi ngalo: Enghenisani inaloyi lomu paxweni, mu mu nyika zibaba ni mati ya tiperesu, kala nzi ya wuya hi kurula.

²⁸ Zonake Mikaia i te ngalo: Loku hakunene u wuya hi kurula, Jehova a nga wulawulangi ha mina. Tlhatakumbiri, i te ngalo: Zwanani lezi nwentlhe vanhu!

²⁹ A hosi ya ka Israeli yi lo kanziha yiya le Ramote-Gileade na Jehoxafate a hosi ya ka Juda.

³⁰ A hosi ya ka Israeli yi te ngalo ka Jehoxafate: Mina nzi ta ti hunzula nzi enghena lomu yimpini; kanilezi wena ambala a tinguwo ta wena ta wuhosi. Zinghaho a hosi ya ka Israeli yi lo ti hunzula yi enghena lomu yimpini.

³¹ Makunu a hosi ya le Siria yi wa leletele a 32 wa tinduna ta tikareta, yiku: Mu ngalwi ni munhu wa tsongwani hambu wa hombe, saseka a hosi ya ka Israeli yoce.

³² Makunu laha a tinduna ta tikareta ti nga wona Jehoxafate, ti te ngalo: Hakunene hi leyi a hosi ya ka Israeli! Zonake va lo tshinela laha kusuhani kakwe ku ta mu daya; kanilezi Jehoxafate i loba huwa.

³³ Laha a tinduna ta tikareta ti nga wona lezaku a hi yona a hosi ya ka Israeli, ti lo mu tsika ti tlhela.

³⁴ Zonake a wanuna wo kari i phanda a seve wakwe hi wura, na a nga xungeti munhu, a fula a hosi ya ka Israeli hi laha matlhanganweni ya bhaji gakwe ga xiketse. Zonake Ahabi i te ngalo ka muchayeli wa kareta yakwe: Renzeleta a kareta u nzi humesa lomu yimpini, hakuva nzi khuvazilwe nguvu.

³⁵ A yimpi yi lo maha ya hombe lego siku, ni hosi yi lo tshama lomu kareteni ya yona a mahlweni ka maSiria, zonake hi laha gambyeni i lofa. A nkhata wu lo huma hi laha ka mbanga wu halakela lomu kareteni.

³⁶ Laha kupeleni ka gambo ku lo biwa hungu lomu mixaxeni yontlhe, vaku: Munwe ni munwani a fambe kabye ni le tikweni gabye.

³⁷ Zinghaho a hosi yi lofa, zonake va lo yi yisa le Samaria; va ya yi lahla kona.

³⁸ Va lo ya hlaza a kareta le tiveni ga le Samaria, zonake a timbyana ti lo lazela a nkhata wa Ahabi, laha a zibhayi zi nga wa hlamba kona, khwatsi hi lezi Jehova a nga wa wulile.

³⁹ A timhaka tinwani ta Ahabi ni zontlhe lezi a zi mahileko, ni yindlu ya timhonzo ta tindlovu leyi a nga wa akile, ni yontlhe a miti leyi a nga wa akile, zi tsalilwe lomu bhukwini ga Matimu ya tihosi ta ka Israeli.

⁴⁰ Zinghaho Ahabi i lo etlela zinwe ni vararu vakwe; zonake Ahazia a nʼwana wakwe i lo fuma xikhundleni xakwe.

Jehoxafate a fumela Juda.

⁴¹ Jehoxafate nʼwana Asa i lo sangula ku fuma lomu tikweni ga ka Juda hi lembe ga wumune ga kufuma ka Ahabi a hosi ya ka Israeli.

⁴² Jehoxafate i wa hi ni 35 wa malembe laha a nga sangula ku fuma; i lo fuma 25 wa malembe le Jerusalema; a vito ga mamani wakwe i wa hi Azuba nʼwana Xilhi.

⁴³ I lo famba hi tindlela ta raru wakwe Asa; a nga hambukangi aya tlhelweni, kanilezi i lo maha lezi zi lulamileko mahlweni ka Jehova. Ntsena lezaku a tiyindlu ta lomu zitsungeni ti wa nga khungumulwangi. A vanhu va lo simama va hisa tibani lomu zitsungeni.

⁴⁴ Jehoxafate i lo maha kurula zinwe ni hosi ya ka Israeli.

⁴⁵ A timhaka tinwani ta Jehoxafate ni mitiro yakwe, ni tiyimpi leti a ti hlomisileko zi tsalilwe lomu bhukwini ga Matimu ya tihosi ta ka Juda.

⁴⁶ I lo hlongola a vavanuna lava va nga wa ti yimisele wubhayi, lava va nga wa sele xikhatini xa raru wakwe Asa, a va hlongola lomu tikweni.

⁴⁷ Lomu tikweni ga va ka Edomi ku wa nga hi na hosi; va wa fumelwa hi nduna.

⁴⁸ Jehoxafate i lo maha mataru le Tarxixi a kuva ma ya teka a nzalama le Ofira; kanilezi a va yangi, hakuva a mataru ma lo wonheka le Ezioni-Gebera.

⁴⁹ Zonake Ahazia nʼwana Ahabi i te ngalo ka Jehoxafate: Ngha a malanza ya mina ma famba zinwe ni malanza ya wena le matarwini. Kanilezi Jehoxafate i lo ala.

⁵⁰ Jehoxafate i lo etlela zinwe ni vararu vakwe, a lahliwa zinwe navo le mutini wa Davida, a dadani wakwe. Zonake Jehoramu a nʼwana wakwe i lo fuma xikhundleni xakwe.

⁵¹ Ahazia nʼwana Ahabi i lo sangula ku fumela va ka Israeli le Samaria hi lembe ga 17 ga kufuma ka Jehoxafate a hosi ya ka Juda. I lo fumela va ka Israeli malembe mambiri.

⁵² I lo maha lezi zi bihileko mahlweni ka Jehova, a lanzela tindlela ta raru wakwe ni ta nyine wakwe, ni tindlela ta Jeroboamu a nʼwana wa Nebate, loyi a nga onhisa va ka Israeli.

⁵³ I lo khozela Baali, a khizama mahlweni kakwe; hikwalaho i lo zangarisa Jehova Nungungulu wa ka Israeli, kota lezi a mahileko a raru wakwe.