1 Tihosi 2 - Tshwa Bible

¹ Makunu laha masiku ya kufa ka Davida ma nga wa tshinele, i lo leletela nʼwana wakwe Solomoni, aku:

² Mina nza famba ndleleni ya yontlhe misava. Hikwalaho tiyisa a mbilu ya wena, uva ni ntamu, u kombisa lezaku u wanuna. Jox. 23:14

³ Hlayisa milayo ya Jehova Nungungulu wa wena, u famba hi tindlela takwe, u hlayisa zileletelo zakwe, ni milayo yakwe, ni nongameto wakwe, ni wukustumunyu gakwe khwatsi hi lezi zi tsalilweko nayweni wa Mosi, kasi u fela ku tlhariha zilweni zontlhe lezi u ta nga zi maha ni kwihi laha u yako kona;

⁴ kasi Jehova a fela ku tatisa a gezu gakwe legi a gi wulileko ka mina, aku: Loku a vanana va wena va ti hlayisa tindleleni tabye, va famba hi zinene mahlweni ka mina hi timbilu tabye tontlhe, ni mihefemulo yabye yontlhe, cima ku nga ta vumaleka a munhu wa yindlu ya wena lomu xitshanweni xa wukosi xa ka Israeli kala kupinzuka.

⁵ Ni kambe wena wa zi tiva lezi Joabe nʼwana Zeruia a nzi maheleko, zi nga lezi a zi mahileko ka tinduna timbiri ta yimpi ya ka Israeli, ku nga Abneri wa Neri, na Amasa wa Jetera, lava a nga va daya, a halata a nkhata wa yimpi hi xikhati xa kurula. I totile a nkhata wa yimpi lomu lifungeni lakwe li nga xiwunwini xakwe, ni lomu zilatweni za mikonzo yakwe.

⁶ U ta mahawu khwatsi hi wutlhari ga wena, kanilezi U nga tsiki a misisi yakwe ya wuvu yi relela hi kurula wutshanwini ga vafi.

⁷ Kasike a vana va Barzillai a muGileade, u ta kombisa wunene ka vona. U taga na vona mezeni ya wena, hakuva va mahile khwatsi ka mina xikhatini lexi nzi nga wa chava nakuloni Absalome.

⁸ Cuwuka, u na na Ximei wa Gera, a muBenjamini wa le Bahurima; loyi a nga nzi rukatela hi nzhukano yo biha nguvu a siku lego nzi nga waya le Mahanaime. I wa relele a nzi khinga le Jordani; nzi lo hlambanya kakwe ha Jehova, nziku: Nzi nga ta ku daya hi tlhari.

⁹ Kanilezi u nga mu khomi kota loyi a nga hiko na nanzu, kota lezi wenawu u nga wanuna a tlharihileko, u ta zi tiva lezi u faneleko ku zi maha ka yena; u ta relelisa a misisi yakwe ya wuvu le wutshanwini ga vafi na yi hi ni nkhata.

¹⁰ Davida i lo etlela zinwe ni vararu vakwe, a lahliwa le mutini wa Davida. 2 Sam. 5:7; Miti. 2:29; 13:36

¹¹ Davida i lo fumela va ka Israeli 40 wa malembe. Le Hebroni i lo fuma 7 wa malembe, le Jerusalema a fuma 33 wa malembe.

Solomoni a daya Adonija na Ximei.

¹² Solomoni i lo tshama xitshanwini xa wukosi xa raru wakwe Davida, ni mufumo wakwe wu lo tiyiswa nguvu.

¹³ Zonake Adonija nʼwana Haggite i loya ka Batexeba, a mamani wa Solomoni. Batexeba i lo mu wutisa, aku: Uta hi kurula ke? Yena aku: Ina, nzita hi kurula.

¹⁴ I lo engeta aku: Nzova ni gezu nzi lavako ku ku byela. Batexeba a nge: Wulawula!

¹⁵ Yena aku: Wena wa zi tiva lezaku a mufumo wu wa lumba mina; vontlhe va ka Israeli va wa cuwukele mina lezaku nzi tava hosi; kanilezi a mufumo wu hunzulusilwe wuya ka nakulori, hakuva yena i nyikilwe hi Jehova.

¹⁶ Makunu nzi kombela xilo xinwe ka wena, u nga nzi kaneti! Batexeba i te ngalo kakwe: Wula!

¹⁷ Yena aku: Hi nga ya byela hosi Solomoni, a nga ku kaneti, lezaku a nzi nyika Abixagi a muXuname, a maha sati wa mina.

¹⁸ Batexeba i te ngalo: Matsenya! Nzi ta ya ku wulawulela ka hosi.

¹⁹ Zonake Batexeba i loya ka hosi Solomoni a ya wulawulela Adonija. A hosi yi lo suka yi mu khinga, yi ya korama mahlweni ka yena, zonake yi lo tshama xitshanwini xa yona xa wukosi, yi rumisa lezaku ku bekiwa xinwani xitshamu xa wukosi xa mamani wa hosi, zonake Batexeba a tshama hi le canjeni gakwe ga xinene.

²⁰ Yena i te ngalo: Nzi tela ku ta kombela a xilo xitsongwani ka wena u nga nzi kaneti. A hosi yiku kakwe: Kombelaka mama; cima nzi nga ta ku kaneta.

²¹ Yena aku: Ngha Abixagi a muXuname a nyikiwa ka nakuloni Adonija, a maha sati wakwe.

²² Hosi Solomoni i lo hlamula mamani wakwe, aku: Hikuyini u kombelela Adonija a kuva a nyikiwa Abixagi a muXuname ke? Mu kombelele kambe ni wuhosi, hakuva yena i nhonzo ya mina; hakunene u ta kombelela kambe na mupristi Abiatari, na Joabe nʼwana Zeruia!

²³ Zonake hosi Solomoni i lo hlambanya ha Jehova, aku: Nungungulu a nzihe makunu ni ku engeta, loku nzi nga tlheliseli Adonija a gezu legi a gi wulileko.

²⁴ Makunu khwatsi hi lezi Jehova a hanyako, loyi a nga nzi yimisa ni ku nzi veka xitshanwini xa wukosi xa dadani wa mina Davida, a nzi mahela a yindlu khwatsi hi lezi a wulileko! Hakunene Adonija i ta dawa inyamutlha.

²⁵ Zonake hosi Solomoni i lo ruma Benaia nʼwana Jehoiada a ku ya mu daya afa.

²⁶ Kanilezi mupristi Abiatari, a hosi yi te ngalo kakwe: Suka uya masinwini ya wena le Anatote, hi lezi wenawu u fanele kufa; kanilezi inyamutlha nzi nga ta ku daya, hakuva u wa rwala a arke ga Hosi Jehova mahlweni ka dadani wa mina Davida, ni kambe u wa xaniseka zinwe na dadani ka zontlhe zikarato zakwe.

²⁷ Zinghaho Solomoni i lo hlongola Abiatari a kuva a nga mahi mupristi wa Jehova, kasi ku fela ku tatiseka a gezu legi Jehova a nga gi wula hi yindlu ya Eli le Xilo.

²⁸ A mahungu lawa ma lota ka Joabe, hakuva i wa lanzele Adonija, hambu lezi a nga mu lanzelangi Absalome. Zonake Joabe i lo chavela lomu tendeni ga Jehova, a ya khoma timhonzo ta alati.

²⁹ Zonake va lo ya byela hosi Solomoni lezaku Joabe i tsutsumele lomu tendeni ga Jehova, i yimile laha alatini. Solomoni i lo ruma Benaia nʼwana Jehoiada, aku: Famba u ya mu daya!

³⁰ Zonake Benaia i loya lomu tendeni ga Jehova a yaku ka Joabe: A hosi yi ngalo: Huma! Yena aku: Nyawowe! Nzi ta fela kwalaha. Benaia i lo ya byela hosi, aku: Joabe i wulile lezi ni lezi, a nzi hlamula.

³¹ A hosi yiku kakwe: Maha zalezo a wulileko ha yece; mu daye u mu lahla, kasi wena wa fela ku susa ka mina ni ka yindlu ya dadani, a nkhata lowu Joabe a nga wu halata handle ka nanzu.

³² Jehova i ta tlhelisela hlokweni yakwe a nkhata wakwe yena nwinyi, hakuva i dele a vavanuna vambiri va lulamileko ku hunza yena, a va daya hi tlhari na dadani wa mina Davida a nga zi tivi-—ku nga Abneri wa Neri, a nduna ya yimpi ya ka Israeli, na Amasa wa Jetera, a nduna ya yimpi ya ka Juda.

³³ Hikwalaho a nkhata wabye wu ta tlhelela hehla ka hloko ya Joabe, ni hehla ka tihloko ta pswalo wakwe kala kupinzuka. Kanilezi Jehova i ta nyika kurula ka Davida ni pswalo wakwe, ni le ndlwini yakwe, ni ka xitshamu xakwe xa wukosi kala kupinzuka.

³⁴ Zonake Benaia nʼwana Jehoiada i lo kanziha a ya gwaza Joabe, a lahliwa le ndlwini yakwe le xiwuleni.

³⁵ Zonake a hosi yi lo yimisa Benaia wa Jehoiada xikhundleni xa Joabe, a kuva hloko ya yimpi; a yimisa kambe Zadoke a kuva mupristi xikhundleni xa Abiatari.

³⁶ A hosi yi lo vitanisa Ximei, yiku kakwe: Aka a yindlu ya wena lomu Jerusalema, u tshama ka yona, u nga sukasuki uya wutshamu.

³⁷ Hakuva kani hi gihi siku u ta nga suka u famba, u tlhatuka xicongwana lexi xa Kidroni, zi tive lezaku futsi u tafa; ni nkhata wa wena wu tava hehla ka hloko ya wena.

³⁸ Ximei i te ngalo ka hosi: A gezu legi gi nene; khwatsi hi lezi a hosi yanga yi wulileko. Zonake Ximei i lo tshama lomu Jerusalema masiku yo tala.

³⁹ Makunu na ku hunzile malembe manharu, a malanza mambiri ya Ximei ma lo tsutsuma ma chavela ka Akixi nʼwana Maaka, a hosi ya le Gati. Zonake va lo byela Ximei vaku: Languta, a malanza ya wena ma le Gati.

⁴⁰ Zonake Ximei i lo suka a gabhatsela a mbongola yakwe, aya le Gati ka Akixi, a ku ya lava malanza yakwe. Lexo Ximei i lo ya teka malanza yakwe le Gati a wuya nawo.

⁴¹ Makunu ku lo byelwa Solomoni lezaku Ximei i sukile lomu Jerusalema aya le Gati, ni lezaku i wuyile kambe.

⁴² Zonake a hosi yi lo vitanisa Ximei, a taku kakwe: Kasi a nzi hlambanyangi ha Jehova ka wena, nzi tiyisa lezaku: Zi tive futsi lezaku ni gihi siku u ta nga suka uya wutshamu, u tafa ke? Wena uku: A gezu legi gi nene, nzi gi zwile.

⁴³ Hikuyini u nga kala ku hlayisa a xifungo xa ka Jehova ni kuleletela loku nzi ku leleteleko ke?

⁴⁴ Tlhatakumbiri, a hosi yi te ngalo ka Ximei: Wena wa tiva mbilwini ya wena a kubiha kontlhe loku u ku mahileko ka Davida, dadani wa mina. Makunu Jehova i ta tlhelisela hehla ka hloko ya wena a kubiha ka wena.

⁴⁵ Kanilezi hosi Solomoni i ta katekiswa, ni xitshamu xa wukosi xa Davida xi ta tiyiswa mahlweni ka Jehova kala kupinzuka.

⁴⁶ Zonake a hosi yi lo leletela Benaia nʼwana Jehoiada a ku huma a ya mu daya, afa. A mufumo wu lo tiyiswa canjeni ga Solomoni.