1 Tihosi 19 - Tshwa Bible

Elija le Horebi.

¹ Ahabi i lo ya hlawutela Jezebeli zontlhe lezi zi mahilweko hi Elija, ni lezi a dayisileko zona vontlhe vaprofeti hi supado.

² Zonake Jezebeli i lo rumela ntsumi ka Elija, aku: A vanungungulu a va nzi tsayise ni ku engeta, loku manziko hi xwalexi xikhati nzi nga ku dayi, kota lezi u nga dayisa zona munwe ni munwani wa vona,

³ Makunu laha yena a nga wa zi wonile, i lo suka a famba kasi ku ponisa wutomi gakwe, a ya chikela le Berexeba ga ka Juda; leyo i lo ya siya a nanza gakwe;

⁴ kanilezi yena i lo famba a pfhuka wa siku gontlhe aya xiwuleni; i lo ya chikela a tshama lahasi ka sinyana, a kombela kufa, aku: Zi ringene! Jehova, teka muhefemulo wa mina, hakuva a nzi va hunzi kululama a vadadani va mina! Jona 4:3

⁵ I lo barama lahasi ka sinyana, g etlela. Languta, a ngelosi yi lota yi ta mu khumba, yiku kakwe: Vuka uga!

⁶ I lo cuwuka, a wona le tihlokweni takwe a xikhekhetselo xo katingwa hehla ka maribye yo hisa, ni nghotso ya mati; i loga anwa, a tlhela a etlela.

⁷ A ngelosi ya Jehova yi lota kambe khati ga wumbiri yi ta mu khumba, yiku: Vuka uga, hakuva a lwenzo li lehile nguvu ku hunza a ntamu wa wena.

⁸ Yena i lo vuka aga, anwa; zonake hi ntamu lowu a wu kumileko hi kuga loko, i lo famba 40 wa masiku, wusiku ni hlikanhi, aya le Horebi xitsungeni xa Nungungulu. Ekso. 3:1; Deut. 9:9, 18; Mat. 4:2

⁹ Laho i lo enghena lomu mhakweni ya ribye a etlela kona. Languta, ku lota a gezu ga Jehova, giku kakwe: Elija, wo maha yini laha?

¹⁰ I lo hlamula, aku: Mina nzi pangamele Jehova Nungungulu wa tiyimpi, hakuva a vanana va ka Israeli va tsikile a xivumelwano xa wena, va khungumule a maalati ya wena, va dele a vaprofeti va wena hi supado, hi mina nzoce nzi seleko, na vona va lava ku nzi daya! Rom. 11:2

¹¹ Jehova i te ngalo kakwe: Huma u ya yima le xitsungeni mahlweni ka Jehova. Languta, Jehova i lo hunza hi laho; ni mheho ya hombe ya ntamu yi nga tsekatsekisa zitsunga yi fayetela maribye, yi lo ranga mahlweni ka Jehova. Kanilezi Jehova i wa nga hi kona lomu ka bhubhutsa lego. Ni nzhako ka bhubhutsa ku wa hi kona kutsekatseka ka misava, kanilezi Jehova i wa nga hi kona lomo ka kutsekatseka ka misava. Ekso. 34:6; Miti. 2:2

¹² Anzhako ka kutsekatseka ka misava ku lo huma a nzilo, kanilezi Jehova i wa nga hi kona nzilweni lowo. Ni nzhako ka nzilo ku lo zwala a pfumawulo wa lungu go olova.

¹³ Laha Elija a nga wa gi zwile, i lo fenengeta a nghohe yakwe hi bhaji gakwe, a huma a ya yima laha nyangweni ya mhako. Languta, a gezu gi lota gi taku kakwe: Elija, wo maha yini laha? Ekso. 3:6

¹⁴ Yena i te ngalo: Mina nzi pangamele Jehova Nungungulu wa tiyimpi, hakuva a vanana va ka Israeli va tsikile a xivumelwano xa wena, va khungumule a maalati ya wena, va dele vaprofeti va wena hi supado, hi mina nzoce nzi seleko, na vona va lava ku nzi daya.

¹⁵ Jehova i te ngalo kakwe: Tlhela u famba hi ndlela ya xiwula, u ta ya chikela le Damasku, u enghena u tota Hazaeli a kuva hosi ya Siria;

¹⁶ u ta ya tota na Jehu nʼwana Nimxi a kuva hosi ya ka Israeli. U ta ya tota na Elixa nʼwana Xafate wa le Abela-Mehola, a tava muprofeti wutshanwini ga wena.

¹⁷ Kasi loye a ta nga pona a supado ya Hazaeli, i ta dawa hi Jehu. Ni loyi a ta nga pona a supado ya Jehu, i ta dawa hi Elixa.

¹⁸ Kasike mina nzi ti siyele 7,000 wa vanhu a xikari ka va ka Israeli, lava vontlhe va nga khizamangiko ka Baali ni ku mu pswopswa. Joba 31:27; Hos. 13:2; Rom. 11:4

A kuvitanwa ka Elixa.

¹⁹ Zinghaho Elija i lo suka hi laho, a ya kuma Elixa a nʼwana Xafate na a kari a rima hi 12 wa miyoko leyi yi nga wa famba mahlweni kakwe; yena i wa gula a muyoko wo gumesa. Elija i lo hunza hi laha kusuhani kakwe, zonake i lo mu hoxa a kumba wakwe.

²⁰ Elixa i lo tsika tihomu takwe, a tsutsuma a lanza hi le nzhako ka Elija, aku: Nzi vumele nzi ya pswopswa dadani na mamani kuranga, zonake nzi ta wuya nzi ta ku lanzela. Aku kakwe: Suka u famba. Wa zi tiva lezi nzi ku maheleko zona. Lu. 9:61

²¹ Zonake Elixa i lo mu siya a ya teka a tihomu timbiri a maha muphahlelo ha tona; i lo bhika a nyama ya kona hi miyoko ya tihomu, a nyika vanhu vaga. Zonake i lo suka a lanzela Elija, a mu tirela.