1 Tihosi 17 - Tshwa Bible

Elija a phamelwa hi zikunguwa.

¹ Elija a muTixebeti wa le Gileade, i te ngalo ka Ahabi: Nzi hlambanya ha Jehova a hanyako, a Nungungulu wa ka Israeli, loyi nzi nga xitiri xakwe! A malembe lawa cima ku nga tava kona a vula hambu nzhokati, loku ku nga hi gezu ga mina. Jak. 5:17

² Zonake a gezu ga Jehova gi lota kakwe, giku:

³ Suka u famba, u komama tlhelo ga Mutsuwuka-gambo, u ya fihlala le xicongwaneni xa Kerite, lexi xi nga le tlhatukweni wa Jordani.

⁴ U tanwa a mati ya xicongwana lexo; nzi leletele a zikunguwa a ku ku phamela zakuga.

⁵ Yena i lo famba, a maha kota kuwula ka Jehova. I lo ya tshama le xicongwaneni xa Kerite xi nga tlhatukweni wa Jordani.

⁶ Zonake a zikunguwa zi lo mu nehela a zibaba ni nyama mixo ni gambo, anwa a mati ya xicongwana.

⁷ Anzhako ka xikhati a xicongwana xi lopswha, hakuva ku wa nga hani vula laha misaveni.

⁸ Jehova i te ngalo ka Elija:

⁹ Suka uya le Zarefate ga Sidoni, u ya tshama kona. Languta, mina nzi leletele a noni a kuva yi ku phamela a zakuga leyo. Lu. 4:25

¹⁰ Zinghaho Elija i lo suka aya le Zarefate. Laha a nga wa chikele laha nyangweni ya muti, i lo wona a noni seyo, yi nga kari yi lava a tihunyi. I lo mu vitana, aku kakwe: Hi nga nzi khela matanyana lomu ka nghotso nzinwa.

¹¹ Makunu laha a nga wa haya a ku ya mu khela mati, i lo mu vitana kambe, aku: Hi nga nzi lavela kambe ni xipanzana xa xibaba!

¹² Yena i te ngalo kakwe: Nzi hlambanya hi Jehova Nungungulu wa wena a hanyako, a nzi na xibaba ni xitsongwani; nzo va ni mapanyana matsongwani ntsena lomu ka guwana, ni mafurana lomu ka xigutsana. Loku nzi rolile mahlahla lawa mambiri, nzi ta famba nzi ya bhika; loku mina ni mufanyana wa mina hi gile, hi tafa.

¹³ Elija i te ngalo kakwe: U nga chavi! Famba u ya maha kota lezi u wulileko; ntsena lezaku ranga hi ku ya nzi mahela a xikhekhetselo u nzi nehela leno handle, anzhako ka lezo u ta ti bhikela za wena ni nʼwana wa wena.

¹⁴ Hakuva Jehova Nungungulu wa ka Israeli i ngalo: A mapa lawo ma nga lomo ka guwana cima ma nga ta mbhela, ni mafura lawo ma nga lomo ka xigutsana ma nga ta mbhela, kala Jehova a nisa a vula laha misaveni.

¹⁵ Zonake a wasati i lo famba a ya maha kota lezi Elija a mu byelileko; i loga masiku yo tala, yena ni va yindlu yakwe zinwe na Elija. Mat. 10:40

¹⁶ A mapa a ma mbhetangi lomu ka guwana, ge hambu mafura lomu ka xigutsana, khwatsi hi lezi Jehova a wulileko ha Elija.

¹⁷ Anzhako ka lezo a nʼwana wa loyi wasati, a nwinyi wa yindlu, i lo babya; a wubabyi gakwe gi lo kuta nguvu, laha kaku ku nga sali ni muhefemulo ka yena.

¹⁸ Zonake loyi wasati i te ngalo ka Elija! I mhaka muni nzi nga nayo na wena munhu wa Nungungulu? Kasi u tile laha a ku ta nzi alakanyisa zionho za mina ni ku ta daya nwananga ke? Lu. 5:8

¹⁹ Yena i te ngalo kakwe: Nzi nyike a nʼwana wa wena! I lo mu teka laha xifuveni xa wasati a mu tlakula, a kanziha naye lomu ndlwini leyi a nga wa tshama ka yona, a ya mu etlelisa laha mubhedini wakwe.

²⁰ I lo kombeta ka Jehova, aku: O, Jehova Nungungulu wa mina, xana u ta neha a khombo ga kunghahi ka loyi wasati wa noni, u daya a nʼwana wa loyi a nga nzi rurela ke?

²¹ I lo barama makhati manharu hehla ka nwanana, a kombela ka Jehova, aku: Jehova Nungungulu wa mina, tlhelisa a muhefemulo wa loyi nwanana lomu mirini wakwe! 2 Tih. 4:34; Miti. 20:10

²² Jehova i lo ingisa a gezu ga Elija, ni muhefemulo wa nwanana wu lo tlhelela mirini wakwe, a hanya.

²³ Zonake Elija i lo teka nwanana a chika naye hi le xitezi, a ta mu nyiketa ka mamani wakwe, aku: Cuwuka, a nʼwana wa wena wa hanya. Lu. 7:15

²⁴ A wasati i te ngalo ka Elija: Makunu nza zi tiva lezaku wena u munhu wa Nungungulu, ni lezaku gi tiyile a gezu ga Jehova, gi nga lomu nonwini wa wena.