1 Tihosi 14 - Tshwa Bible

Ahija a profetela Jeroboamu.

¹ A xikhati lexo, Abija nʼwana Jeroboamu i lo babya.

² Jeroboamu i te ngalo ka sati wakwe: Suka u ti hunzula, kasi u nga tiveki lezaku u kata Jeroboamu, uya le Xilo. U ta ya kuma muprofeti Ahija, loyi a nga wa wulawulile ha mina lezaku nzi tava hosi ya vanhu lava.

³ Teka a khume ga zibaba ni zikhekhetselo ni nghotso ya wulombe uya kakwe, i ta ya ku byela lezi zi ta nga maheka ka nwanana loyi.

⁴ A sati wa Jeroboamu i lo maha lezo. I lo suka aya le Xilo a ya enghena lomu ndlwini ka Ahija. Ahija i wa nga ha woni, hakuva a mahlo yakwe ma wa lutsumile hi wukhosana. 1 Sam. 4:15

⁵ Kanilezi Jehova i wa byelile Ahija, aku: Wata sati wa Jeroboamu a ta wutisa hi nwanana wakwe, hakuva wa babya. U ta ta mu byela lezi ni lezi. Loku a chikele i ta ti maha munwani wasati.

⁶ Makunu laha Ahija a ngazwa zigingi za mikonzo yakwe na enghena laha nyangweni, i te ngalo kakwe: Enghena, wena kata Jeroboamu! Hi kuyini u ti hunzula u ti maha munwani munhu? Nzi rumilwe a ku ku byela mahungu yo binza.

⁷ Tlhela u famba ka Jeroboamu u yaku kakwe: Jehova Nungungulu wa ka Israeli i ngalo: Mina nzi ku tlakusile xikari ka vanhu, nzi ku yimisa akuva murangeli wa vanhu va mina va ka Israeli;

⁸ nzi wutla mufumo ndlwini ya Davida, nzi wu nyikela ka wena. Kasike wena a ku fanani ni nanza ga mina Davida, loyi a nga wa hlayisa zileletelo za mina, a nzi lanzela hi mbilu yakwe yontlhe, a maha zo lulama ntsena mahlweni ka mina.

⁹ Wena u mahile kubiha ku hunza vontlhe lava va ku rangeleko; u ti mahele vanungungulu vanwani va zifananiso zi nyekisilweko u nzi zangarisa, u nzi fularela.

¹⁰ Hikwalaho mina nzi ta rumela khombo ndlwini ya Jeroboamu, nzi ta lobyisa vafana vontlhe va Jeroboamu, lava va tsongwani ni laʼva hombe lomu ka Israeli; nzi ta swiyela a yindlu ya Jeroboamu khwatsi hi loku munhu a swiyela chaka kala gi mbhela.

¹¹ Kani hi wihi munhu wa ka Jeroboamu a ta nga fela laha mutini, i ta giwa hi timbyana; ni loyi a ta nga fela khwatini, i ta giwa hi tinyanyani ta tilo, hakuva Jehova i wulile lezo.

¹² Wena suka u famba kaya. U taku u enghena mutini, a nwanana afa.

¹³ Vontlhe va ka Israeli va ta mu hlaluka, va mu lahla, hakuva hi yena yece wa yindlu ya ka Jeroboamu a ta nga enghena lomu nkeleni, hi lezi hi yena yece wa ka Jeroboamu a kumilweko na lulamile mahlweni ka Jehova Nungungulu wa ka Israeli.

¹⁴ Jehova i ta yimisa hehla ka va ka Israeli a hosi leyi yi ta nga lovisa a yindlu ya ka Jeroboamu lego siku. Inaka; hambu nyamutlha lezi.

¹⁵ Jehova i ta hlasela va ka Israeli khwatsi lihlanga li tsekatsekiswako lomu matini, a susa va ka Israeli tikweni legi go saseka a gi nyikileko vararu vabye; i ta va hangalasa le tlhatukweni wa congo, hakuva vona va ti mahele zifananiso za Axtarte, va zangarisa Jehova.

¹⁶ Jehova i ta nyikela va ka Israeli hi kota ya zionho za Jeroboamu, lezi a zi mahileko ni lezi a onhisileko va ka Israeli ha zona.

¹⁷ Zonake kata Jeroboamu i lo suka a famba aya le Tirza. I te aku kanziheli a xipimbitsi xa nyangwa, a nwanana a sita.

¹⁸ Vontlhe va ka Israeli va lo mu lahla, va mu hlaluka khwatsi hi lezi Jehova a wulileko hi nanza gakwe, muprofeti Ahija,

¹⁹ a yinwani mitiro ya Jeroboamu, ni lezi a nga lwisa zona, ni lezi a nga fumisa zona, zi tsalilwe lomu bhukwini ga Matimu ya tihosi ta ka Israeli.

²⁰ Jeroboamu i lo fuma 22 wa malembe. Zonake i lo etlela ni vararu vakwe; a nʼwana wakwe Nadabe i lo fuma xikhundleni xakwe.

Rehoboamu a fumela Juda.

²¹ Rehoboamu nʼwana Solomoni i lo fumela tiko ga Juda. I wa hi ni 41 wa malembe xikhatini lexo a nga sangula ku fuma. I lo fuma 17 wa malembe le Jerusalema, mutini lowu Jehova a wu hlawulileko xikari ka tontlhe tinyangwa ta ka Israeli, a kuva a veka a vito gakwe ka wona. A vito ga mamani wakwe ku wa hi Naama, a muAmoni.

²² A va ka Juda va lo maha lezi zi bihileko mahlweni ka Jehova, va mu zangarisa ku hunza vadadani vabye hi zionho lezi va zi mahileko.

²³ Hakuva vonawu va lo ti akela a maganzelo lomu zitsungeni, lomu ku nga ni zifananiso za Axtarte, va maha lezo ka zontlhe zitsunga zi tlakukileko, ni lahasi ka tontlhe tisinya leti ti hlukako.

²⁴ Lomu tikweni ga ka Juda ku wa hi kona a vavanuna lava va nga wa hlawulelwe wubhayi. Va lo anzisa wontihe manyala ya matiko lawa Jehova a nga wa ma hlongole mahlweni ka vanana va ka Israeli. Deut. 18:9; 23:17

²⁵ Makunu hi lembe ga wuntlhanu ga kufuma ka Rehoboamu, Xixaka a hosi ya le Gipite i lo kanziha ku ta hlasela Jerusalema.

²⁶ I lo ta teka a titshomba ta yindlu ya Jehova, ni titshomba ta yindlu ya hosi, a teka zontlhe. I lo teka ni zitlhangu za nzalama lezi Solomoni a nga wa zi mahile.

²⁷ A wutshanwini ka lezo zi tekilweko, Rehoboamu i lo maha zinwani zitlhangu za suku, a zi veka mandleni ya tinduna ta yimpi leti ti hlayisako a nyangwa ya yindlu ya hosi.

²⁸ A ka zikhati zontlhe lezi a hosi yi nga waya lomu ndlwini ya Jehova, a varinzeli va wo zi teka va welela, zonake va zi tlhelisa lomu ndlwini ya varinzeli.

²⁹ A yinwani mitiro ya Rehoboamu, ni zontlhe lezi a zi mahileko zi tsalilwe lomu bhukwini ga Matimu ya tihosi ta ka Juda.

³⁰ Ka zontlhe zikhati lezo ku wa hi kona kulwa xikari ka Rehoboamu na Jeroboamu.

³¹ Rehoboamu i lo etlela ni vararu vakwe le mutini wa Davida. A vito ga mamani wakwe i wa hi Naama a muAmoni. Zonake Abijamu a nʼwana wakwe i lo fuma xikhundleni xakwe.