1 Tihosi 13 - Tshwa Bible

A munhu wa Nungungulu a huma le Juda.

¹ Makunu laha Jeroboamu a nga wa yimile laha alatini a hisa libani, ku lota a munhu wa Nungungulu hi le tikweni ga ka Juda, ata Beteli na rumiwa hi Jehova.

² Yena i loba huwa mahlweni ka alati hi gezu ga Jehova, aku: Alati, alati! Jehova i ngalo: Languta, ku ta belekiwa a nisanyana lomu ndlwini ka Davida, a vito gakwe hi Josia. Yena i ta phahlela hehla ka wena hi vapristi va legi wutshamu gi tlakukileko, lava va hisako libani hehla ka wena, ku ta hiswa ni marambu ya vanhu hehla ka wena!

³ Zonake i lo maha xiwoniso gwalego siku, aku: Lexi hi xiwoniso lexi Jehova a wulileko, aku: Languta, a alati gi ta panzeka, ni khuma gi nga hehla ka gona gi ta hangalaka lahasi.

⁴ Laha hosi Jeroboamu a nga wa zwile a gezu ga munhu wa Nungungulu na giba huwa mahlweni ka alati ga le Beteli, yena i lo nawuluta a canja gakwe na a hi laha alatini, aku: Mu khomeni! A canja gakwe legi a nga wa gi nawulutile gi su kokotsolo, a nga ha zi koti ku gi tlhelisa wutshanwini ga gona.

⁵ Zalezo a alati gi lo panzeka, a khuma legi gi nga hi hehla ka gona gi hangalaka, khwatsi hi lezi a munhu wa Nungungulu a nga wa va byelile xiwoniso, hi kulaya ka Jehova.

⁶ Zonake a hosi yi te ngalo ka munhu wa Nungungulu: Kombela ka Jehova Nungungulu wa wena, u nzi khongelela kasi a canja ga mina gi fela ku tlhelela wutshanwini ga gona! Zonake a munhu wa Nungungulu i lo khongela ka Jehova, ni canja gakwe gi lo tlhelela wutshanwini ga gona kota kusanguleni. Ekso. 8:8; 9:28; Mitse. 21:7

⁷ A hosi yi te ngalo ka munhu wa Nungungulu. A hi fambe lomu ndlwini hi yaga zakuga; mina nzi ta ya ku nyika nchachazelo!

⁸ Kanilezi a munhu wa Nungungulu i lo hlamula hosi, aku: Hambu loku wena wa ku nzi nyika a khihlanya ga yindlu ya wena, cima nzi nga ta famba na wena nzi yaga zakuga ni ku yanwa a mati ya legi wutshamu. Mitse. 22:18; 24:13

⁹ Hakuva a gezu ga Jehova gi nzi leletele, giku: U ngagi zakuga ni kunwa mati, u nga tlheli hi ndlela leyi u fambileko ha yona!

¹⁰ Zinghaho i lo suka a famba hi yinwani ndlela; a nga tlhelangi hi leyi a ngata ha yona leno Beteli.

¹¹ Makunu leyo ku wa hi kona a xikhosana xa muprofeti le Beteli. A vana vakwe va lo ya mu hlawutela tontlhe timhaka ta munhu wa Nungungulu leti a ti mahileko le Beteli lego siku, ni leti a nga byela a hosi. Laha va nga wa hlawutele timhaka leto,

¹² a raru wabye i lo va wutisa aku: I tlhelile hi yihi ndlela? A vana vakwe va wa yi wonile a ndlela leyi a fambileko ha yona a munhu wa Nungungulu loyi a nga wa tile hi le tikweni ga ka Juda.

¹³ Yena i te ngalo ka vana vakwe: Nzi gabhatseleleni a mbongola! Va lo mu gabhatselela a mbongola, a yi khilela,

¹⁴ a suka a lanza a munhu wa Nungungulu. I lo ya mu kuma na tshamile lahasi ka sinya ya nkuhlu; aku kakwe: Xana hi wena a munhu wa Nungungulu loyi a tako hi le tikweni ga ka Juda ke? Yena aku: Hi mina.

¹⁵ Yena i te ngalo kakwe: Ngone hi famba le kaya, u ta yaga zakuga!

¹⁶ Yena i te ngalo: Cima nzi nga ta tlhela zinwe na wena, hambu ni ku ya enghena lomu ndlwini ya wena; ge hambu a kuga zakuga ni kunwa a mati ya wena ka legi wutshamu;

¹⁷ hakuva a gezu ga Jehova gi te ngalo ka mina: U ngagi zakuga za kona, hambu ni kunwa mati ya kona; ni loku u wuya u nga tlheli hi ndlela leyi u fambileko ha yona.

¹⁸ Na yena i te ngalo kakwe: Minawu nzi muprofeti kota wena. A ngelosi ya Jehova yi lo wula ka mina yiku: Mu tlhelise a wuya lomu ndlwini ya wena a taga zakuga anwa mati. Kanilezi i wo hemba mawunwa.

¹⁹ Zinghaho a munhu wa Nungungulu i lo tlhela naye, a yaga zakuga ni kunwa mati lomu ndlwini yakwe.

²⁰ Makunu laha va nga wa tshamile laha mezeni, a gezu ga Jehova gi lota ka muprofeti loyi a mu tlhelisileko.

²¹ I loba huwa ka munhu wa Nungungulu loyi a tileko hi tikweni ga ka Juda, aku: Kota lezi u nga kala ku ingisa a gezu ga Jehova, a ku hlayisangi a xileletelo lexi Jehova Nungungulu wa wena aku leleteleko;

²² kanilezi wena u tlhelile u taga zakuga, unwa mati a ka wutshamu legi a nga ku byela ku ngalo: U ngagi zakuga za kona, hambu ni kunwa a mati ya kona; a xirumbi xa wena xi nga ta engheniswa xilahleni xa vararu va wena!

²³ Makunu a muprofeti loyi a mu tlhelisileko, laha na va gile zakuga vanwa mati, i lo mu gabhatselela a mbongola.

²⁴ Laha a nga wa sukile a famba, i lo tlhangana ni nghala lomu ndleleni yi mu daya; a xirumbi xakwe xi su chanjala laha ndleleni, a mbongola yi su yima laha kusuhani ni xirumbi; na yonawu nghala yi su pswhe kwalaha kusuhani ni xirumbi.

²⁵ Languta, a vanhu lava va nga wa hunza hi laho, va lo wona a xirumbi na xi lo chanjala laha ndleleni, ni nghala na yi yimile kusuhani ni xirumbi; va lo ya hlawutela timhaka leto le mutini wa xikhosana xa muprofeti.

²⁶ Laha a muprofeti loyi a mu tlhelisileko hi laha ndleleni, a nga wa zi zwile, i te ngalo: Loye i munhu wa Nungungulu a nga ingisangiko a kuleletela ka Jehova. Jehova i mu nyikele ka nghala leyo yi mu pfhemuleko yi mu daya, kota lezi Jehova a mu byelileko.

²⁷ Zonake i lo laya a vana vakwe, aku: Nzi gabhatseleleni a mbongola. Va lo mu gabhatselela a mbongola leyo.

²⁸ Zonake i lo suka a famba, a ya kuma a xirumbi na xi te chanjala laha ndleleni, a mbongola ni nghala na zi yimile kusuhani ka xona. A nghala yi wa ngagi xirumbi hambu ku pfhemula a mbongola.

²⁹ A muprofeti i lo tlakula a xirumbi xa munhu wa Nungungulu a xi tlhateka hehla ka mbongola, a xi neha laha kaya. Zinghaho a xikhosana xa muprofeti xi lo wuya mutini xi ta mu hlaluka ni ku mu lahla.

³⁰ I lo veka a xirumbi lomu nkeleni wakwe wutsumbu, zonake va mu hlaluka, vaku: O, nakulori! Jer. 22:18

³¹ Makunu laha a nga wa mu lahlile, i lo byela a vana vakwe, aku: Loku nzifa, mu ta nzi lahla nkeleni lowu a lahlelweko kona a munhu wa Nungungulu; mu ta veka marambu ya mina kusuhani ni marambu yakwe.

³² Hakuva ku ta tatisiseka a gezu legi a ngaba huwa hi kuleletela ka Jehova mahlweni ka alati ga le Beteli, ni mahlweni ka tontlhe tiyindlu leti ti nga laha wutshanwini gi tlakukileko leti ti nga lomu mitini ya Samaria.

³³ Anzhako ka lezo Jeroboamu a nga hunzulukangi ndleleni yakwe ya kubiha. I lo engeta kambe a veka vapristi va lomu ka zitsunga, va humelako matikweni wontihe: i lo hlawula loye a mu lavako yena, a mu yimisa a kuva mupristi wutshanwini gi tlakukileko. Ekso. 28:41

³⁴ Lezo zi lova kuonha ka hombe lomu ndlwini ya Jeroboamu, yi kala yi lobyiswa laha misaveni.