1 Tihosi 12 - Tshwa Bible

A wupumbu ga Rehoboamu.

¹ Rehoboamu i loya le Xekemu, hakuva vontlhe va ka Israeli va wa yile le Xekemu a ku ya mu yimisa a kuva hosi.

² Makunu laha Jeroboamu nʼwana Nebate a nga zizwa na hi le Gipite, leyo a nga tsutsumela kona hi ku chava hosi Solomoni, hakuva yena i wa akile le Gipite,

³ zonake va lo mu vitanisa; Jeroboamu ni hlengeletano wontihe wa va ka Israeli, va lo ta wulawula na Rehoboamu, vaku:

⁴ A raru wa wena i wa tikisile a minzhwalo ya hina, makunu wena hehukisa a mitiro leyo yo binza ya raru wa wena, ni muyoka lowu wo tika a wu tlhatekileko ka hina, hi kona hi ta nga ku tirela.

⁵ Yena i te ngalo kabye: Fambani mu yaxwa masiku manharu, zonake mu ta tlhela mu wuya ka mina. A vanhu va lo suka va famba.

⁶ Hosi Rehoboamu i lo vitana a madota lawa ma nga wa tshama ni raru wakwe Solomoni, xikhatini lexo a nga ha hanya, a ta va wutisa, aku: Nzi ta ta hlamula yini ka vanhu ke?

⁷ Zonake vona va lo wulawula naye, vaku: Inyamutlha loku wena u ingisa vanhu, u va hlamula khwatsi, u va byela timhaka ta tipswalo, va ta ku tirela kala kupinzuka.

⁸ Kanilezi Rehoboamu i lo tsika wusungukati ga madota, a vitana a majaha ya tanga yakwe, lawa va nga mu tirela.

⁹ I te ngalo kabye: Nzi ta hlamula yini ka vanhu lezi va nga wulawula ka mina, vaku: Hehukisa a nzhwalo lowu a raru wa wena a nga wa wu tlhatekile hehla ka hina?

¹⁰ A majaha lawa ma nga kula naye ma lo hlamula, maku: U ta wula lezi ka vanhu lavo va wulawulileko ka wena, vaku: A raru wa wena i wa binzisile a nzhwalo wa hina, kanilezi wena wu hehukise hehla ka hina. U ta va byela, uku: A xitihwana xa mina xa hunza xiwunu xa dadani wa mina.

¹¹ Kota lezi dadani a nga wa mu binzisele hi minzhwalo yo tika, mina nzi ta engetela kutika loko. Dadani wa mina i lo mu tsayisa hi timhika, minake nzi ta mu tsayisa hi tihume.

¹² Zinghaho Jeroboamu ni vanhu vontlhe va lota ka Rehoboamu hi siku ga wunharu, khwatsi hi lezi a hosi yi nga wa leletele, yiku: Tlhelani mu wuya ka mina hi siku ga wunharu,

¹³ zonake a hosi yi lo hlamula vanhu hi tihanyi, yi tsika wusungukati ga madota.

¹⁴ Yi lo va byela a timhaka leti ti wulilweko hi majaha, yiku: A raru wa mina i tikisile muyoka wa nwina, kanilezi mina nzi ta hunzeleleta ku wu tikisa; a raru wa mina i wa mu tsayisa hi timhika, kanilezi mina nzi ta mu tsayisa hi tihume.

¹⁵ Zinghaho a hosi a yi ingisangi a timhaka ta vanhu, hakuva i kungo gi nga wa longisilwe hi Jehova, kasi ku fela ku maheka lezi a zi wulileko hi nomu wa Ahija a muXiloni ka Jeroboamu nʼwana Nebate.

Kuavanyiswa ka mufumo.

¹⁶ Laha vontlhe va ka Israeli vanga wa wonile lezaku a hosi a yi va ingisangi, a vanhu va lo hlamula hosi, vaku: Hi na ni xiavelo muni na Davida ke? Hina a hi na tshomba ni nʼwana Jese! Va ka Israeli, fambani matendeni ya nwina! Wena Davida, cuwuka a yindlu ya wena nwinyi! Zinghaho a va ka Israeli va lo tlhelela matendeni yabye.

¹⁷ Kanilezi a vanana va ka Israeli lava va nga wa akile mitini ya ka Juda va lo fumelwa hi Rehoboamu.

¹⁸ Zonake hosi Rehoboamu i lo rumela Adorama, loyi a nga hi nduna ya mitiro, kanilezi a va ka Israeli va lo mu gandla hi maribye afa. Zonake hosi Rehoboamu i lo hatlisa a ya khilela a kareta yakwe a tsutsumela Jerusalema.

¹⁹ Zinghaho a va ka Israeli va lo hluwuka a yindlu ya ka Davida kala legi siku.

²⁰ Makunu laha vontlhe va ka Israeli va ngazwa lezaku Jeroboamu i wuyile, va lo mu vitanisa a kuta lomu mutlhanganweni, zonake va lo mu yimisa a kuva hosi ka vontlhe va ka Israeli. A nyangwa ya ka Juda yona yoce yi lo lanzela a yindlu yo Davida.

A xiprofeto xa Xemaia.

²¹ Makunu laha Rehoboamu a nga wa chikele le Jerusalema, i lo tsombanyisa yontlhe yindlu ya ka Juda, ni lixaka la ka Benjamini; vontlhe va wa hi 180,000 wa vavanuna va hlomileko a ku yalwa ni yindlu ya ka Israeli, kasi va fela ku tlhelisela mufumo ka Rehoboamu, nʼwana Solomoni a kuva a va fumela.

²² Kanilezi a gezu ga Jehova gi lota ka Xemaia, a munhu wa Nungungulu, gi taku:

²³ Byela Rehoboamu nʼwana Solomoni, a hosi ya ka Juda, ni yontlhe yindlu ya ka Juda ni ya Benjamini, ni vontlhe vanhu, uku:

²⁴ Jehova i ngalo: Mu nga kanzihi mu yalwa ni vanakuloni, a vanana va ka Israeli, Tlhelani, munwe ni munwani a ti yela ndlwini yakwe, hakuva a mhaka leyi yita hi ka mina. Zinghaho va lo ingisa a gezu ga Jehova, va tlhela va famba kota kuwula kakwe.

Jeroboamu a maha marole ya nzalama.

²⁵ Jeroboamu i lo aka le Xekemi, le xitsungeni xa ka Efraime, a tshama laho; a tlhela a rura laho, a ya aka le Penueli. Gen. 32:30

²⁶ Zonake Jeroboamu i te ngalo lomu mbilwini yakwe: Makunu a mufumo wu nga tlhelela ndlwini ya Davida;

²⁷ hakuva loku a vanhu va kanziha va ya nyikela a miphahlelo le ndlwini ya Jehova le Jerusalema, a timbilu tabye ti ta tlhelela ka Rehoboamu a hosi ya ka Juda, va nzi vukela va nzi daya.

²⁸ Hikwalaho a hosi yi lo tsema xikungo, yi nyekisa nzalama yi maha marole mambiri, yiku ka vanhu va vakwe: Kale na mu khiringela a pfhuka woya Jerusalema, wena Israeli; a vanungungulu lava va mu humesileko tikweni ga Gipite hi lava! Ekso. 32:4, 8

²⁹ I lo yimisa ginwe le Beteli, a ginwani a gi yimisa le Dani.

³⁰ Lezo zi lo maha xionho, hakuva a vanhu va lo ya khozela mahlweni ka marole hambu ni le Dani. Ekso. 20:4

³¹ I lo aka tiyindlu lomu matshanwini ma tlakukileko a yimisa vapristi va humelako matlhelweni wontihe ya tiko, va nga hiko vana va ka Levi.

³² Hi hweti ya wu 8, hi siku ga 15, Jeroboamu i lo maha mubuzo wu fananako ni lowu wu mahiwako le tikweni ga ka Juda, a nyikela miphahlelo laha alatini. I lo maha zalezo kambe le Beteli, a nyikela miphahlelo ka marole lawo a ma mahileko. Zonake i lo veka vapristi le Beteli ka wutshamu gi tlakukileko legi a gi akileko. Levi 23:34

³³ I lo kanziha alatini legi a gi akileko le Beteli hi siku ga 15 ga hweti ya wu 8, leyi a yi hlawulileko hi kuranza kakwe; i lo yimisela a vanana va ka Israeli a mubuzo, a kanziha alatini a ku ya hisa libani.