1 Tihosi 11 - Tshwa Bible

Zihambunyeto za Solomoni.

¹ Makunu hosi Solomoni i lo ranza vavasati vo tala va manwani matiko zinwe na nwaFaro; a vavasati va maMoabi, ni va maAmoni, ni va maEdomi, ni va maSidoni, ni va maHiti;

² a vavasati va matiko lawa Jehova a nga byela a vanana va ka Israeli, aku: Mu nga engheni xikari ka vona, vonawu va nga engheni xikari ka nwina, hakuva hakunene va ta hambukisa a timbilu ta nwina ti lanzela vanungungulu vabye. Va nga lavo Solomoni a namareleko kabye hi liranzo. Ekso. 34:16; Deut. 7:3; 17:17

³ I wa hi ni 700 wa vasati, a vanana va tihosi, ni 300 wa mindlukulu; a vasati lavo vakwe va lo hambukisa a mbilu yakwe.

⁴ Hakuva laha Solomoni a nga wa khosahele, a vasati vakwe va lo hambukisa a mbilu yakwe yi lanzela vanwani vanungungulu; zonake a mbilu yakwe yi wa nga mbhelelangi yontlhe ka Jehova Nungungulu wakwe, kota a mbilu ya raru wakwe Davida.

⁵ Hakuva Solomoni i lo ya khozela Axtarte, a nungungulu wa maSidoni, ni Milkome, a manyala ya va ka Amoni.

⁶ Solomoni i lo maha lezi zi bihileko mahlweni ka Jehova; a nga ha lanzelangi khwatsi Jehova, kota a raru wakwe Davida.

⁷ Zonake Solomoni i lo aka a ganzelo ga Kemoxe, a manyala ya maMoabi, ni ginwe ga Moloki, a manyala ya vanana va ka Amoni, le wutshanwini gi tlakukileko le xitsungeni lexi xi cuwukeneko ni Jerusalema. Mitse. 21:29

⁸ Zinghaho i lo maha zalezo ka vontlhe vasati vakwe va matiko, lava va hisako tibani ni ku phahlela ka vanungungulu vabye.

⁹ Zonake Jehova i lo zangarela Solomoni, hakuva a mbilu yakwe yi wa fularele Jehova Nungungulu Wa ka Israeli, loyi a nga wa wonekile ka yena zikhati zimbiri,

¹⁰ a mu leletela ku fularela vanwani vanungungulu; kanilezi cima a nga hlayisangi kuleletela ka Jehova.

¹¹ Zonake Jehova i te ngalo ka Solomoni: Kota lezi u mahileko lezo, u nga hlayisangiko a xivumelwano xa mina, ni milayo ya mina leyi nzi ku leleteleko yona, nzi ta ku wutlela mufumo nzi wu nyikela ka nanza ga wena. 1 Sam. 15:28

¹² Ntsena lezaku nzi nga ta zi maha kuhanyeni ka wena hi kota ya Davida a raru wa wena; kanilezi nzi ta wu wutla mandleni ya nʼwana wa wena.

¹³ Hambu lezo, cima nzi nga ta wutla wontihe mufumo; nzi ta siyela a nʼwana wa wena a nyangwa yinwe, hi kota ya nanza ga mina Davida ni Jerusalema legi nzi gi hlawulileko.

Kuhluwuka ka Edomi na Siria.

¹⁴ Jehova i lo vuxa a nala wa Solomoni, Hadade a muEdomi, loyi a nga wa hi wa lixaka la tihosi ta va ka Edomi.

¹⁵ Hakuva a xikhatini lexo Davida a ngalwa ni va ka Edomi, Joabe a nduna ya yimpi i lo kanziha ku ya lahla lava va nga wa delwe, i lo hlasela vontlhe vavanuna lava va nga wa hi Edomi.

¹⁶ Hakuva Joabe ni vontlhe va ka Israeli va lo ya tshama kona 6 wa tihweti, kala a lovisa vontlhe vavanuna va Edomi.

¹⁷ Hadade i wa tsutsumele le Gipite zinwe ni vanwani va ka Edomi, lava va nga wa hi malanza ya raru wakwe. Hadade yena i wa ha hi tsongwani.

¹⁸ Vona va lo suka hi le Midiani vaya le Parani; laho va lo teka a vanhu va le Parani vaya le Gipite ka Faro, a hosi ya le Gipite. Faro i lo mu nyika a yindlu, a mu phamela, a mu nyika ni tiko.

¹⁹ Hadade i lo kuma thomo ga hombe mahlweni ka Faro, a mu nyika a makabye wa sati wakwe, a makabye wa muzinza Tahpenesi a kuva sati wakwe.

²⁰ A makabye loye wa Tahpenesi i lo mu belekela nisanyana Genubate loyi Tahpenesi a nga mu lumulela ndlwini ya Faro; Genubate i lo wundliwa ka Faro xikari ka vanana va Faro.

²¹ Makunu laha Hadade a nga wa hi le tikweni ga Gipite, i lozwa lezaku Davida i etlele ni vararu vakwe, ni lezaku Joabe a nduna ya yimpi i file, yena i te ngalo ka Faro: Nzi vumele nzi famba tikweni ga mina.

²² Zonake Faro i te ngalo kakwe: Xini u xi vumalako laha ka mina, ko kala u lava ku famba tikweni ga wena ke? Yena a hlamula, aku: A nzi vumali nchumu, kanilezi nzi tsike nzi famba.

²³ Nungungulu i lo vuxa munwani nala wa Solomoni, Rezoni nʼwana Eliada, loyi a nga wa chavile a hosi yakwe Hadadezera, a hosi ya le Zoba.

²⁴ Laha Davida a nga dele a vanhu va le Zoba, Rezoni i lo tsombanyisa vanhu a maha nduna ya ntlawa. Vona va loya le Damasku va ya aka kona, va gi fumela.

²⁵ Yena i lo maha nala wa va ka Israeli wontihe masiku ya wutomi ga Solomoni, a engetela kubiha ka Hadade. Yena i lo nyenya va ka Israeli; i lo fumela a tiko ga maSiria.

Jeroboamu.

²⁶ Yenawu Jeroboamu nʼwana Nebate, a muEfraime wa le Zereda, a nanza ga Solomoni, (a mamani Wakwe a nga hi Zerua, a noni,) yena i lo hluwuka ka hosi.

²⁷ A xigelo xa kuvukela kakwe a hosi, hi lexi: Solomoni i wa kari a aka a khokhola ga Milo, na a lulamisa ligingisi la muti wa raru wakwe Davida.

²⁸ Makunu Jeroboamu i wa hi nhenha. Solomoni i lo wona kupangama ka jaha lego, a mu yimisa a kuva muhlayisi wa vontlhe vatiri va yindlu ya ka Josefa.

²⁹ Xikhatini xwalexo Jeroboamu i lo huma Jerusalema na a ambele a nguwo yiswa, a ya tlhangana na muprofeti Ahija a muXiloni laha ndleleni; ku wa hi vona voce lomo koveni.

³⁰ Zonake Ahija i lo khoma a nguwo leyo ya yiswa yi nga ambelwe hi Jeroboamu, a yi hanzula a maha 12 wa mavemba,

³¹ aku ka Jeroboamu: Teka khume legi ga mavemba, hakuva hi lezo a wulako Jehova Nungungulu wa ka Israeli, aku: Nzi ta wutla a mufumo wa va ka Israeli mandleni ya Solomoni, nzi ku nyika a khume ga tixaka.

³² Kanilezi yena i ta sala ni lixaka linwe hi kota ya nanza ga wena Davida ni Jerusalema, a muti nzi wu hlawuleko xikari ka tontlhe tixaka ta ka Israeli,

³³ Nzi ta maha lezo hakuva va nzi fularele va khozela mahlweni ka Axtarte, a nungungulu wa maSidoni, ni mahlweni ka Kemoxe, a nungungulu wa maMoabi, ni mahlweni ka Milkome, a nungungulu wa va ka Amoni: a va fambangi hi tindlela ta mina ta kuva va maha kululama mahlweni ka mina, ni ku hlayisa milayo ya mina, ni zileletelo za mina, khwatsi hi lezi a mahileko a raru Wakwe Davida.

³⁴ Nzi nga ta teka wontihe mufumo mandleni yakwe, hakuva nzi ta yimisa a mufumo wakwe wontihe masiku ya kuhanya kakwe, hi kota ya nanza ga mina Davida loyi nzi mu hlawulileko, loyi a nga hlayisa a milayo ya mina ni zileletelo za mina.

³⁵ Kanilezi nzi ta susa a mufumo lomu mandleni ya nʼwana wakwe nzi ku nyika a khume ga tinyangwa.

³⁶ A nʼwana wakwe nzi ta mu nyika a nyangwa yinwe, kasi a nanza ga mina Davida a fela kuva ni kandiya mahlweni ka mina lomu Jerusalema, a muti lowu nzi wu hlawulileko a ku veka a vito ga mina ka wona.

³⁷ Mina nzi ta ku teka u fumela zontlhe kota kuxuva ka mbilu ya wena, uva hosi ya va ka Israeli.

³⁸ Loku u ingisa zontlhe lezi nzi ta nga ku leletela zona, u famba hi tindlela ta mina, u maha kululama mahlweni ka mina, ni ku hlayisa milayo ya mina ni zileletelo za mina, khwatsi hi lezi a nanza ga mina Davida a nga wa maha, mina nzi tava zinwe na wena; nzi ta ku akela a yindlu yi tiyileko khwatsi hi lezi nzi akeleko Davida, ni kuva nzi ku nyika Israeli.

³⁹ A ka lexi xikhati nzi ta tsongahata a pswalo wa Davida, kanilezi a hi kala kupinzuka.

⁴⁰ Hikwalaho Solomoni i lo hlota ku daya Jeroboamu, kanilezi Jeroboamu i lo chavela le Gipite ka Xixaka a hosi ya le Gipite. I lo tshama leyo Gipite kala siku ga kufa ka Solomoni.

⁴¹ Makunu a zinwani zimaho za Solomoni, ni wutlhari gakwe, zi tsalilwe lomu bhukwini ga Zimaho za Solomoni.

⁴² Solomoni i lo fumela vontlhe va ka Israeli 40 wa malembe.

⁴³ I lo etlela zinwe ni vararu vakwe; i lo lahliwa lomu mutini wa dadani wakwe Davida; zonake a nʼwana wakwe Rehoboamu i lo teka xikhundla xakwe.