1 Samueli 7 - Tshwa Bible

¹ A vanhu va le Kiriate-Jearime va lo ta teka arke ga Jehova va famba nago, va ya gi enghenisa lomu ndlwini ya Abinadaba le xitsungeni. A mufana wakwe Eleazare i lo basiselwa a ntiro wa ku hlayisa a arke ga Jehova.

² A arke gi lo tshama le Kiriate-Jearime xikhati xa hombe nguvu, kala ku mbhela 20 wa malembe, na yontlhe yindlu ya ka Israeli yi kari yi rilela Jehova. Samueli a maha mulamuli wa ka Israeli.

³ Zonake Samueli i lo wulawula ka yontlhe yindlu ya ka Israeli, aku: Loku nwina mu xuva ku tlhelela ka Jehova hi timbilu ta nwina tontlhe, susani xikari ka nwina a vanungungulu va matiko ni maAxtarte, mu tiyisa timbilu ta nwina ka Jehova, mu khozela yena yece; hi kona a ta nga mu tlhatlhisa mandleni ya vaFilistia. Deut. 6:4; Mat. 4:10; Lu. 4:8

⁴ Zonake a va ka Israeli va lo susa maBaali ni maAxtarte va khozela Jehova yece.

⁵ Samueli i te ngalo: Tsombanyisani vontlhe va ka Israeli le Mizpa, zonake nzi ta mu kombelela ka Jehova.

⁶ Va lo tsombana le Mizpa, vakha mati va ma cheletela mahlweni ka Jehova. Va lo yila va ngagi nchumu siku lego, vaku: Hi gohele Jehova! Samueli i lo lamula a vanana va ka Israeli le Mizpa.

⁷ Makunu laha a vaFilistia va ngazwa lezaku a va ka Israeli va tsombene le Mizpa, a tihosi ta vaFilistia ti lo kanziha a ku yalwa ni va ka Israeli. Laha a va ka Israeli va ngazwa lezo, va lo rurumela va chava vaFilistia.

⁸ A va ka Israeli vaku ka Samueli: U nga gumesi ku hi kombelela ka Jehova Nungungulu wa hina, kasi a fela ku hi ponisa mandleni ya vaFilistia.

⁹ Samueli i lo teka a xiyivana xa ha anwako, a xi nyikela xontlhe xi maha munyikelo wa kuhiswa ka Jehova. Zonake Samueli i lo khongelela va ka Israeli ka Jehova, na Jehova i lo mu hlamula.

¹⁰ Khwatsi hi lezi Samueli a nga ha maha munyikelo wa kuhiswa, a vaFilistia va lo tshinela ku talwa na Israeli. Kanilezi Jehova i lo maha tilo gi dzinza nguvu hi ntamu hehla ka vaFilistia, a va vilinganyisa, va hluliwa hi va ka Israeli.

¹¹ A va ka Israeli va lo huma hi le Mizpa va hlongola vaFilistia, va va hlasela kala va chikela le hasi ka Beti-Kare.

¹² Zonake Samueli i lo teka a ribye a gi yimisa xikari ka Mizpa ni Xena, a gi chula vito ga Ebenezer, aku: Kala ni lezi Jehova i hi vunetele.

¹³ Zinghaho a vaFilistia va lo hluliwa. Cima a va engetangi kambe vata tikweni ga ka Israeli, hakuva a canja ga Jehova gi wa vukela vaFilistia ka wontihe masiku ya Samueli.

¹⁴ A miti leyi yi nga wa tekilwe hi vaFilistia, yi tlhelela ka va ka Israeli, kusukela le Ekroni kala le Gati, Israeli i lo tlhatlhisa a matikwana lawo mandleni ya vaFilistia. Kanilezi ku wa hi kona kurula xikari ka va ka Israeli ni maAmori.

¹⁵ Samueli i lo lamula Israeli wontihe masiku ya wutomi gakwe.

¹⁶ Lembe ni lembe Samueli i wa Suka a renzelekela aya Beteli, ni le Gilgali, ni le Mizpa, a famba a lamula va ka Israeli mitini leyo yontlhe.

¹⁷ Zonake a wuya kaya kakwe le Rama; hi kwaleyo a nga wa tshama kona a lamula Israeli. I wa akile a alati ga Jehova leyo.