1 Samueli 5 - Tshwa Bible

A arke ga Jehova lomo tempeleni ya Dagoni.

¹ Loku vaFilistia va tekile a arke ga Nungungulu, va lo gi susa le Ebenezera va gi yisa le Axdode,

² va gi enghenisa lomu tempeleni ya Dagoni, va gi veka kusuhani na Dagoni. Vala. 16:23

³ Makunu hi siku gi gamelako, a vanhu va le Axdode va lo vuka ni mixo, va wona Dagoni na a wile lahasi hi nghohe yakwe mahlweni ka arke ga Jehova; va lo teka Dagoni va mu veka wutshanwini gakwe.

⁴ A siku gi lanzelako, a vanhu va le Axdode va lo vuka kambe ni mixo va wona Dagoni na a wile hi nghohe yakwe mahlweni ka arke ga Jehova; a hloko ya Dagoni ni mandla yakwe zi wa tsemekile, na zi hi laha xipimbitsini xa nyangwa, na ku sele miri woce.

⁵ Hikwalaho a vapristi va Dagoni ni vontlhe lava va enghenako lomu tempeleni ya Dagoni, a va kanziheli xipimbitsi xa yindlu ya Dagoni le Axdode kala ni lezi.

⁶ Kanilezi a canja ga Jehova gi wa tsimbeketa a vanhu va le Axdode; a va lamata hi zidlayi, ni vanhu va matlhelo ya kona.

⁷ Laha a vanhu va le Axdode va nga wonile lezo, va te ngalo: Hi nga tshami ni arke ga Nungungulu wa ka Israeli, hakuva a canja gakwe ga hi tsimbeketa nguvu, gi tsimbeketa ni nungungulu wa hina Dagoni.

⁸ Zonake va lo ruma vanhu a ku ya ramba tontlhe tihosi ta vaFilistia, va taku: Hi ta maha yini hi arke ga Nungungulu wa ka Israeli? Vona vaku ngalo: A arke ga Nungungulu wa ka Israeli a gi heleketwe le Gati. Va lo rwala a arke ga Nungungulu wa ka Israeli, va gi heleketa leyo.

⁹ Laha na va gi heleketile, a canja ga Jehova gi lo vukela a muti; ku lo humelela a khombo ga hombe gi riza a vanhu va muti, a vatsongwani ni vahombe, va pomelwa hi zidlayi mimirini yabye.

¹⁰ Zonake va lo rumela a arke ga Nungungulu le Ekroni. Kanilezi a arke ga Nungungulu gi nga wa enghenile le Ekroni, a vanhu va kona va rila, vaku: Va hi nehele a arke ga Nungungulu wa ka Israeli kasi ku ta hi daya ni vanhu va hina.

¹¹ Va lo rumela a vanhu ku ya tsombanyisa tihosi tontlhe ta vaFilistia, vaku ngalo: Tlhelisani a arke ga Nungungulu wa ka Israeli giya kaya ka gona, gi nga hi mbheta ni vanhu va hina. Hakuva ku wa hi ni nyenganyenga ka wontihe muti; hi lezi a canja ga Jehova gi nga tshingile nguvu.

¹² A vanhu lava va nga kala va nga sefa, va wa xaniswa hi zidlayi, ni nkosi wa muti wu lo tlakukela tilweni.