1 Samueli 28 - Tshwa Bible

¹ Masikwini lawo a vaFilistia va lo hlomisa tiyimpi tabye a ku ya vukela va ka Israeli. Makunu Akixi i te ngalo ka Davida: Zi tive khwatsi lezaku wena u ta famba na mina hi yalwa ni va ka nwina.

² Davida i te ngalo ka Akixi: Hakunene u ta zi wona khwatsi lezi zi ta nga mahiwa hi nanza ga wena. Akixi aku ka Davida: Hi zona, mina nzi ta ku yimisa a kuva muhlayisi wa hloko ya mina xontlhe xikhati.

Saule ni wasati wa le Endora.

³ Makunu lexo xikhati Samueli i wa file, ni vontlhe va ka Israeli va wa mu rilile, va mu lahla le Rama lomu mutini wakwe. Saule i wa hlongole vamandiki ni zitumbe lomu tikweni. Ekso. 22:18; Levi 19:31

⁴ A vaFilistia va lo tsombana va ya gova le Xunemu. Saule i lo hlomisa va ka Israeli, va ya gova le Gilboa.

⁵ Laha Saule a nga wa wonile a mabutho ya vaFilistia, i lo chava, a mbilu yakwe yi rurumela nguvu.

⁶ Saule i lo wutisa Jehova, kanilezi Jehova a nga mu hlamulangi nchumu, hambu ni kulora, hambu ni Urima, ge hambu vaprofeti. Ekso. 28:30; Mitse. 12:6

⁷ Zonake Saule i te ngalo ka malanza yakwe: Nzi laveleni wasati loyi a zi tivako ku vumbula vakufa, kasi nza fela kuya kakwe nzi ya mu wutisa. A malanza yakwe ma te ngalo kakwe: I kona wasati loyi a zi kotako ku vumbula vakufa le mutini wa Endora.

⁸ Saule i lo ti hunzula a ti maha kota munwani munhu, a ambala tinwani tinguwo, a famba ni vavanuna vambiri. Va lo chikela ka wasati ni wusiku. Saule aku: Hi nga nzi hlahluva, u nzi vumbulela loye nzi ta nga ku byela.

⁹ A wasati i te ngalo kakwe: Languta, Wena wa zi tiva lezi Saule a mahileko, lezaku i lovisile lomu tikweni lava Va zi kotako ku vumbula a vakufa, hi zitumbe. Hi kuyini u nzi vekela a ziyo wutomini ga mina?

¹⁰ Saule i lo hlambanya ha Jehova, aku: Nzi hlambanya ha Jehova a hanyako, cima ku nga ta humelela mhango hi mhaka leyi.

¹¹ Zonake a wasati i te ngalo kakwe: Nzi ku vumbulela mani? Yena aku: Nzi vumbulele Samueli.

¹² Laha a wasati a nga wonile Samueli, i loba huwa hi gezu ga hombe, a wuya aku ka Saule: U nzi khohlisela yini? Wena u Saule!

¹³ A hosi yiku kakwe: U nga chavi! Kanilezi xini u xi wonako? A wasati i te ngalo ka Saule: Nzi wona munwani mingungulu na a suka hi laha misaveni a kanziha.

¹⁴ Saule aku kakwe: Ngwa dzumba muni? Yena aku: Xikhosana xa kale xi humako na xi ambele a nguwo yo leha nguvu. Saule i lo zi tiva lezaku hi Samueli, i lo korama lahasi hi, nghohe yakwe a nyika xichavo.

¹⁵ Samueli i te ngalo ka Saule: Hi kuyini u nzi karata hi ku nzi vuxa ke? Saule i te ngalo kakwe: Hilezi nzi le mhangweni ya hombe nguvu, hakuva a vaFilistia va nzi hlomele, kanilezi Nungungulu i sukile ka mina, a nga ha nzi hlamuli nchumu, hambu ni vaprofeti, hambu ni miloro. Hikwalaho nzi ku vitanile kasi wena wa fela kuta nzi tivisa lezi nzi faneleko ku maha.

¹⁶ Samueli i te ngalo: Makunu u nzi wutisela yini na u wona lezaku Jehova i sukile ka wena a tlhela a maha nala wa wena?

¹⁷ Jehova i mahile ka wena khwatsi hi lezi a wulileko hi nomu wa mina. Jehova i wutlile wukosi ga wena a gi nyikela ka muakelane wa wena, a nga Davida.

¹⁸ Hakuva wena a ku ingisangi a gezu ga Jehova, a ku mahangi khwatsi ka vaAmaleki hi lezi a nga wa zangarisile zona; hikwalaho Jehova i mahile lezi ka wena nyamutlha.

¹⁹ Ni kambe Jehova i ta nyikela va ka Israeli na wena, lomu mandleni ya vaFilistia. Manziko wena ni vana Va wena mu tava zinwe na mina. Jehova i ta nyikela a yimpi ya ka Israeli mandleni ya vaFilistia.

²⁰ Zonake hi gezu lego, Saule i lowa lahasi aku naswa, hakuva a timhaka ta Samueli ti lo mu chavisa nguvu, hikwalaho cima i wa nga ha hi na ntamu, hilezi i wa nga ngagi nchumu gontlhe siku ni wusiku ga kona.

²¹ A wasati i lota ka Saule, a ta wona lezaku wa chava nguvu, aku kakwe: Languta, a nanza ga wena gi ingisile a gezu ga wena, nzi nyikela wutomi ga mina mhangweni, nzi ingisa a timhaka leti u nzi byelileko tona. Vala. 12:3; Tis. 119:109

²² Makunu nza kombela lezaku u ingisawu a gezu ga nanza ga wena, uga kasi wa fela ku kuma ntamu wa ku famba a ndlela ya wena.

²³ Kanilezi yena i lo ala, aku: A nzi zi lavi kuga. Kanilezi a malanza yakwe zinwe ni wasati va lo mu kurumeta; i lo ingisa gezu gabye. Hilezo i lo suka a tshama laha mubhedini.

²⁴ A wasati i wa hi ni role go nona; i lo hatlisa a gi daya, a teka ni mapa a ma vuva, a bhika zibaba zi nga comelwangiko.

²⁵ I lo zi neha mahlweni ka Saule ni malanza yakwe, va taga. Zonake va lo suka va famba gona wusiku lego.