1 Samueli 27 - Tshwa Bible

Davida a aka xikari ka vaFilistia.

¹ Zonake Davida i lo alakanya mbilwini yakwe, aku: Ginwani siku nzi ta kala nzi dawa hi Saule; ku hava yinwani ndlela, ahandle ko tsutsumela tikweni ga vaFilistia, kasi Saule a fela ku kala a nga ha nzi hloti lomu tikweni gontlhe ga ka Israeli; zonake nzi ta pona canjeni gakwe.

² Davida i lo suka ni vanhu vakwe va 600 wa vavanuna vaya ka Akixi nʼwana Maoke a hosi ya le Gati.

³ Davida i lo tshama na Akixi le Gati, zinwe ni vanhu vakwe, loyi ni loyi i wa hi ni ngango wakwe. Yenawu Davida i wa hi ni vasati vakwe va vambiri, Ahinoame a muJezreeli, na Abigaili a sati wa Nabali wa le Karmeli.

⁴ Zonake ku lo ya byelwa Saule lezaku Davida i chavele le Gati, na yena a nga ha engetangi kambe a mu hlota.

⁵ Davida i te ngalo ka Akixi: Loku mina nzi kumile thomo mahlweni ka wena, a va nzi nyike wutshamu ka munwe wa miti ya le handle nzi aka ka wona. Xana a nanza ga wena gi ta akela yini lomu mutini wa wena wa zinza ke?

⁶ Zonake Akixi i lo nyikela Ziklagi lego siku; hikwalaho Ziklagi i lo lumba tihosi ta ka Juda kala legi siku.

⁷ A tsengo wa masiku lawa Davida a nga tshama lomo tikweni ga vaFilistia, ku wa hi lembe ginwe ni mune wa tihweti.

⁸ Davida zinwe ni vanhu vakwe va lo kanziha va ya maha xijumani le Gexura, ni le Girze, ni le ka maAmaleki, hakuva a matiko lawo ma wa hi ni vanhu lava va nga wa akile kale hi tlhelo ga le Xura, kala le tikweni ga le Gipite.

⁹ Davida i lo hlasela a tiko lego, a daya vavanuna ni vavasati, a teka a zifuyo, ni timbongola, ni makameli, ni tinguwo, zonake a tlhelela ka Akixi.

¹⁰ Makunu loku a mu wutisa, aku: Mu wa loya hlasela kwihi nyamutlha? Davida i te ngalo: Hi loya hlasela le Dzongeni ga le Juda, ni le Dzongeni ga le Jerameeli, ni le Dzongeni ga le ka maKeni.

¹¹ Davida a nga siyangi ni munwe wo hanya, xikari ka vavanuna ni vavasati kasi ku ta bika ha yena le Gati, hakuva i wa chava lezaku va ta mu hleva, vaku: Davida i mahile lezi ni lezi. Hikwalaho i wa tolovela ku maha lezo xontlhe xikhati lexi a nga tshama tikweni ga vaFilistia.

¹² Kanilezi Akixi i wa mu tsumba Davida, aku: Yena i maha a nzhukano leyo ka va ka Israeli vabye hi lezi va mu swirako, kanilezi ka mina i ta simamisa a maha nanza ga mina xontlhe xikhati.