1 Samueli 25 - Tshwa Bible

Davida na Abigaili.

¹ Samueli i lofa, zonake vontlhe va ka Israeli va lo tsombana va mu rila, va mu lahla kaya kakwe le Rama. Zonake Davida i lo suka a relela aya le xiwuleni xa Parani.

² Le Maone ku wa hi ni munhu loyi a pfuno wakwe wu nga wa hi le Karmeli. A munhu loye i wa pfunile nguvu; i wa hi ni 3,000 wa tiyivu, ni 1,000 wa timbuti; i wa hi kwaleyo Karmeli a kaya tiyivu takwe.

³ A vito ga munhu loye i wa hi Nabali, ni vito ga sati wakwe i wa hi Abigaili. A wasati loye i wa hi ni kupima, na a sasekile; kanilezi a nuna wakwe i wa munhu wa matloti ni tihanyi, na hi wa yindlu ya ka Kalebi.

⁴ Laha Davida a nga wa hi le xiwuleni, i lozwa lezaku Nabali wa kaya a woya ga tiyivu takwe.

⁵ Zonake Davida i lo ruma a khume ga majaha, aku kabye: Kanzihani muya Karmeli ka Nabali, mu ya mu losetela vitweni ga mina.

⁶ Mu mu byela ku ngalo: Hanya khwatsi! A kurula a kuve na wena, zinwe ni yindlu ya wena, ni zontlhe lezi zi nga za wena!

⁷ Makunu nzi zwile lezaku u na ni vakayi va wena. A varisi va wena va wa hi zinwe na hina, cima a hi va karatangi, vonawu a va lahlekelwangi hi nchumu ka xontlhe xikhati lexo va nga wa hi Karmeli.

⁸ Wutisa malanza ya wena ma ta ku byela. Hikwalaho ngha majaha lawa ma kuma thomo mahlweni ka wena, kota lezi hi tako hi siku gi nene. Nyika malanza ya wena ni nʼwana wa wena Davida lezo u ta nga zi kuma lomu canjeni ga wena.

⁹ A majaha ya Davida ma lo ya chikela ma hlawutela Nabali a timhaka tontlhe ta Davida, ma gumesa.

¹⁰ Nabali i lo hlamula malanza ya Davida, aku: Xana himani Davida? Himani nʼwana Jese? Masiku lawa ma tele malanza ma pfowolako ka venyi va wona!

¹¹ Ina nzi nga teka zibaba za mina, ni mati ya mina, ni nyama ya mina, lezi nzi longiseleko vakayi va mina, nzi nyika a vanhu lava nzi nga va tiviko lomu va humako kona ke?

¹² A majaha ya Davida ma lo tlhela ma ya hlawutela Davida tontlhe timhaka leto.

¹³ Zonake Davida i te ngalo ka vanhu vakwe: A munwe ni munwani a ti bohe a supado yakwe! Zonake vontlhe va lo hloma; yenawu Davida i lo hloma. Va wa hi 400 wa vavanuna; va lo kanziha naye. Kanilezi ku wa sele 200 wa vavanuna nhunzwini.

¹⁴ Kanilezi a munwe wa malanza ya Nabali i lo ya hlawutela Abigaili a sati wa Nabali, aku: Davida i wa rumile mitsumi yita hi le xiwuleni ku ta losetela hosi ya hina, kanilezi i lo va zangarela.

¹⁵ Kanilezi a vanhu lavo va mahile khwatsi ka hina; cima a va hi karatangi, ni kambe a hi lahlekelwangi hi nchumu ka xontlhe xikhati lexo hi nga wa fambafamba navo a xikhati hi nga hi le kuriseni.

¹⁶ Vona va wa hi libhiyo la hina wusiku ni mumu, ka xontlhe xikhati lexo hi nga hi zinwe navo na hi kari hi risa zifuyo.

¹⁷ Hikwalaho zi tive u ehleketa lezi u ta nga maha, hakuva ku xubyiwa ku mahiwa mhango ka hosi ya hina ni yindlu yakwe yontlhe, kanilezi na a hi munhu wa tihanyi, loyi hi tsanzekako ku Wulawula naye.

¹⁸ Zonake Abigaili i lo hatlisa a teka mazana mambiri ya zibaba, ni tinghotso timbiri ta vinya, ni ntlhanu wa tiyivu ti bhikilweko, ni ntlhanu wa zirunzu za mavele ma wocilweko, ni zana ga zitata za tisote ta mauva ma womileko, ni mazana mambiri ya zikhekhetselo za makuwu, a zi tlhateka mbongoleni.

¹⁹ Zonake i te ngalo ka malanza yakwe: Rangani mahlweni nzi ta mu lanza. Kanilezi a nga mu byelangi nchumu a nuna wakwe Nabali.

²⁰ Laha a nga wa khilele a mbongola yakwe, na a ha relela hi le xitsungeni, a famba lomu ko khwela, i lo wona Davida ni vanhu vakwe na va relela ngomama naye, a tlhangana navo.

²¹ Makunu Davida i te ngalo: Hakunene nzi zi hlayisele mahala zontlhe lezi a munhu loyi a nga hi nazo le xiwuleni; cima a ku lahlekangi nchumu ka lezi a fuyileko. Makunu i tlhelisela kusasa hi kubiha.

²² Nungungulu a mahe hi mintamu ni kuengeta a ka valala va Davida, loku nzo siya wanuna munwe a hanyako ka zontlhe lezi a nga nazo, a kuceni ka mixo.

²³ Makunu laha Abigaili a nga wonile Davida, i lo hatlisa a chika mbongoleni yakwe, awa hasi hi nghohe yakwe mahlweni ka Davida, a korama lahasi.

²⁴ Zonake i lo khizama mikonzweni yakwe, aku: A nanzu lowu a wuve hehla ka mina, hosi yanga. Vumela a nanza ga wena gi wulawula ka wena, u ingisa a timhaka ta gona.

²⁵ Hosi yanga, u nga dzuki u khatalela loyi wa kubiha, a nga Nabali, khwatsi hi lezi gi nga lezo a vito gakwe, kunene hi Nabali hi zalezo a nga zona, ni wupumbu gi na yena. Kasike mina nanza ga wena a nzi ma wonangi a majaha lawo u ma rumileko.

²⁶ Hikwalaho, hosi yanga, nzi hlambanya ha Jehova ni muhefemulo wa wena, Jehova i ku valele a ku halata nkhata ni ku ti photela hi canja ga wena. Makunu a valala va wena ni lava va hlotako ku maha kubiha hi hosi ya mina, a va kote Nabali!

²⁷ Makunu a xinyikiwo lexi a nanza ga wena a xi nehileko ka hosi ya mina, ngha u nyika majaha lawa ma lanzelako a hosi ya mina.

²⁸ Tsetselela a nanza ga wena ka nanzu lowu, hakuva Jehova i ta tiyisa futsi a yindlu ya hosi ya mina, hakuva a hosi ya mina yilwa a yimpi ya ka Jehova, cima ni kubiha ku nga ta kumiwa ka wena ka wontihe masiku ya wena.

²⁹ Hambu loku munhu a suka a hlongolisa, a hlota wutomi ga wena, a wutomi ga hosi ya mina gi ta hlayiswa ha Jehova Nungungulu wa wena, gi bohiwa ka nyanza yinwe ni lava va hanyako; kasike a wutomi ga valala va wena gi ta cukumetiwa kule kota xinziwanziwani. Tis. 6:10; 31:21; 97:10

³⁰ Loku Jehova a mahele hosi ya mina lezi zo saseka a zi wulileko xungetano na wena, ni loku a ku yimisile a kuva hosi ya ka Israeli,

³¹ yi nga mahi mhaka ya ku ku hlokisa, yi maha xikhunguvanyiso mbilwini ya hosi ya mina, hambu ni ku halata nkhata ahandle ka nanzu, kutani ku ti photela wutsumbu ga yona. Kanilezi loku Jehova a katekisile a hosi ya mina, u ta alakanya a nanza ga wena.

³² Davida i te ngalo ka Abigaili: A ku bongiwe Jehova Nungungulu wa ka Israeli, loyi a ku rumileko nyamutlha ku ta nzi khinga!

³³ Kambe ngha ku bongiwa ni kupima ka wena, u bongiwa na wena loyi u nga ta nzi valela legi siku lezaku nzi nga halati nkhata, nzi ti photela hi canja ga mina.

³⁴ Loku ku wa nga hi lezi Jehova Nungungulu wa ka Israeli a nga nzi valela ku ta ku mahela za kubiha, nzi hlambanya hi Jehova a hanyako, loku u wa nga hatlisangi ku ta nzi khinga, ngha ku nga salangi na nchumu ka Nabali, hambu ni munhu munwe wa xinuna, na gambo gi nga se huma.

³⁵ Zinghaho Davida i lo amukela lezi a nga wa mu nehele, aku kakwe: Tlhela hi kurula uya ndlwini ya wena. Nzi zwile a gezu ga wena nzi ingisa xikombelo xa wena.

³⁶ Abigaili i lo chikela ka Nabali a ya mu kuma na a maha mubuzo lomu ndlwini yakwe wo fanana ni mubuzo wa hosi. A mbilu ya Nabali yi wa tangele, na popilwe nguvu; kanilezi a nga mu byelangi nchumu kala gica ni mixo.

³⁷ Zonake ni mixo, laha Nabali a nga wa kalamukile, a sati wakwe i lo mu hlawutela timhaka leti, zonake a mbilu yakwe yi lo mbhela ntamu, yi fanana ni ribye.

³⁸ Anzhako ka khume ga masiku, Jehova i loba Nabali afa.

³⁹ Laha Davida a nga zwile lezaku Nabali i file, i te ngalo: A ku bongiwe Jehova loyi a nga vikela a mhaka ya mina le ka nanza gakwe a ku maha kubiha. Jehova i tlhelisele a kubiha ka Nabali hlokweni ya yena nwinyi. Zonake Davida i lo ruma a vanhu ka Abigaili a ku ya mu wutela yena.

⁴⁰ Laha a malanza ya Davida ma nga wa chikele ka Abigaili le Karmeli, ma lo mu byela maku: Davida i hi rumele ka wena kasi ku ta ku teka u ya maha sati wakwe.

⁴¹ Yena i lo suka a koramisa wutsumbu gakwe, aku: Languta, a nanza ga wena gi tava nanza ga ku hlaza mikonzo ya malanza ya hosi yanga.

⁴² Zonake Abigaili i lo hatlisa ku suka a khilela mbongola, a lanzelwa hi ntlhanu wa vanhanyana. I lo lanzela mitsumi ya Davida, a ya maha sati wakwe.

⁴³ Davida kambe i wa tekile Ahinoame wa le Jezreeli, hi wumbiri gabye va wa hi vasati vakwe.

⁴⁴ Kanilezi Saule i wa sina a nyikele Mikali a nʼwana wakwe loyi a nga wa hi sati wa Davida, ka Palti nʼwana Laixa wa le Gallima.