1 Samueli 24 - Tshwa Bible

Davida a ala ku daya Saule

¹ Laha Saule na wuyile hi le ko hlongola vaFilistia, va lo ta mu byela ku ngalo: Languta, Davida i le xiwuleni xa le Engedi.

² Zonake Saule i lo teka 3,000 wa vavanuna, a milangelwa ya vontlhe va ka Israeli, va ya hlota Davida ni vanhu vakwe lomu maribyeni ya timbuti ta khwati.

³ I lo chikela marangeni ya tiyivu kusuhani ni ndlela; ku wa hi ni muhume laho, zonake Saule i lo enghena ka wona a ku ya hambukela lomo. Kanilezi Davida ni vanhu vakwe va wa hi le magumo ka wona muhume lowo.

⁴ Zonake a vanhu va Davida va te ngalo kakwe: Languta, hi gona siku legi Jehova a nga ku byela ha gona aku: Nzi ta nyikela a nala wa wena mandleni ya wena, u maha kota kuranza ka wena. Kanilezi Davida i lo nyanimela aya tsema a nguwo ya Saule.

⁵ Zonake anzhako ka lezo i lo biwa hi livalo hi kota ya lezi a nga tsema a nguwo ya Saule.

⁶ Zonake i te ngalo ka vanhu vakwe: Cima nzi nga ta maha nchumu ka hosi ya mina, loyi a nga a totilweko wa Jehova, a kuva nzi tlakusa a canja ga mina hehla kakwe; hakuva hi a totilweko wa Jehova.

⁷ Zinghaho Davida i lo beletela a vanhu vakwe hi magezu lawo, a nga va vumeli ku vukela Saule. Zonake Saule i lo suka a huma lomu muhumeni a khoma ndlela yakwe a famba.

⁸ Anzhako ka lezo Davida i lo humawu hi lomu muhumeni, zonake i lo vitana Saule, aku: Hosi yanga, hosi yanga! Saule i lo cuwuka lenzhako kakwe, zonake Davida i lo korama lahasi hi xichavo.

⁹ Zonake Davida i te ngalo ka Saule: Hi kuyini u ingisako a timhaka ta vanhu lava va nge: Languta, Davida i hlota wutomi ga wena ku gi lamata?

¹⁰ Inyamutlha u zi wonile hi mahlo ya wena lezaku Jehova i wa ku nyikele mandleni ya mina lomuya muhumeni. A vanwani va wa nzi kucetele lezaku nzi ku daya, kanilezi nzi ku tsetsile, nziku: Cima nzi nga ta tlakusa a canja ga mina nzi vukela a hosi ya mina, hakuva hi a totilweko wa Jehova.

¹¹ Tlhatakumbiri, dada, hi nga wona a nguwo ya wena mandleni ya mina, nzi yi tsemileko laha ka nguwo ya wena; cima a nzi ku dayangi. Cuwukake u zi tiva lezaku ku hava wulala ni kubiha canjeni ga mina, ni lezaku mina a nzi ku gohelangi nchumu. Kanilezi wena wa hlota wutomi ga mina.

¹² Jehova a ave mulamuli xikari ka mina na wena, a nzi photela ka wena; kanilezi a canja ga mina gi nga ta ku vukela.

¹³ Khwatsi hi kuwula ka vakale va nga ku ngalo: Zo biha zi huma hi ka lava vo biha. Kanilezi a canja ga mina gi nga ta ku henya. Levi 19:18; Rom. 12:19; 1 Ped. 2:23

¹⁴ A hosi ya ka Israeli yi humela mani? Yi lanza mani? A ku lanzisela a mbyana yi fileko, kutani cuwani!

¹⁵ Jehova i tava mulamuli; i ta lamula xikari ka mina na wena! A nzi cuwuke, a tsanza mhaka ya mina, ni ku nzi ponisa lomu canjeni ga wena!

¹⁶ Makunu laha Davida a nga wa gumesile ku wulawula timhaka leto, Saule i te ngalo: Ina i gezu ga wena lego, nwananga Davida? Zonake i lo tlakusa a gezu gakwe a rila.

¹⁷ I te ngalo ka Davida: Wena u lulamile ku hunza mina, hakuva u nzi tlhelisela hi kusaseka; kanilezi mina nzi ku tlhelisela hi kubiha.

¹⁸ Inyamutlha u kombisile lezaku wa nzi mahela zinene. Inyamutlha Jehova i wa nzi nyikele mandleni ya wena, kanilezi a ku nzi dayangi.

¹⁹ Loku a munhu a kumana ni nala wakwe, wa mu tsika a ti fambela ke? Hikwalaho Jehova a ku chachazele hi wunene, hi kota ya lezi u nzi maheleko nyamutlha.

²⁰ Makunu nza zi tiva lezaku wena u tava hosi, ni lezaku a wuhosi ga va ka Israeli gi ta tiya mandleni ya wena.

²¹ Hlambanya makunu lezi ka mina ha Jehova, lezaku cima u nga ta lovisa a pswalo wa mina anzhako ka mina, ni ku fuvisa a vito ga mina ndlwini ya dadani wa mina.

²² Davida i lo hlambanya ka Saule, zonake Saule i lo suka aya kaya kakwe, kanilezi Davida ni vanhu vakwe va lo kanziha le khokholeni.