1 Samueli 23 - Tshwa Bible

¹ Davida lo byeliwa lezaku: Languta, a vaFilistia va hlasela Keila, ni ku phanga lomu minzhimbyeni ya wuhulelo.

² Zonake Davida i lo wutisa Jehova, aku: Nzi famba nzi ya hlasela vaFilistia lava ke? Jehova aku ka Davida: Famba u ya hlasela vaFilistia u ponisa Keila.

³ Kanilezi a vanhu va Davida va te ngalo kakwe: Languta, hambu ku hi lomu Juda, ha chava; zi ta mahisa kuyini le Keila loku hi yalwa ni tiyimpi ta vaFilistia?

⁴ Zonake Davida i lo engeta a wutisa kambe ka Jehova; Jehova a hlamula aku: Suka u relela uya le Keila, hakuva nzi ta nyikela vaFilistia mandleni ya wena.

⁵ Zalezo Davida i lo suka ni vanhu vakwe vaya le Keila va yalwa ni vaFilistia, va teka mitlhambi yabye, va va hlasela nguvu. Zinghaho Davida i lo ponisa a vanhu va le Keila.

⁶ Makunu laha Abiatari nʼwana Ahimeleki a nga chavela; ka Davida le Keila, i wa hi ni efode canjeni gakwe.

⁷ Zonake Saule i lo bikelwa lezaku Davida i enghenile Keila. Saule aku: Nungungulu i mu nyikele mandleni ya mina, hakuva i ti valele lomu mutini lowu wu nga ni tivati ni zikwinyaro.

⁸ Zonake Saule i lo hlomisa vontlhe vanhu, va relela vaya le Keila va ya ranzela Davida ni vanhu vakwe.

⁹ Kanilezi Davida i lo zi tiva lezaku Saule i tsemile xikungo xa ku mu hlota, zonake i te ngalo ka Abiatari a mupristi: Neha a efode!

¹⁰ Zonake Davida, aku: Jehova Nungungulu wa ka Israeli, a nanza ga wena gi zwile lezaku Saule i lava ku enghena lomu Keila a lovisa muti hi kota ya mina.

¹¹ Xana a vanhu va lomu Keila va ta nzi nyikela mandleni yakwe ke? Hakunene Saule i ta relela khwatsi hi lezi a nanza ga wena gi zwileko ke? Jehova Nungungulu wa ka Israeli, hi nga tivisa a nanza ga wena! Jehova i lo hlamula, aku: I ta relela.

¹² Zonake Davida aku: A vanhu va lomu Keila va ta nzi nyikela ni vanhu va mina mandleni ya Saule ke? Jehova aku: Va ta mu nyikela.

¹³ Zonake Davida i lo huma lomu Keila ni vanhu vakwe va 600, va famba va renzelekela kota lezi va nga zi kotisa zona. Zonake ku lo tibyiswa Saule lezaku Davida i tsutsumile le Keila; Saule a si thindekisa a yimpi yakwe.

¹⁴ Davida i lo tshama xiwuleni lomu makhokholeni ni lomu zitsungeni za le xiwuleni xa le Zife. Saule i wa mu hlota wontihe masiku, kanilezi Nungungulu a nga mu nyikelangi mandleni yakwe.

¹⁵ Davida i lo wona lezaku Saule i humile lahandle a ku hlota wutomi gakwe, zonake i lo tshama le xiwuleni xa le Zife lomu khwatini.

¹⁶ Kanilezi Jonatani nʼwana Saule, i lo Suka aya ka Davida le xiwuleni, a ya mu tiyiseta hi ka Nungungulu;

¹⁷ aku kakwe: U nga chavi, hakuva a canja ga dadani Saule gi nga ta ku kuma; wena u ta fumela va ka Israeli, mina nzi tava nduna ya wena, dadani Saule wa zi tivawu lezo.

¹⁸ Zonake va lo maha xivumelwano hi wumbiri gabye mahlweni ka Jehova. Davida i lo tshama lomu makhwatini, Jonatani yena a famba kaya kakwe.

¹⁹ Makunu a vanhu va le Zife va loya ka Saule le Gibea, va yaku: Davida hi gaya, i fihlele xikari ka hina, i lomu makhokholeni ni lomu makhwatini, ni lomu xitsungeni xa Hakila, hi tlhelo ga xinene ga xiwula.

²⁰ Makunu, wena hosi, khwatsi hilezi a mbilu ya wena yi xuvako nguvu a ku relela, relela; hina hi ta mu nyikela mandleni ya wena hosi.

²¹ Saule aku kabye: Jehova a mu katekise, hakuva nwina mu nzi zwele wusiwana.

²² Fambani mu ya wutisisa khwatsi, mu ta tiva ni ku wona a nzawu yakwe, laha a nkonzo wakwe wu nga kona, niku himani a mu wonileko laho; hakuva nzi byelilwe lezaku i tlharihile nguvu.

²³ Mu ta ya wona ni ku tiva kontlhe lomu a tumbelako kona; zoriake mu ta wuya ka mina mu ta nzi byela lisine, kasi nza famba na nwina. Loku a hi kona lomu tikweni lego, nzi ta mu hlota lomu xikari ka mazanazana ya ka Juda.

²⁴ Zonake va lo suka va famba vaya ie Zife, va rangela Saule. Kanilezi ni vanhu vakwe va wa hi le xiwuleni xa le Maone, le libaleni hi le Dzongeni ga xiwula xa hombe.

²⁵ Zonake Saule i lo suka ni vanhu vakwe va ya hlota Davida; kanilezi Davida i wa tiyisilwe timhaka leto, zonake i lo suka hi le maribyeni a ya tshama le xiwuleni xa Maone. Laha Saule a nga wa zi zwile, i lo lanzela Davida le xiwuleni xa Maone.

²⁶ Saule i lo famba hi ginwani tlhelo ga xitsunga, kanilezi Davida yenawu i lo famba hi ginwani tlhelo ga xitsunga. Makunu Davida i lo suka a tsutsuma a chava Saule, na Saule ni vanhu vakwe va kari va renzelekela va hlota Davida ni vanhu vakwe kasi va fela ku va khoma.

²⁷ Kanilezi ku lo ta chikela a ntsumi ka Saule, wu taku: Hatlisa u wuya, hakuva a vaFilistia va enghenile lomu tikweni.

²⁸ Zonake Saule i lo tsika ku hlongola Davida, a tlhela a yalwa ni vaFilistia. Hikwalaho vona va lo chula wutshamu lego ku Ribye ga Kuhambana.

²⁹ Davida i lo suka laho a ya tshama lomu makhokholeni ya le Engedi.