1 Samueli 18 - Tshwa Bible

Saule a lusela Davida.

¹ Makunu laha Davida a nga gumesile ku wulawula na Saule, a mbilu ya Jonatani yi lo bohana ni mbilu ya Davida, a mu ranza nguvu khwatsi hi lezi a ranzisako zona wutsumbu gakwe.

² Saule i lo mu teka lego siku, a nga ha mu vumeli ku tlhelela kaya ka raru wakwe.

³ Zonake Jonatani i lo maha xivumelwano na Davida, hakuva i wa mu ranza kota wutsumbu gakwe.

⁴ Jonatani i lo tlhatlha a bhaji gakwe legi a nga wa ambele, a nyika Davida zinwe ni tinguwo takwe, hambu ni supado yakwe ni wura gakwe, ni bhandi gakwe.

⁵ Davida i wa humahuma aya kontlhe lomu a nga wa rumiwa hi Saule, na a hi munhu wo ti lonzowota. Saule i lo mu yimisa a kuva nduna ya vanhu va yimpi. I lo xalalisa vontlhe vanhu, hambu ni malanza ya Saule.

⁶ Makunu laha va nga wa wuya hi le ko ya hlasela vaFilistia a vavasati va lo huma hi lomu mitini yontlhe ya ka Israeli, na va kari va yimbelela va kina mahlweni ka hosi Saule, na va hi ni tingomana, na va kanyuluka hi kutsaka. Ekso. 15:20; Vala. 11:31

⁷ A vavasati lavo va wa kari va kina na va yimbelela, vaku: Saule i dele 1,000, Kanilezi Davida i dele 10,000!

⁸ Zonake Saule i lo zangara nguvu, hakuva a timhaka leti a ti mu xalalisangi; hikwalaho i te ngalo: Vona va nyikile ka Davida 10,000, kanilezi va wulile ha mina 1,000 basi; mufumo basi a wu vumalako.

⁹ Kusukela lego siku ku komama mahlweni, Saule i lo cuwuka Davida hi tihlo go biha.

¹⁰ Makunu hi siku gi gamelako, a moya wo biha wu tako hi ka Nungungulu wu lota hi ntamu hehla ka Saule, zonake i lo hlanyahlanyeka lomu ndlwini yakwe, Davida yena na yimbelela hi xitende kota manwani masiku. Saule i wa hi ni tlhari canjeni gakwe.

¹¹ Saule i lo tlakusa a tlhari na aku mbilwini yakwe: Nzi ta gwaza Davida nzi mu patsa ni khurisi. Kanilezi Davida i lo vika zikhati zimbiri mahlweni kakwe.

¹² Zonake Saule i lo chava Davida, hakuva Jehova i wa hi zinwe naye, na tizwa yena wutsumbu a hi kule na Jehova.

¹³ Zinghaho Saule i lo mu susa, a nga ha tshami kusuhani kakwe, a mu maha a nduna ya hombe yimpini yakwe; hilezo Davida i lo maha murangeli wa vanhu.

¹⁴ Davida i lo vuvuma mitirweni yakwe yontlhe, na Jehova i wa hi zinwe naye.

¹⁵ Saule i lo mu chava laha a nga wona lezaku i tlharihile nguvu.

¹⁶ Kanilezi vontlhe va ka Israeli ni vontlhe vaJuda va wa ranza Davida hilezi a nga hi murangeli wabye.

¹⁷ Saule i te ngalo ka Davida: Nzi ta ku nyika Merabe, a nʼwana wa mina wa matewula, a kuva sati wa wena, ntsena lezaku wena u tava nghwazi ya mina, ya kulwa tiyimpi ta Jehova. Hakuva Saule i waku mbilwini yakwe: Nzi nga ta tlhateka a canja ga mina hehla kakwe, kanilezi a canja ga vaFilistia gi tava hehla ka yena!

¹⁸ Davida i te ngalo ka Saule: Nzi maniwo, na nzi hi wa xiyimo muni, wona ngango wa dadani wo va xini lomu ka Israeli ko kala mina nzi maha mwane wa Saule?

¹⁹ Kanilezi laha a xikhati lexi Merabe a nga fanele ku nyikelwa ka Davida, yena i lo nyikelwa ka Adrieli wa le Meholate, a maha sati wakwe.

²⁰ Kanilezi Mikali a nʼwana wa Saule i lo ranza Davida, zonake va lo ya byela Saule, na Saule zi lo mu xalalisa.

²¹ Hakuva Saule i waku mbilwini yakwe: Nzi ta mu nyika yena kasi a fela ku maha ziyo ka yena lezaku a canja ga vaFilistia gi fela kuva hehla kakwe. Saule i lo engeta aku ka Davida: Inyamutlha wena u ta kuva mwane wa mina.

²² Saule i lo leletela malanza yakwe aku: Wulawulani na Davida le xihundleni, muku: Languta, a hosi ya ku ranza, ni malanza yakwe wontihe ma ranza wena; hikwalaho maha mwane wa hosi.

²³ A malanza ya Saule ma lo byela Davida mahungu lawo, Davida aku: Xana xilo xi tsongwani ka nwina a kuva mwane wa hosi ke? Ma zi wona lezaku nzi munhu wa xisiwana, wa nyalidede.

²⁴ Zonake a malanza ya Saule ma lo ya byela nwinyi wabye, maku: Davida i wulile lezi ni lezi.

²⁵ Saule aku: Mu byeleni muku: A hosi a yi xuvi nzowolo, kanilezi yi lava a 100 wa wukhuna ga vaFilistia, kasi ku photela ka valala va hosi. Kanilezi Saule i wa xuva ku lovisa Davida hi canja ga vaFilistia.

²⁶ Zonake a malanza yakwe ma lo ya byela Davida mahungu lawo, Davida i lo xalaliswa ha wona, a kuva mwane wa hosi. A masiku ma wa nga se mbhela.

²⁷ Davida a suka a famba ni vanhu vakwe, a ya daya mazana mambiri ya vavanuna lomu xikari ka vaFilistia; zonake Davida i lo neha wukhuna gabye gi ya nyikelwa ka hosi wontihe tsengo wa gona, kasi yena wa fela kuva mwane wa hosi. Zonake Saule i lo mu nyika a nʼwana wakwe a kuva sati wakwe.

²⁸ Saule i lo wona lezaku Jehova i wa hi zinwe na Davida; kanilezi Mikali nʼwana Saule i wa mu ranza nguvu Davida.

²⁹ Saule i wa su simamisa a chava Davida hi kuhunzeletileko, a maha nala wakwe kuhanyeni kakwe kontlhe.

³⁰ Laha tihosi ta vaFilistia ti nga wa huma ku ya hlasela, Davida xontlhe xikhati i wa humelela ku hunza wontihe malanza ya Saule; hikwalaho a vito gakwe gi wa ranzeka nguvu.