1 Samueli 14 - Tshwa Bible

¹ Makunu hi ginwani siku, Jonatani nʼwana Saule i te ngalo ka jaha legi gi nga hi muweleli wa matlhari yakwe: Ngone hi tlhatuka hiya ka ntlawa wa vaFilistia wu nga le tlhatuko. Kanilezi a nga byelangi raru wakwe.

² Saule i wa tshamile le magumo ka Gibea, lahasi ka sinya ya pomegranada, yi nga wa hi le Migroni. A vanhu lava a nga wa hi navo va wa hi 600 wa vavanuna.

³ Ahija nʼwana Ahituba a nakulobye wa Ikabode nʼwana Fineasi wa Eli, a mupristi wa Jehova le Xilo i wa ambele a efode. Ni vanhu a va zi tivangi lezaku Jonatani i fambile.

⁴ Laha xikari ka tindlela leti Jonatani a nga wa lava ku tsemakanya ha tona aya ka butho ga vaFilistia, ku wa hi ni ribye ga tlotloloto ka tlhelo ginwe, ni ribye ga tlotloloto ka ginwani tlhelo; a ginwe gi wa vitanwa ku Bozeza, a ginwani gi vitanwa ku Sena.

⁵ A ribye ginwe gi wa hi tlhelweni ga Nwalungu ngomama na Mikmaxe, a ginwani gi wa hi tlhelweni ga Dzonga ngomama na Gibea.

⁶ Jonatani aku ka jaha legi gi nga hi muweleli wa matlhari yakwe: A hiye le ka butho ga makhuna, kutani Jehova i ta hi lwela, hakuva a xi kona xi tsanzekisako Jehova ku ponisa, hambu loku ku hi vanhu vo tala kutani va tsongwani.

⁷ A muweleli wa matlhari yakwe aku: Maha zontlhe lezi zi nga mbilwini ya wena. Yana ni kwihi u ku lavako, nzi ta ku lanzela khwatsi hi kuruma ka mbilu ya wena.

⁸ Jonatani aku ngalo: Hi taya ka vanhu lavaya hi ya ti wonekelisa ka vona.

⁹ Loku va ku ngalo: Yimani laho kala hita ka nwina! Hi ta yima kwalaho hi ngayi ka vona. Gen. 24:12

¹⁰ Kanilezi loku vona vaku ngalo ka hina: Ngonani leno ka hina! Hi taya, hakuva Jehova i tava a va nyikele mandleni ya hina; lexo xi tava xikombiso ka hina.

¹¹ Zonake va lo ti wonekelisa ka butho ga vaFilistia hi wumbiri gabye, a vaFilistia va ku ngalo: Hi lawa maHeberu, ma humela lomu minkeleni leyi va tumbeleko ka yona.

¹² Zonake a vavanuna va butho lego va lo wulawula na Jonatani ni muweleli wa matlhari yakwe, vaku: Ngonani laha hi ta ta mu byela timhaka! Jonatani aku ka muweleli wa matlhari yakwe: Kanziha u nzi lanza, hakuva Jehova i va nyikele mandleni ya va ka Israeli.

¹³ Jonatani i lo kanziha hi mandla ni mikonzo, na a lanzelwa hi muweleli wa matlhari yakwe. Zonake a vaFilistia va lowa mahlweni ka Jonatani, ni muweleli wa matlhari yakwe a va dayiseta.

¹⁴ Loku hi kuhlasela ko ranga, loku Jonatani ni muweleli wa matlhari yakwe va nga hlasela 20 wa vavanuna ka wutshamu gi ringanako khihlanya ga nzima ya simu.

¹⁵ Ku wa hi ni nchavo ni kururumela lomu magovelweni ni lomu tikweni ni xikari ka vanhu vontlhe va tiko. A vavanuna va mabutho ni lava va nga wa fambile ku ya phanga, va lo rurumela hi ku chava na vonawu; ni misava yi lo tsekatsekiswa. Ku wa hi ni kuchaveka ka hombe ku tileko hi ka Nungungulu. Gen. 35:5; Ekso. 14:24

¹⁶ A varinzeli va Saule lava va nga hi le Gibea ga ka Benjamini va lo wona a vanyingi lava va nga wa hangalaka, va tsutsuma ka wontihe matlhelo.

¹⁷ Zonake Saule i te ngalo ka vanhu lava a nga hi navo: Hlayani kasi mu wona lezaku himani a sukileko xikari ka hina! Va lo hlaya, va vumala Jonatani ni muweleli wa matlhari yakwe.

¹⁸ Saule i te ngalo ka Ahija: Neha a arke ga Nungungulu! Hakuva xikhati lexo a arke ga Nungungulu gi wa hi ni va ka Israeli.

¹⁹ Makunu laha Saule a nga ha wulawula ni mupristi, a pfilupfilu yi wa su nonohisa yi enzelekelana lomu wugovelweni ga vaFilistia. Zonake Saule aku ka mupristi: Susa a canja ga wena!

²⁰ Zonake Saule ni vontlhe vanhu lava a nga wa hi navo va lo tsombana laha kulweni, a vaFilistia va tlhavana ha voce hi matlhari yabye, ni pfilupfilu yi wa hi ya hombe nguvu.

²¹ Makunu a maHeberu, lawa ma nga wa hi ni vaFilistia lomu wugovelweni gabye, va lo hunzuluka va ya yima tlhelweni ga va ka Israeli lava va nga hi na Saule na Jonatani.

²² Zonake a vanhu va ta Israeli lava va nga wa tumbele lomu zitsungeni za ka Efraime, laha va ngazwa lezaku a vaFilistia va panzanyekile, vonawu va lo va tsimbeketa, va va hlongolisa na va kari valwa.

²³ Zinghaho Jehova i lo ponisa va ka Israeli lego siku, a yimpi yi hunza yiya Bet-Avane.

²⁴ A vanhu va ka Israeli va wa rerekile nguvu lego siku, hakuva Saule i wa hlamhanyisile vanhu, aku: I rukatelwe loye a ta ngaga zakuga kusukela lezi kala laha gambyeni, hakuva nza ha lava ku phota ka valala va mina! Hikwalaho ku wa nga hi kona munhu a nga wa laza zakuga.

²⁵ Laha vontlhe vanhu va nga wa enghenile lomu khwatini; lomo ku wa hi ni wulombe lahasi.

²⁶ Kanilezi laha vanhu va nga wa enghenile lomu khwatini, va wona wulombe na gi donela lahasi, ku wa nga hi kona munhu a nga wa yisa a canja gakwe laha nonwini, hakuva a vanhu va wa chava a xifungo.

²⁷ Kanilezi Jonatani i wa nga zi zwangi laha a raru wakwe a nga wa hlambanyisa vanhu, hikwalaho yena i lo peta a magumo ya nhonga yakwe, a yi enghenisa lomu ka zihahla za wulombe, a enghenisa lomu nonwini wakwe, a mahlo yakwe ma si hawuluka.

²⁸ Makunu a munwe wa vanhu i lo mu byela lezaku: A raru wa wena i hlamhanyisile vanhu, aku: I rukatelwe a munhu loye a ta ngaga zakuga inyamutlha! Kanilezi a vanhu va wa mbhelile ntamu.

²⁹ Zonake Jonatani aku ngalo: Dadani i karatisile vanhu; cuwukani mahlo ya mina, ma hawulukile, hakuva nzi lazile wulombe legi.

³⁰ Ku wa ta ngha ku te yini xana loku a vanhu va wa gile inyamutlha a xipanze xa lezi va phangileko ka valala vabye, xana a kuhlaselwa ka vaFilistia ku wa ta ngha ku nga mahangi ka hombe ke?

³¹ A siku lego va lo hlasela vaFilistia kusukela le Mikmaxe kala le Aijaloni, kanilezi a vanhu va wa mbhelile ntamu.

³² Zonake a vanhu va lo tsutsumela muphangweni, va ya teka tiyivu ni tihomu ni marole; va lo zi daya lahasi vaga nyama ya kona na yi hi ni nkhata.

³³ A vanhu va lo ya byela Saule vaku: A vanhu va goha va vukela Jehova hi kuga a nyama na yi hi ni nkhata. Saule aku ngalo: Mu onhile. Wumbulutani a ribye ga hombe gita laha ka mina! Gen. 9:4; Levi 3:17; Deut. 12:16

³⁴ Zonake Saule aku ngalo: Hangalakani xikari ka vanhu, mu va byela lezi: Munhu ni munhu a nehe laha ka mina a homu yakwe, kutani a yivu yakwe, mu ta daya kwalaha, muga! Kasi mu nga onhi ka Jehova hi kuga ni nkhata. Zonake vontlhe vanhu va lo neha zifuyo zabye lego wusiku lezi va zi khomileko, va ta zi daya laho.

³⁵ Saule i lo aka a alati ga Jehova, gi nga alati go sangula legi a nga akela Jehova.

³⁶ Zonake Saule i te ngalo: A hi releleni hi lanza vaFilistia ni wusiku, hi ya va hlasela kala laha mixweni, hi nga siyi ni munhu. Vona vaku kakwe: Maha zontlhe lezi u zi lavako. Kanilezi mupristi i te ngalo: A hi tshineleni laha kusuhani ka Nungungulu!

³⁷ Zonake Saule i lo wutisa ka Nungungulu, aku: Nzi relela nzi lanza vaFilistia ke? U ta va nyikela mandleni ya va ka Israeli ke? Kanilezi Nungungulu a nga mu hlamulangi nchumu lego siku.

³⁸ Saule aku ngalo: Tshinelani nwina nwentlhe manghanakana ya vanhu! Hlolisisani mu wona laha a xionho xi mahilweko kona inyamutlha!

³⁹ Hakuva nzi hlambanya ha Jehova, loyi ahanyisako Israeli; hambu loku a nanzu wu hi ka nʼwana wa mina Jonatani, hizinene i tafa. Kanilezi ku wa nga hi kona munhu xikari ka vontlhe a nga hlamula.

⁴⁰ Yena aku ka vontlhe va ka Israeli: Yimani hi tlhelo ga nwina, mina ni nʼwana wa mina Jonatani hi ta yima hi tlhelo. A vanhu vaku: Maha lezi u zi ranzako!

⁴¹ Zonake Saule i te ngalo ka Jehova: Nungungulu wa Israeli! Kombisa zinene za kona! Zonake ku lo khomiwa Jonatani na Saule hi hlolo, a vanhu va pona. Jox. 7:14; Jona 1:7

⁴² Saule i lo engeta aku: Nzi hlahluveni ni nʼwana wa mina Jonatani. Zonake a hlolo yi khoma Jonatani.

⁴³ Zonake Saule aku ka Jonatani: Nzi byele lezi u mahileko. Jonatani i lo mu hlawutela, aku: Nzi lo laza wulombanyana hi le magumo ka nhonga leyi nzi nga wa welele canjeni ga mina; hikwalaho hi mina nzi faneleko kufa!

⁴⁴ Saule i te ngalo: Nungungulu a mahe lezo hi ku engeta, hakunene Jonata u tafa!

⁴⁵ Kanilezi a vanhu va te ngalo ka Saule: Xana Jonatani i tafa, yena loyi a tirileko a kuhanyisa ka hombe ka ku nghahi lomu ka Israeli ke? Za hava lezo! Hi hlambanya ha Jehova a hanyako, cima ku nga ta kuva kona ni munwe a sisi wa hloko yakwe wu ta ngawa lahasi, hakuva Jonatani i tirile na Nungungulu legi siku! Zinghaho a vanhu va lo tlhatlhisa Jonatani, a nga dawi.

⁴⁶ Saule i lo tlhela hi le ko hlongolisa vaFilistia, a vaFilistia maya matshanwini yabye.

⁴⁷ Zinghaho laha Saule a nga wa enghenile kufumeni ka ku fumela Israeli, i lo hlasela vontlhe valala lava va nga wa mu ranzele va mu veka xikari, va nga vona vaMoabi, ni va ka Amoni, ni vaEdomi, ni tihosi ta le Zoba, ni vaFilistia; ni kwihi laha a nga waya, i wo ya hlula.

⁴⁸ I lolwa hi wunhenha, a khozisa vaAmeleki, a tlhatlhisa Israeli mandleni ya lava va nga wa va khinyelela.

⁴⁹ Makunu a vafana va Saule ku wa hi Jonatani, na Ixvi, na Malkixua. A mavito ya vanhanyana vakwe va vambiri, a nhonzwa ya kona ku wa hi Merabe, a nzisana ku wa hi Mikali.

⁵⁰ A vito ga sati wa Saule ku wa hi Ahinoame nʼwana Ahimaze. A vito ga nduna yakwe ya yimpi hi Abneri nʼwana Neri, a nakulobye wa raru wa Saule.

⁵¹ Hakuva Kixi a raru wa Saule, na Neri a raru wa Abneri, va wa hi vana va Abieli.

⁵² Ka wontihe masiku ya kuhanya ka Saule ku wa hi kona a tiyimpi ta hombe zinwe ni vaFilistia. Hikwalaho loku Saule a wona a wanuna wa tinghitsi, i wo mu teka a maha wakwe.