1 Samueli 10 - Tshwa Bible

¹ Zonake Samueli i lo teka a xikudzana xa mafura a xi chulula laha hlokweni ka Saule, a mu pswopswa, aku: Hakunene Jehova i ku totile hi mafura lezaku u maha hosi hehla ka tshomba yakwe!

² Inyamutlha lezi u ta nga hambana na mina u famba, u ta kumana ni vanhu vambiri le tsizeni ga Rakeli, le mbhinganweni wa Benjamini le Zelza. Va ta ku byela ku ngalo: A timbongola leti u nga wa ti lava ti kumilwe. Makunu a raru wa wena a nga ha vileli hi mhaka ya timbongola, kanilezi i vilela ha nwina, aku: Nzi ta maha yini hi nʼwana wa mina? Gen. 35:19; 1 Sam. 9:5

³ Ku suka hi laho u taya mahlweni kala u chikela laha ka kuhlu wa le Tabori. Laho u ta tlhangana ni vanhu vanharu na va kanziha vaya Beteli ka Nungungulu; munwe na rwele zimbutana zinharu, a munwani na rwele zibaba zinharu, a wa wunharu na rwele a kwama wa vinya.

⁴ Va ta ku losa, va ku nyika zibaba zimbiri; u ta zi amukela lomu canjeni gabye.

⁵ Anzhako ka lezo u ta ya chikela Gibea-Elohim, laha ku nga ni yindlu ya varinzeli va vaFilistia. Makunu a xikhati U enghenako mutini, u ta tlhangana ni ntlawa wa vaprofeti na va relela hi le wutshanwini gi tlakukileko, na va hi ni timbila, ni ngoma, ni maxava, ni zitende, na va kari va profeta.

⁶ A Moya wa Jehova wu ta enghena ka wena hi ntamu, u ta profeta zinwe navo, u ta hunzuluswa u maha munwani munhu.

⁷ Makunu laha zi ta nga maheka lezi zikombiso ka wena, u ta maha lezi zi ta nga woneka khwatsi ka wena, hakuva Nungungulu i zinwe na wena.

⁸ Wena u ta ranga uya le Gilgali, zonake minawu nzi ta ku lanzela nzi ta maha munyikelo wa kuhiswa ni miphahlo ya kurula. U ta ya nzi rinzela leyo 7 wa masiku, kala nzi chikela; zonake nzi ta ta ku byela lezi u faneleko ku zi maha.

⁹ Laha Saule a nga wa sukile a fularela Samueli, Nungungulu i lo mu hunzulusa a mu nyika yinwani mbilu, ni zontlhe zikombiso lezo zi lo maheka ka yena lego siku.

¹⁰ Laha va nga wa chikele le Gibea, a ntlawa wa vaprofeti wu lo tlhangana naye, zonake a Moya wa Nungungulu wu lo enghena kakwe hi ntamu, yena i lo profeta xikari kabye.

¹¹ Makunu vontlhe lava va nga wa mu tiva hi kale, laha va nga mu wona na a kari a profeta ni vaprofeti, va lo wulawula, vaku: Zini zi humeleleko ka nʼwana Kixi? Kasi Saule i lomu xikari ka vaprofeti?

¹² Zonake a munwe wabye i lo hlamula, aku: Himani raru wabye? Hikwalaho a gezu lego gi lo hunzuka gi maha tsheketo waku: Kasi na Saule i lomu xikari ka vaprofeti?

¹³ Laha Saule a nga wa gumesile ku profeta, i loya le wutshanwini gi tlakukileko.

¹⁴ Zonake a hahani wa Saule i te ngalo kakwe ni ka nanza gakwe: Mu wa hi kwihi? Yena aku: Hi wa fambile hi lava timbongola; kanilezi laha hi nga wona lezaku ha ti vumala, hi loya ka Samueli.

¹⁵ A hahani wa Saule aku: Nzi byele lezi Samueli a nga ku byela zona.

¹⁶ Saule aku kakwe: I hi byelile ziku dlunya lezaku a timbongola ti kumilwe. Kanilezi hi tlhelo ga timhaka ta wuhosi, a nga kumbukangi lezi Samueli a nga wula.

¹⁷ Makunu Samueli i lo tsombanyisa a vanhu mahlweni ka Jehova le Mizpa;

¹⁸ aku ka va ka Israeli: Jehova Nungungulu wa ka Israeli i ngalo: Mina nzi humesile Israeli le Gipite, nzi mu ponisa canjeni ga vaGipite, ni canjeni ga tontlhe tihosi leti ti nga wa mu xanisa.

¹⁹ Kanilezi inyamutlha mu alile Nungungulu wa nwina, loyi a nga mu ponisa timhangweni ta nwina tontlhe, ni le kuxanisekeni ka nwina, muku kakwe: Hi yimisele hosi leyi yi ta nga hi fumela! Makunu humelelani mahlweni ka Jehova hi tixaka ta nwina ni matala ya nwina.

²⁰ Zinghaho Samueli i lo tshineta tontlhe tixaka ta ka Israeli; ku si hlawuliwa a lixaka la ka Benjamini.

²¹ Zonake i lo tshineta lixaka la ka Benjamini hi mingango yabye, zonake a ngango wa ka Matri wu lo hlawulwa, zonake Saule nʼwana Kixi i lo hlawulwa. Va lo mu lava, kanilezi a nga kumiwangi.

²² Va lo nonohisa va wutisa ka Jehova, vaku: A munhu loye i tata laha kambe ke? Jehova aku ngalo: Hi gaya, i fihlele lomu ka zibya.

²³ Zonake va lo tsutsuma va ya mu teka, a ta yima xikari ka vanhu vontlhe. I wa lehile ku hunza vanhu vontlhe.

²⁴ Samueli aku ka vontlhe vanhu: Cuwukani loyi Jehova a mu hlawulileko! A ku na munhu lomu tikweni gontlhe wo fanana naye. A vanhu vontlhe va lo hlalela hi kutsaka, vaku: A yi hanye hosi!

²⁵ Zonake Samueli i lo hlawutela ka vanhu a timhaka ta mufumo, a ti tsala bhukwini, a gi veka mahlweni ka Jehova. Samueli i lo fambisa vanhu, loyi ni loyi aya kaya kakwe.

²⁶ Yenawu Saule i loya kaya kakwe le Gibea, zonake a vavanuna lava va tsumbekileko, lava Nungungulu a khumbileko timbilu tabye, va lo famba naye.

²⁷ Kanilezi a vanwani lava vo biha, va te ngalo: Xana loyi munhu i ta hi ponisisa kuyini? Va lo mu kanyisa, va nga nehi nzuvo kakwe. Kanilezi Saule a nga wulangi nchumu ha zona.