1 Samueli 1 - Tshwa Bible

Kupswalwa ka Samueli.

¹ Ku wa hi kona a munhu le Ramataime-zofime, wa le xitsungeni xa ka Efraime, a vito gakwe hi Elkana, nʼwana Jerohama wa Elihu, wa Tohu, wa Zufa, a muEfraime.

² I wa hi ni vasati vambiri; a vito ga wo sangula hi Hana, a wa wumbiri i wa hi Penina. Penina i wa hi ni vana; kanilezi Hana i wa nga hi na nʼwana.

³ Inaloye lembe ni lembe i wa suka laha mutini wakwe a kanziha ku ya khozela mahlweni ka Jehova wa tiyimpi, a maha miphahlo le Xilo. Vafana vambiri va Eli, Hofeni na Fineasi, hi vona va nga hi vapristi va Jehova.

⁴ Laha a siku gi nga wa chikele ga kuva Elkana a maha muphahlo, i lo nyika ziavelo za wona ka sati wakwe Penina ni ka vana vakwe; Levi 7:15; Deut. 27:7

⁵ kanilezi i lo nyika Hana a xiavelo xi wuyetilweko, hakuva i wa mu ranza nguvu. Kanilezi Jehova i wa mu mahile ngonwa.

⁶ Penina i lo mu chepeta, kasi ku mu zwisa kubayisa, hilezi Jehova a nga wa valile marumbu yakwe.

⁷ Elkana i lo maha lezo lembe ni lembe, ni loku Hana aya ndlwini ya Jehova, Penina i wo mu chepeta; hikwalaho Hana i wo tshama hi ku rila, a ngagi ni zakuga.

⁸ A nuna wakwe aku kakwe: Hana, u rilela yini? Hi yini u nga giko zakuga? Yi karatekela yini a mbilu ya wena? Kasi mina a nzi hunzi khume ga vana ka wena ke?

⁹ Laha va nga wa mbhetile kuga ni kunwa le Xilo, Hana i lo Suka. Mupristi Eli i wa tshamile xitshanwini xakwe, na khegele laha mhanzeni ya nyangwa ya tempeli ya Jehova.

¹⁰ A moya wa Hana wu wa karateka; i lo khongela ka Jehova, a tsikwila,

¹¹ a hlambanya, aku: Jehova wa tiyimpi, loku u wa cuwuka a hlomulo wa nanza ga wena, u nzi alakanya, u nga rivali a nanza ga wena, u nyika a nanza ga wena a nwanana wa mufana, minawu nzi wa ta mu nyikela ka Jehova wontihe masiku ya kuhanya kakwe, ni likari cima li nga ta henya a hloko yakwe. Mitse. 6:5; Vala. 13:5

¹² Laha a nga wa simama a khongela ka Jehova, Eli i lo mu cuwukisisa nomu wakwe.

¹³ Hana i wa wulawula hi lomu mbilwini, a milomu na yi ninginika, a nga zwati gezu gakwe. Hikwalaho Eli i lo alakanya lezaku i popilwe.

¹⁴ Aku kakwe: U ta popiwa kala rini? Famba u ya kalamuka kupopiwa ka wena!

¹⁵ Hana a hlamula, aku: Kokwihi, hosi yanga! Nzi wasati wa ku karateka mbilwini. A nzi nwangi vinya hambu byala, kanilezi nzo chulula a muhefemulo wa mina mahlweni ka Jehova.

¹⁶ U nga hlayi a nanza ga wena ga xisati lezaku nzi bihile, kanilezi nzi wulawulile zilo zinyingi za kukarateka ka mina, ni kuchepetwa ka mina.

¹⁷ Zonake a hlamula, aku: Famba hi kurula, Nungungulu wa ka Israeli a ku nyike lezo u kombeleko.

¹⁸ Yena aku: Ngha uva ni tipswalo hi nanza ga wena! Zonake i lo khoma ndlela yakwe a ti fambela, a yaga, a nghohe yakwe yi nga ha tsanwi.

¹⁹ Va lo vinzuka ni mixo va ya khozela mahlweni ka Jehova, va tlhela vaya kaya kabye le Rama. Elkana i lo tiva sati wakwe, Hana, Jehova a mu alakanya.

²⁰ Ka gwalego lembe Hana i lo xura nyimba a pswala nwanana wa mufana, a mu chula vito ga Samueli, hakuva i te ngalo: Nzi mu kombelile ka Jehova.

²¹ Elkana ni ngango wakwe wontihe va lo kanziha va ya nyikela miphahlo ya lembe ni lembe ka Jehova, ni kuya tatisa xifungo xakwe.

²² Kanilezi Hana a nga yangi, hakuva i te ka nuna wakwe: Mina nzi nga taya kala loku xihlangana xi lumukile, hi kona nzi to mu heleketa nzi ya mu hendleleta mahlweni ka Jehova, kasi a fela ku tshama lomo wontihe masiku.

²³ A nuna wakwe Elkana aku kakwe: Maha lezo zi nga kusasa kuwoneni ka wena; rinzela kala u mu lumula. Ntsena lezaku ngha Jehova a tiyisa mhaka yakwe. Zinghaho a wasati i lo tshama a anwisa nʼwana wakwe kala a mu lumula.

²⁴ A nzhako na a mu lumulile, i lo mu teka a famba naye, ni tikuzi tinharu, ni efa ya mapa, ni botori ga vinya, a mu heleketa ndlwini ya Jehova le Xilo. Kanilezi a mufana i wa ha hi tsongwani.

²⁵ Va lo daya a nkuzi va nyikela a xihlangana ka Eli.

²⁶ A wasati aku: Hosi yanga, khwatsi hi lezi a muhefemulo wa wena wu hanyako, nzi mina wasati loyi a nga yimile laha mahlweni ka wena, nzi khongela ka Jehova.

²⁷ Nzi lo kombela a nwanana loyi ka Jehova, a nzi nyika lexi nzi nga wa kombela xona.

²⁸ Hikwalaho minawu nza mu nyikela ka Jehova. Wontihe masiku ya kuhanya kakwe i tava loyi a lumbako Jehova. Zonake va lo khizamela Jehova.