1 Kronekele 5 - Tshwa Bible

Zizukulwana za Rubeni.

¹ A vana va Rubeni a matewula ya Israeli (hakuva i wa hi matewula, kanilezi hi kota ya lezi a nga nyenyezisa a sango ga raru wakwe, a wutewula gakwe gi lo nyikelwa ka vana va Josefa nʼwana Israeli; na ku nga hi lezaku Josefa i wa kuva matewula.

² Hakuva Juda i wa hi wa hombe xikari ka vanakulobye; a hosi yi humile hi ka yena, kanilezi a wutewula gi wa hi ga Josefa.)

³ A vana va Rubeni a matewula ya Israeli: Hanoke, na Palu, na Hezroni, na Karmi.

⁴ A vana va Joeli: Xemaia nʼwana wakwe, Gogo nʼwana wakwe, Ximei nʼwana wakwe,

⁵ Mika nʼwana wakwe, Reaia nʼwana wakwe, Baali nʼwana wakwe,

⁶ Beera nʼwana wakwe, loyi a nga wa khomilwe a mahiwa khumbi hi Tilgate-Pilnesera a hosi ya le Asiria. I wa hi hosana ya va ka Rubeni.

⁷ A vanakulobye hi mingango yabye, khwatsi hi lezi va kumbukilweko hi tinyangwa tabye: tihosana ta kona Jeieli, na Zakaria,

⁸ na Bela nʼwana Azaza wa Xema wa Joeli, loyi a akileko lo Aroera kala le Nebo ni le Baali-Meoni.

⁹ Hi tlhelo ga Mutsuwuka-gambo, i wa akile kala le xiwuleni ku ya chikela le Congweni wa Eufrate, hakuva a mitlhambi yabye yi wa enzelekelene le tikweni ga Gileade.

¹⁰ A xikhatini xa Saule va lo hloma yimpi va yalwa ni vaHagrate va va hlula, zonake va tshama lomu matendeni yabye gontlhe tlhelo ga Mutsuwuka-gambo wa tiko ga Gileade.

Zizukulwana za Gadi.

¹¹ A vana va Gadi va wa akile tikweni ga le Baxani kala le Saleka, va cuwukana navo:

¹² a hosana ya kona Joeli, na Xafani loyi a gamelako, na Janai, na Xafate, le tikweni ga Baxani.

¹³ A vanakulobye hi tiyindlu ta vararu vabye, ku wa hi Mikaeli, na Mexullamu, na Xeba, na Jorai, na Jakani, na Zia, na Eberi; ntlhanu ni vambiri.

¹⁴ Lava hi vana va Abihaili nʼwana Huri wa Jaroa wa Gileade wa Mikaeli wa Jexixai wa Jahdo wa Buza;

¹⁵ Ahi nʼwana Abdieli wa Guni, i wa hi hosana ya tiyindlu ta vararu vabye.

¹⁶ Vona va wa akile le Gileade wa Baxani, ni lomu mitini ya kona ni lomu wuriselweni gontlhe ga le Xaroni kala kwale mimbhinganweni ya kona.

¹⁷ Vona vontlhe va wa hlayilwe masikwini ya Jotamu hosi ya ka Juda, ni masikwini ya Jeroboamu hosi ya ka Israeli.

¹⁸ A vana va Rubeni ni va ka Gadi, ni khihlanya ga nyangwa ya ka Manasa, a vavanuna va tinhenha, lava va zi kotako ku khoma a zitlhangu ni matlhari, ni ku fula hi mawura, a vanhu va tlharihileko kulweni, va wa hi 44,760 wabye lava va nga wa zi kota kuya yimpini.

¹⁹ Va lo hloma va ya hlasela vaHagrate, ni vaJetura, ni vaNafixe, ni vaNodaba.

²⁰ Va lo vunetelwa kulwa navo; a vaHagrate ni vavuni vabye va lo nyikelwa mandleni yabye, hakuva a xikhati va ngalwa va wa rila ka Nungungulu, zonake yena a va ingisa, hakuva va wa tsumba ka yena.

²¹ Va lo gula mitlhambi yabye; a makameli ma wa hi 50,000, a tiyivu ti wa hi 250,000, a timbongola ti wa hi 2,000, a vanhu va wa hi 100,000.

²² Hakuva a vanyingi va wa delwe, hi lezi a yimpi yi wata hi ka Nungungulu; zonake vona va lo aka matshanweni yabye, kala xikhatini lexi va nga khomiwa ha xona va yiswa wukhumbini. 2 Tih. 17:6

²³ A vana va khihlanya ga nyangwa ya Manasa va lo akawu lomo tikweni lego, kusukela le Baxani kala le Baali-Hermoni, ni le Senira ni le xitsungeni xa Hermoni; va wa tele nguvu.

²⁴ Leti hi tona tihosana ta tiyindlu ta vararu vabye: Efa, na Ixi, na Elieli, na Azrieli, na Jeremia, na Hodavia, na Jahdieli, va wa hi tinhenha ti dumileko ni tihosana ta tiyindlu ta vararu vabye.

²⁵ Kanilezi va lo onhela Nungungulu wa vararu vabye, va ti nyiketela wubhayini ga ku lanzela vanungungulu va matiko lawa Nungungulu a ma lovisileko mahlweni kabye. Ekso. 34:15

²⁶ Nungungulu wa ka Israeli i lo kucetela a mbilu ya Pule a hosi ya le Asiria, ni mbilu ya Tilgate-Pilnesera a hosi ya le Asiria, a khoma va ka Rubeni, ni va ka Gadi, ni khihlanya ga nyangwa ya ka Manasa, a va yisa le wukhumbini, a va yisa le Hala, ni Habora, ni le Hara, ni le Congweni wa le Gozani, laho va akileko kona kala nyamutlha.