1 Kronekele 29 - Tshwa Bible

¹ Hosi Davida i te ngalo ka tlhangano: A nʼwana wa mina Solomoni, loyi ku nga yena a hlawulweko hi Nungungulu, wa hi tsongwani, a nga se ngava ni ntamu, kanilezi a ntiro ngwa hombe, hakuva a yindlu leyo a hi ya munhu, kanilezi nja Jehova Nungungulu.

² Nzi ti karatile hi ntamu wa mina wontihe nzi longisela a yindlu ya Nungungulu wa mina, a nzalama ya lezi zi ta ngava za nzalama; a siliva ya lezi zi ta ngava za siliva; a suku wa lezi zi ta ngava za suku; a ziketse za lezi zi ta ngava za ziketse; a tisinya ta lezi zi ta ngava za tisinya; a maribye ya berile, ni maribye lawa ma ta nga tlhatekelwa, ni maribye yo khazamula, ni maribye ya mivala ya tixakaxaka, ni tixaka tontlhe ta maribye ya malongo, ni marmore yo basa yo tala nguvu.

³ Tlhatakumbiri, hi kuranza ka mina a yindlu ya Nungungulu wa mina, lezi nzi nga nazo za nzalama ni siliva, lezi zi lumbako mina, nza zi nyikela a kuva ziva za yindlu ya Nungungulu wa mina, ahandle ka lezi nzi zi longiseleko a yindlu ya ku basa.

⁴ Zi nga lezi: 3,000 wa titalenta ta nzalama ya le Ofira, ni 7,000 wa titalenta ta siliva yi hlutilweko, kasi ku nameketela lomu makhurisini ya yindlu.

⁵ A nzalama yi tava ya lezi zi ta ngava za nzalama, ni siliva yi tava ya lezi zi ta ngava za siliva, ni za mitiro yontlhe ya mandla ya vatiri. Himani inyamutlha a ranzako ku nyikela ka Jehova a munyikelo wakwe ke? Ekso. 35:4

⁶ Zonake a tihosana ta tiyindlu ta vadadani, tihosana ta tinyangwa ta ka Israeli, ni tinduna ta matala, ni ta mazana, ni varangeli va hombe va mitiro ya hosi, va lo humesa a minyikelo hi matsenya.

⁷ Va lo nyikela a ku vuna a ntiro wa yindlu ya Nungungulu, 5,000 wa titalenta ta nzalama ni 10,000 wa tidarike, ni 10,000 wa titalenta ta siliva, ni 18,000 wa titalenta ta suku, ni 100,000 wa titalenta ta ziketse.

⁸ Lava va nga wa hi ni maribye ya lisima, va lo ma nyikela a kuva ma engheniswa lomu ka zilo za yindlu ya Jehova, va ma nyikela mandleni ya Jehieli a muGerxoni.

⁹ A vanhu va lo tsaka hi kunyikela kabye, hakuva va lo nyikela minyikelo yabye ka Jehova hi matsenya; hosi Davida i lo tsaka nguvu.

¹⁰ Hikwalaho i lo bonga Jehova mahlweni ka tlhangano wontihe, aku: A ku bongiwe Jehova Nungungulu wa ka Israeli, a dadani wa hina, kala kupinzuka ni kupinzuka!

¹¹ Ga wena Jehova a wukulu ni ntamu, ni wudumo, ni kubasa, ni wuhosi, hakuva zontlhe lezi zi nga le tilweni ni laha misaveni za wena; a mufumo ngwa wena Jehova, wena loyi u tlakukileko, u hi hosi hehla ka zilo zontlhe! 1 Tim. 1:17; Kuv. 4:11; 5:12

¹² A mufumo ni wudumo zita hi ka wena; wena u fumelako zilo zontlhe; a ntamu ni wunhenha zi le canjeni ga wena; hi wena u zi kotako a ku nyika wukulu ni ntamu ka vontlhe.

¹³ Nungungulu wa hina, makunu ha ku bonga, hi dumisa a vito ga wena go basa.

¹⁴ Hakuva nzi maniwo, ni vanhu va mina zini, ko kala hi zi kota ku nyikela a zilo lezi ke? Hakuva zontlhe zita hi ka wena; lezi hi ku nyikileko hi zi kumile canjeni ga wena.

¹⁵ Hakuva hina hi valuveli ni vaenzi mahlweni ka wena, kota vontlhe vadadani va hina; a masiku ya hina laha misaveni ma fanana ni nzhuti, a ku na kutsumba laha. Levi 25:23; Joba 8:9; Maheb. 11:13

¹⁶ Jehova Nungungulu wa hina, zontlhe zilo lezi hi zi longiseleko ku aka ha zona a yindlu, yi lumbako vito ga wena go basa, zita hi le canjeni ga wena, zontlhe za wena.

¹⁷ Nungungulu wa mina, nza zi tiva lezaku wena wa hlola a mbilu, ni lezaku wena u xalaliswa hi kululama. Loku ku hi mina, nzi nyikele zontlhe lezi zilo hi kutsaka ka mbilu ya mina; ni kambe a vanhu va wena lava va nga laha, nzi va wonile hi kutsaka loku va humesa a minyikelo yabye.

¹⁸ Jehova Nungungulu wa vadadani va hina, Abrahama, na Isaka, na Israeli, maha lezaku a timbilu ta vanhu va wena tiva ni maalakanyo ni mixuvo ya kunghahi kala kupinzuka, ni kuranza ka maalakanyo yabye, u koka a timbilu tabye ka wena.

¹⁹ U nyika ka nʼwana wa mina Solomoni a mbilu yi mbheleleko a ku hlayisa milayo ya wena, ni timhaka ta wena, ni zileletelo za wena, ni ku maha a zilo lezi zontlhe, ni ku aka a yindlu leyi nzi yi longiseleko!

²⁰ Davida i te ngalo ka wontihe tlhangano: Dumisani Jehova Nungungulu wa nwina! Zonake wontihe tlhangano wu lo dumisa Jehova Nungungulu wa vadadani vabye, va khizama mahlweni ka Jehova ni ka hosi.

²¹ A siku gi gamelako va lo phahlela ka Jehova, va maha minyikelo ya kuhiswa; 1,000 wa tihomu, ni 1,000 wa tihamba, 1,000 wa tiyivana, ni minyikelo ya zakunwa, ni miphahlelo yo tala nguvu ya va ka Israeli vontlhe.

²² Va loga, vanwa, mahlweni ka Jehova lego siku na va tsakile nguvu; zonake Solomoni nʼwana Davida i lo wumbelwa a kuva hosi ga wumbiri; va mu tota hi mafura mahlweni ka Jehova a kuva hosi, na Zadoke a kuva mupristi.

²³ Solomoni i to tshama xitshanwini xa wuhosi xa Jehova a kuva hosi xikhundleni xa Davida a dadani wakwe. I lo vuvuma, ni vontlhe va ka Israeli va lo mu ingisa.

²⁴ Tontlhe tihosana ni tinhenha, ni vontlhe vana va hosi Davida, va lo ti koramisa lahasi ka hosi Solomoni.

²⁵ Jehova i lo mu tlakusa nguvu Solomoni mahlweni ka vontlhe va ka Israeli, a kulisa kufuma kakwe ku hunza kufuma ka tihosi ta ka Israeli leti ti nga fuma mahlweni kakwe.

²⁶ Makunu Davida nʼwana Jese i wa fumele vontlhe va ka Israeli.

²⁷ A xikhati lexo a nga fumela va ka Israeli ha xona ku wa hi 40 wa malembe; le Hebroni i lo fuma 7 wa malembe, le Jerusalema i lo fuma 33 wa malembe.

²⁸ I lofa na a khosahele nguvu, na hi ni masiku yo hlaya, na hi ni titshomba, ni wudumo; a nʼwana wakwe Solomoni i lo fuma xikhundleni xakwe.

²⁹ A mitiro ya hosi Davida yo sangula ni yo gumesa, yi tsalilwe lomu bhukwini ga Samueli, a muwoni, ni lomu bhukwini ga muprofeti Natani, ni lomu bhukwini ga muwoni Gadi.

³⁰ Ku tsalilwe ni matimu ya kufuma kakwe kontlhe, ni wunhenha gakwe ga hombe, ni lezi zi nga humelela xikhatini xakwe, ni za lomu tikweni ga ka Israeli, ni za matiko wontihe.