1 Kronekele 22 - Tshwa Bible

Davida a longisela tempeli.

¹ Zonake Davida i te ngalo: A yindlu ya Jehova Nungungulu yi tava kwalaha, ni alati ga munyikelo wa kuhiswa wa va ka Israeli gi tava kwalaha.

² Davida i lo tsombanyisa vontlhe valuveli lava va nga wa hi lomu tikweni ga ka Israeli, a leletela a vavatli va maribye lezaku va vatla maribye yo aka ha wona a yindlu ya Nungungulu.

³ I lo longisa a ziketse zo tala zo maha ha zona tikhokho ta tivati ta tinyangwa ni ta timhingu, ni suku wo tala nguvu wu nga hiko na kupimiwa.

⁴ Ni tisinya ta tisedare ta tsanzavahlayi, hakuva a vaSidoni ni vaTire va wa nehile a tisinya to tala nguvu ka Davida.

⁵ Hakuva Davida i waku: A nʼwana wa mina Solomoni wa ha hi muswa, a nga na ntamu; kanilezi a yindlu leyi yi ta nga aketwa Jehova yi fanele ku saseka nguvu, yi dzunzeka ni ku dumiswa lomu matikweni wontihe. Hikwalaho nzi ta yi longisela. Zinghaho Davida i lo longisela a zilo zinyingi na a nga se kufa.

⁶ Zonake i lo vitana nʼwana wakwe Solomoni, a ta mu leletela a ku aka a yindlu ya Jehova Nungungulu wa ka Israeli.

⁷ Davida i te ngalo ka nʼwana wakwe: Nzi wa xuvile ku aka a yindlu yi lumbako vito ga Jehova Nungungulu wa mina. 2 Sam. 7:2

⁸ Kanilezi a gezu ga Jehova gi lota ka mina, gi taku: Wena u halatile nguvu nkhata, u lwile tiyimpi ta hombe; cima a ku zi koti a ku aka a yindlu yi lumbako a vito ga mina, hakuva u halatile a nkhata wo tala misaveni kuwoneni ka mina.

⁹ Languta u ta pswalelwa nʼwana loyi a ta ngava munhu wo rula; nzi ta mu nyika kuhumula xikari ka vontlhe valala vakwe va wontihe matlhelo, hakuva a vito gakwe i tava Solomoni; a masikwini yakwe nzi ta nyika va ka Israeli a kuhumula.

¹⁰ Hi yena a ta nga aka a yindlu yi lumbako a vito ga mina; i tava nʼwana wa mina, na mina nzi tava raru wakwe. Nzi ta yimisa a xitshamu xakwe xa wuhosi hehla ka va ka Israeli kala kupinzuka. 1 Tih. 5:5; Tis. 89:27; Maheb. 1:5

¹¹ Makunu, nwananga, ngha Jehova ava zinwe na wena, u vuvuma, u aka a yindlu ya Jehova Nungungulu wa wena, khwatsi hi lezi yena a wulileko xungetano ha wena.

¹² Ntsena Jehova a ku nyike a wutlhari ni malanga, a ku nyikela ku fumela hehla ka va ka Israeli, a ku nyika a ku hlayisa a milayo ya Jehova Nungungulu wa wena.

¹³ Zonake wena u ta vuvuma, loku u lonzowota ni ku hlayisa a milayo ni zileletelo za Jehova lezi a nga leletela va ka Israeli hi nomu wa Mosi. Tiya hlana, u ngave na hlenekera! U nga chavi, u mbhela ntamu! Deut. 31:7; Jox. 1:7

¹⁴ Languta, kwalomu kuhlokisweni ka mina nzi longisile za yindlu ya Jehova 100,000 wa titalenta ta nzalama, ni 1,000,000 wa titalenta ta siliva, ni suku ni ziketse, lezi zi nga hiko na kupimiwa xikalweni hi kota ya wunyingi ga zona. Nzi longisile ni tisinya ni maribye, wenawu kambe u ta zi engetela.

¹⁵ Nguvunguvu wena u na ni vatiri vanyingi: vavatli va maribye, ni vaaki, ni vavatli va mapulango, ni tontlhe tixaka ta vanhu va tlharihileko ka yontlhe mitiro.

¹⁶ Kasike a nzalama ni siliva, ni suku ni ziketse, zona a zi hlayiwi. Suka u tira! Jehova ave zinwe na wena!

¹⁷ Zonake Davida i lo leletela tontlhe tihosana ta ka Israeli a ku vunetela nʼwana wakwe Solomoni;

¹⁸ aku ka tona: Jehova Nungungulu wa nwina a nga zinwe na nwina ke? A nga mu nyikangi kuhumula matlhelweni wontihe ke? Hakuva yena i nyikele mandleni ya mina vontlhe vaaki va tiko, makunu a tiko gi rulile mahlweni ka Jehova ni ka vanhu vakwe.

¹⁹ Makunu lavani Jehova Nungungulu wa nwina hi timbilu ta nwina tontlhe, ni mihefemulo ya nwina yontlhe; mu suka mu aka a yindlu ya ku basa ya Jehova Nungungulu, mu neha a arke ga xivumelwano xa Jehova, ni zibya za ku basa za N ungungulu lomu ndlwini leyi mu ta nga yi akela vito ga Jehova.