1 Kronekele 21 - Tshwa Bible

A ntungu anzhako ka kuhlayiwa ka vanhu.

¹ Satani i lo vukela va ka Israeli, a kucetela Davida a ku hlaya va ka Israeli.

² Davida aku ka Joabe ni ka tihosana ta vanhu; Fambani mu hlaya va ka Israeli kusukela le Berexeba kala le Dani, mu ta ta nzi tivisa kasi nza fela ku tiva a tsengo wabye.

³ Joabe i te ngalo: Jehova a engetele a vanhu vakwe hi ka zana a tsengweni wabye! Kanilezi, hosi yanga, vona a hi malanza ya hosi ya mina ke? Hikuyini a hosi ya mina yi lavako a xilo xa kunghahi ke? Hikuyini hi ta nga vangela Israeli a nanzu?

⁴ Hambu lezo Joabe i lo ingisa a timhaka ta hosi, a Suka a renzelekela wontihe matiko ya ka Israeli, a tlhela a wuya Jerusalema.

⁵ Joabe i lo ta byela Davida a tsengo wa vanhu lava va hlayilweko: lomu tikweni gontlhe ga ka Israeli ku wa hi ni 1,100,000 wa vavanuna lava va khomako matlhari; lomu tikweni ga ka Juda ku wa hi ni 470,000 wa vavanuna lava va khomako matlhari.

⁶ A ku hlayiwangi va ka Levi ni va ka Benjamini lomu xikari kabye, hakuva a timhaka ta hosi ti wa hi manyala ka Joabe.

⁷ Nungungulu i lo tsanwiswa hi mhaka leyo, a hlasela va ka Israeli.

⁸ Davida i te ngalo ka Nungungulu: Nzi onhile nguvu hi ku maha lezi! Makunu susa a xionho xa nanza ga wena, hakuva nzi mahile hi wupumbu ga hombe.

⁹ Zonake Jehova i lo wulawula ka Gadi, a muwoni wa Davida, aku:

¹⁰ Famba u ya byela Davida uku: Jehova i ngalo: Nza veka a zilo zinharu mahlweni ka wena; hlawula a xinwe lexi nzi ta nga ku mahela xona.

¹¹ Zonake Gadi i lota ka Davida a taku kakwe; Jehova i ngalo: Hlawula lexi u xi lavako:

¹² A malembe manharu ya ndlala; kutani tihweti tinharu na u riziwa hi valala va wena na u kari u tlhabyiwa hi supado yabye; kutani masiku manharu lawa a supado ya Jehova ni ntungu zi ta ngava lomu tikweni ga ka Israeli, a ngelosi ya Jehova na yi kari yi rida tiko gontlhe ga ka Israeli. Alakanyela u nzi byela lezi nzi faneleko ku ya hlamula loyi a nzi rumileko.

¹³ Davida i te ngalo ka Gadi: Nzi na ni gome ga hombe nguvu. Nzi ta wela mandleni ya Jehova, hakuva a wuxinji gakwe ga hombe nguvu; ngha nzi nga weli mandleni ya vanhu.

¹⁴ Zinghaho Jehova i lo rumela a ntungu lomu tikweni ga ka Israeli; ku lofa 70,000 wa vanhu va ka Israeli.

¹⁵ Nungungulu i lo rumela a ngelosi a ku ya lovisa a Jerusalema; laha a ngelosi yi nga kari yi hlasela, Jehova i lo karateka hi kota ya khombo ga kona, aku ngalo ka yona; Ku ringene! Makunu tlhelisa a canja ga wena! A ngelosi ya Jehova yi lo yima laha nzhimbyeni wa Ornani a mujebusi.

¹⁶ Laha Davida a nga tlakusa a mahlo yakwe i lo wona a ngelosi ya Jehova na yi yima laha xikari ka tilo ni misava, na yi welele supado canjeni ga yona yi tlakusela Jerusalema. Zonake Davida ni masingalakati va lowa lahasi hi tinghohe tabye na va ambele a tinguwo ta tisakwa.

¹⁷ Davida i te ngalo ka Nungungulu: A hi mina nzi rumisileko lezaku ku hlayiwa vanhu ke? Hi mina nzi onhileko, nzi mahileko kubiha ka hombe nguvu; kanilezi a tiyivu leti, xini ti mahileko? Jehova Nungungulu wa mina, ngha a canja ga wena gi hi hehla ka mina, ni hehla ka yindlu ya raru wa mina; ngha gi nga hi hehla ka vanhu va wena gi va daya!

¹⁸ Zonake a ngelosi ya Jehova yi lo leletela Gadi ku ya byela Davida lezaku a kanziha a ya longisa a alati ga Jehova le nzhimbyeni wa Ornani a mujebusi.

¹⁹ Davida i lo kanziha kota kuwula ka Gadi loku a mu byelileko vitweni ga Jehova.

²⁰ Laha Ornani a nga hunzuluka a cuwuka le nzhako, i lo wona a ngelosi, ni mune wa vafana vakwe lava a nga wa hi navo va lo fihlala. Ornani i wa kari a phopha mavele.

²¹ Davida i lota ka Ornani. A xikhati Ornani a nga wona Davida, i lo huma lomu nzhimbyeni a ya khizama lahasi mahlweni kakwe.

²² Davida aku kakwe: Nzihe wutshamu laha nzhimbyeni wa wena, kasi nzi fela ku akela laho a alati ga Jehova; nzi nyike u hlaya a tsengo wa mali ya gona yontlhe, kasi a ntungu wu fela ku suswa hehla ka vanhu.

²³ Ornani i te ngalo ka Davida; Hosi yanga, gi teke u maha lezi zi ku xalalisako; nzi ta ku nyika ni tihomu to maha ha tona muphahlo wa kuhiswa, ni tikareta u maha ha tona tihunyi, ni mavele yo maha ha wona munyikelo; zontlhe lezo nza ku nyika.

²⁴ Hosi Davida i te ngalo ka Ornani: Ahihi, nzi lava ku xava gontlhe legi hi mali, hakuva a nzi zi koti ku teka lezi zi nga za wena nzi zi nyikela ka Jehova; a nzi zi koti ku maha a muphahlo wa kuhiswa hi zilo nzi nga zi rihelangiko.

²⁵ Zonake Davida i lo nyikela ka Ornani 600 wa maxekeli ya nzalama kasi ku xava wutshamu lego.

²⁶ Davida i lo aka laho a alati ga Jehova, a maha miphahlo ya kuhiswa ni ya kubonga, a khongela ka Jehova. Yena i lo mu hlamula hi nzilo, wuta hi le tilweni laha alatini ga muphahlo wa kuhiswa.

²⁷ Zonake Jehova i lo byela a ngelosi a ku tlhelisa a supado kocelweni wa yona.

²⁸ Xwalexo xikhati, laha Davida a nga wona lezaku Jehova i mu ingisile le nzhimbyeni wa Ornani, a mujebusi, i lo nyikela a miphahlo laho.

²⁹ Hakuva a tabemakeli ga Jehova legi Mosi a nga wa gi mahile le xiwuleni, ni alati ga minyikelo ya kuhiswa zi wa ha hi le xitsungeni xa le Gibeoni hi lexo xikhati.

³⁰ Kanilezi Davida i lo tsanzeka a kuya mahlweni ka alati lego a ya wutisa ka Nungungulu, hi kota yo chava a supado ya ngelosi ya Jehova.