1 Kronekele 18 - Tshwa Bible

A kuhlula ka Davida.

¹ Anzhako ka lezo Davida i lo hlasela a vaFilistia a va khozisa, a teka Gati ni miti ya kona mandleni ya vaFilistia.

² I lo hlasela ni maMoabi ma maha malanze yakwe, ma luva kakwe. Mitse. 24:17

³ I lo hlasela Hadarezera a hosi ya le Zoba, kusuhani ni le Hamate, kota lezi a nga wa yile ku ya tiyisa a mufumo wakwe le Congweni wa Eufrate.

⁴ Davida i lo mu wutlela 1,000 wa tikareta ni 7,000 wa vakhileli va mahaxi, ni 20,000 wa lava va fambako hi milenge, a phewulela misiha ya milenge ya mahaxi ya tontlhe tikareta, a ti siyela a 100 wa tikareta.

⁵ A maSiria ya le Damasku ma lo ta vunetela Hadarezera a hosi ya le Zoba, Davida a daya 22,000 wa maSiria.

⁶ Davida i lo veka mabutho le Damasku le tikweni ga maSiria zonake a maSiria ma lo maha malanza ya Davida, ma luva kakwe. Kontlhe lomu Davida a nga waya kona Jehova i lo mu nyika ku hlula.

⁷ Davida i lo teka a zitlhangu za nzalama lezi zi nga wa hi za malanza ya Hadarezera, a zi neha le Jerusalema.

⁸ I lo teka a suku wo tala nguvu le mitini ya Tibhate ni Kuna, a miti ya Hadarezera. Hi suku lowo Solomoni a nga maha ha wona a bimbi ga suku, ni timhanze ni zibya za suku.

⁹ Laha Tou a hosi ya le Hamate a nga wa zwile lezaku Davida i hlasele tontlhe a tiyimpi ta Hadarezera a hosi ya le Zoba,

¹⁰ i lo rumela a nʼwana wakwe Hadoramu ka hosi Davida, ku ya mu rungula ni ku ya mu bonga, hi kota ya lezi a ngalwa na Hadarezera a mu khozisa, hakuva Hadarezera i wa lwile na Tou. Hadoramu i lota ni zibya za nzalama ni za siliva ni za suku za tixaka ti tsalangeneko.

¹¹ Zona kambe hosi Davida i lo zi nyikela ka Jehova, zinwe ni siliva ni nzalama, lezi a nga wa zi phangile matikweni wontihe ya ka Edomi, ni ya ka Moabi, ni ya vana va ka Amoni, ni ya vaFilistia, ni ya vaAmaleki.

¹² Abixai nʼwana Zeruia i lo hlasela 18,000 wa vaEdomi le nkoveni wa Munyu.

¹³ Zonake i lo veka a mabutho le tikweni ga Edomi, a vaEdomi va maha malanza ya Davida. Kontlhe lomu Davida a nga waya kona Jehova i lo mu nyika kuhlula. Mitse. 24:18

¹⁴ Davida i lo fumela va ka Israeli vontlhe, a lamula hi nongameto a timhaka tontlhe ta vanhu vakwe.

¹⁵ Joabe nʼwana Zeruia i wa hi nduna ya yimpi; Jehoxafate nʼwana Ahiluda i wa hi muhlayisi wa mitsalo.

¹⁶ Zadoke nʼwana Ahituba na Abimeleki nʼwana Abiatura, va wa hi vapristi; Xavxa i wa hi mutsali.

¹⁷ Benaia nʼwana Jehoiada i wa hi nduna ya vaKereti ni vaPeleti; kanilezi a vana Davida va wa hi vahombe va gamela hosi.