1 Kronekele 13 - Tshwa Bible

Davida a ringa ku neha a arke Jerusalema.

¹ Davida i lo xuxa xikungo ni tinduna ta matala, ni ta mazana ni vontlhe varangeli,

² aku ka tlhangano wontihe wa va ka Israeli: Loku zi sasekile ka nwina, ni loku zita hi ka Jehova Nungungulu wa hina, a hi rumeleni vanhu matlhelo wontihe ka vanakulori lava va seleko lomu matikweni wontihe ya ka Israeli, ni ka vapristi, ni va ka Levi, lomu mitini yabye ni zimitaneni zabye, lezaku kasi va fela ku ta tlhangana zinwe na hina;

³ kasi hina hi fela ku neha a arke ga Nungungulu wa hina, hakuva a hi wutisangi ka gona xikhatini xa Saule.

⁴ A tlhangano wontihe wu lo vumela ku maha lezo, hakuva a timhaka leto ti wa lulamile mahlweni ka vanhu vontlhe.

⁵ Zinghaho Davida i lo tsombanyisa vontlhe va ka Israeli, kusukela Congweni wa Xihore wa le Gipite kala nyangweni ya Hamate a kuva va ta neha a arke ga Nungungulu le Kiriat-Jearimu.

⁶ Zonake Davida ni vontlhe va ka Israeli va lo kanziha vaya Baala le Kiriate-Jearimu legi gi nga ga ka Juda, va ya teka a arke ga Nungungulu, a Jehova loyi a tshamako xikari ka makerubima, laha ku khongeliwako a vito gakwe kona.

⁷ Va lo khonela a arke ga Nungungulu lomu kareteni ya yiswa, va gi humesa lomu ndlwini ya Abinadaba; makunu Uzza na Ahio va wa hi vafambisi va kareta,

⁸ Davida ni vontlhe va ka Israeli va wa kari va kina mahlweni ka Nungungulu hi ntamu wabye wontihe, na va yimbelela hi zitende ni timbila, ni tingomana, ni makhombela, ni mipunzu.

⁹ Makunu laha va nga chikele nzhimbyeni wa Kidoni, Uzza i lo nawuluta a canja gakwe a khoma a arke, hakuva a tihomu ti wa lava ku gi wisa.

¹⁰ Zonake a zanga ya Jehova yi lo vura yi vukela Uzza, a mu daya hi kota ya lezi a nga nawuluta a canja gakwe hehla ka arke; hikwalaho yena i lofa mahlweni ka Nungungulu. Mitse. 4:15, 19

¹¹ Davida i lo karateka hi kota ya lezi Jehova a ngaba Uzza; zonake i lo chula wutshamu lego Perezi-Uzza kala nyamutlha.

¹² A siku lego Davida i lo chava Jehova, aku: Nzi ta gi nehisa kuyini a arke ga Nungungulu lomu ndlwini ya mina ke?

¹³ Zinghaho Davida a nga yisangi a arke laha mutini wakwe, kanilezi i lo gi yisa lomu ndlwini ya Obed-Edomi a muGiti.

¹⁴ A arke ga Nungungulu gi lo tshama tihweti tinharu laha mutini wa Obed-Edomi, a ndlwini yakwe; Jehova i lo katekisa a yindlu ya Obed-Edomi ni zontlhe lezi a nga wa hi nazo.