1 Johani 4 - Tshwa Bible

Hlotani a mimoya.

¹ Varanzekako, mu nga kholwi mimoya yontlhe, kanilezi hlotani a mimoya mu tiva loku yi huma ka Nungungulu; hakuva a vaprofeti vanyingi va mawunwa va la suga fenemete laha tikweni. Jer. 29:8; Mat. 24:24; Kuv. 2:2

² Mu ta tiva a Moya wa Nungungulu hi lexi: Yontlhelele mimoya leyi yi wulako lezaku Jesu Kristu i tile nyameni nja Nungungulu; 1 Kor. 12:3

³ kanilezi a mimoya yontlhe leyi yi nga vumeliko a kuta ka Jesu nyameni a hi ya Nungungulu. Hi wona moya wa Mukaneti wa Kristu, lowu mu wu zwileko ku ngalo wata; makunu wu laha tikweni ni lezi. 2 Tes. 2:7; 2 Joh. 7

⁴ Vana vanga, nwina mu va Nungungulu, mu hlulile a vaprofeti va mawunwa; hakuva loyi a nga ka nwina ngwa hombe a ku hunza loyi a nga laha tikweni. Joh. 14:30

⁵ Vona mba tiko, hikwalaho va wulawula hi za tiko, ni tiko gi va ingisa. Joh. 3:31; 15:19

⁶ Hina hi vana va Nungungulu. Loyi a tivako Nungungulu wa hi ingisa; loyi a nga hiko wa Nungungulu a nga hi ingisi. Hi kota ya lezo ha wu tiva a moya wa zinene ni moya wa mawunwa. Isa. 8:20; Joh. 8:47; 14:17

Nungungulu liranzo.

⁷ Varanzekako, a hi ranzaneni, hakuva a liranzo lita hi ka Nungungulu; ni wihi loyi a nga ni liranzo i belekilwe hi Nungungulu, wa mu tiva Nungungulu.

⁸ Loyi a nga ranziko a nga mu tivi Nungungulu, hakuva Nungungulu liranzo.

⁹ A ku hi ranza ka Nungungulu ku wonekelisilwe hi lezi, Nungungulu i rumele a Nʼwana wakwe a belekilweko yece ata laha misaveni, kasi hina hi fela ku hanya ha yena. Joh. 3:16; Rom. 5:8

¹⁰ A liranzo hi leli, a hi lezaku hina hi mu ranzile Nungungulu, kanilezi hi yena a hi ranzileko, a rumela Nʼwana wakwe a kuva nzhiho wa zionho za hina. Joh. 15:16; Rom. 5:10

¹¹ Varanzekako, loku Nungungulu a hi ranzisile lezo, hinawu hi fanele ku ranzana. Mat. 18:33

¹² A ku na munhu a wonileko Nungungulu ni siku ni ginwe. Loku hi ranzana, Nungungulu i tshamile ka hina, ni liranzo lakwe li mbhelelisilwe ka hina.

¹³ Lezi hi tivako ha zona lezaku hi tshama ka yena na yena i tshama ka hina, hi loku a hi nyikile a Moya wakwe. Joh. 14:20

¹⁴ Hina hi zi wonile, hi maha wukustumunyu lezaku Dadani i rumile a Nʼwana a ku ta maha Muhanyisi wa tiko. Joh. 3:17; Xip. 1:1, 2

¹⁵ Kani hi wihi a vumelako lezaku Jesu i Nʼwana wa Nungungulu, Nungungulu i tshama ka yena, na yenawu i tshama ka Nungungulu. Rom. 19:9

¹⁶ Hina ha li tiva, hi kholilwe ka liranzo leli Nungungulu a hi ranzileko ha lona. Nungungulu liranzo, ni loyi a tshamako liranzweni i tshama ka Nungungulu, ni Nungungulu i tshama ka yena.

¹⁷ A liranzo li mbhelelisilwe xikari ka hina loku hi hi ni kutiya hi tlhelo ga siku ga kulamula; hakuva kota lezi yena a nga zona, hinawu hi zalezo tikweni legi. Jak. 2:13

¹⁸ A ku na kuchava liranzweni, kanilezi a liranzo leli li mbheleleko li hlongola kuchava. A kuchava ku longoloka ni kutsayiswa, ni loku munhu a chava a nga mbheleliswangi liranzweni.

¹⁹ Hina ha ranza, hakuva yena i lo ranga a hi ranza.

²⁰ Loku munhu a wula aku: Nza mu ranza Nungungulu, na a venga makabye wakwe, wa hemba; hakuva loyi a nga ranziko makabye wakwe loyi a mu wonako, a nga zi koti ku ranza Nungungulu loyi a nga mu woniko. Xip. 2:4

²¹ A kuleletela loku hi nyikilweko hi yena hi loku ku nge ngalo: Loyi a ranzako Nungungulu, a ranze ni makabye wakwe kambe. Mat. 22:37, 39