1 Johani 3 - Tshwa Bible

A vana va Nungungulu.

¹ Langutani lezaku liranzo la kuyini leli Dadani a hi ranzileko ha lona, lezaku hi vitanwa aku hi vana va Nungungulu; hakuva hi hina vona. A tiko a gi hi tivi, hakuva yenawu a gi mu tivangi. Joh. 1:12; 16:3

² Varanzekako, makunu hina hi vana va Nungungulu; kanilezi a zi se ku wonekeliswa lezi hi ta ngava zona. Ha zi tiva lezaku loku yena a wonekeliswa, hi ta fanana naye; hakuva hi ta mu wona kota lezi a nga zona. Isa. 56:5; Rom. 8:18; Fil. 3:21

³ Ni wihi loyi a nga ni kutsumba loku ha yena, wa ti basisa, kota lezi yena a basileko.

⁴ Ni wihi loyi a onhako i hambunyeta nayo; hakuva a kuonha hi ku hambunyeta nayo.

⁵ Nwina ma zi tiva lezaku yena i lo wonekeliswa kasi ku susa zionho za hina; a ka yena a ku na xionho. Isa. 53:5, 6; 2 Kor. 5:21

⁶ Kani hi wihi a tshamako ka yena a nga onhi; kani hi wihi a onhako a nga mu wonangi, ge ni ku mu tiva. 3 Joh. 11

⁷ Vana vanga, ngha mu nga kanganyiswi hi munhu; loyi a mahako lezi zi lulamileko i lulamile, kota lezi yena a lulamileko. Ezek. 18:5-9

⁸ Loyi a onhako ngwa Satani, hakuva Satani i onhile hi le kusanguleni. Kanilezi a Nʼwana wa Nungungulu i lo wonekeliswa lezaku a fela ku mbhetisa a mitiro ya Satani. Joh. 8:44; Maheb. 2:14

⁹ Kani hi wihi a belekilweko hi Nungungulu a nga onhi, hakuva a mbewu ya Nungungulu yi tshamile ka yena; a nga zi koti ku onha, hakuva i belekilwe hi Nungungulu. 1 Ped. 1:23

¹⁰ Hi xwalexo xi kombisako lava va nga vana va Nungungulu ni lava va nga vana va Satani: kani hi wihi loyi a nga mahiko lezi zi lulamileko a hi wa Nungungulu, ge ni loyi a nga ranziko makabye wakwe.

¹¹ Hakuva a mhaka leyi mu yi zwileko hi le kusanguleni hi leyi, lezaku hi ranzana; Joh. 13:34

¹² hi nga koti Kana, loyi a nga hi nʼwana wa loyi wa kubiha, a daya nakulobye. Xana i lo mu daya hikuyini ke? Hilezi a mitiro yakwe yi wa bihile, ni ya nakulobye yi wa lulamile. Gen. 4:4, 8

¹³ Mu nga hlamali, vamakabye, loku a tiko gi mu venga. Joh. 15:18, 19

¹⁴ Hina ha zi tiva lezaku hi humile kufeni hi enghena kuhanyeni, hakuva ha ranza vamakabye. Loyi a nga ranziko wa ha tshamile kufeni.

¹⁵ Kani hi wihi a vengako makabye wakwe, mudayi; nwina ma zi tiva lezaku a ku kona mudayi a nga ni wutomi ga pinzukelwa, legi gi tshamileko ka yena. Mat. 5:21; Gal. 5:21; Kuv. 21:8

¹⁶ Ha li tiva liranzo hi kota ya lexi, lezaku Jesu i lo nyikela kuhanya kakwe hi kota ya hina; hikwalaho hi yimelwe hi ku nyikela a kuhanya ka hina hi kota ya vamakabye. Joh. 3:16; Rom. 5:8

¹⁷ Kanilezi kani hi wihi a nga ni zilo za tiko legi, a wona makabye na a vumala, a nga mu hawukeli, a liranzo la Nungungulu li nga tshamisa kuyini ka yena? Deut. 15:7; Lu. 3:11

¹⁸ Vana vanga, ngha hi nga ranzi hi kuwulawula, kutani hi lirimi, kanilezi a hi ranzeni hi kumaha ni zinene. Ezek. 33:31; Jak. 2:15, 16

¹⁹ Hi kona hi ta nga zi tiva lezaku hi va zinene, hi tiyisa timbilu ta hina mahlweni ka yena. Joh. 18:37

²⁰ Hakuva loku a timbilu ta hina ti hi kona, Nungungulu wa hombe ku hunza timbilu ta hina, wa zi tiva zontlhe. 1 Kor. 4:4

²¹ Varanzekako, loku timbilu ta hina ti nga hi koni, hi na ni kutsumba ku tiyileko mahlweni ka Nungungulu; Joba 22:26; Maheb. 10:22

²² zonake ni xihi lexi hi xi kombelako, ha amukeliswa hi yena, hakuva ha hlayisa milayo yakwe, hi maha lezi zi mu xalalisako. Tis. 34:15; Jer. 29:12; Joh. 8:29

²³ A kuleletela kakwe hi loku, lezaku hi kholwa vitweni ga Nʼwana wakwe Jesu Kristu, hi ranzana kota lezi yena a nga hi leletela. Joh. 6:29; 15:12; 17:3; 1 Ped. 4:8

²⁴ Loyi a hlayisako a zileletelo zakwe i tshama ka yena, na yena i tshama kakwe. Ha zi tiva lezaku i tshamile ka hina hi Moya lowu a hi nyikileko wona. Joh. 14:23; 17:21; Rom. 8:9