1 Johani 2 - Tshwa Bible

¹ Vana vanga, nza mu tsalela timhaka leti lezaku kasi mu fela ku kala mu nga onhi. Kanilezi loku munhu a onha, hi na ni Muyimeli ka Dadani, a nga Jesu Kristu a lulamileko. 1 Tim. 2:5; Maheb. 9:24

² Hi yena a nga nzhiho wa ku susa zionho za hina, na ku nga hi za hina ntsena, kanilezi ni za tiko gontlhe kambe: Joh. 1:29; 4:42; Rom. 3:25

³ Hi laha hi zi tivako ha kona lezaku ha mu tiva, loku hi hlayisa a milayo yakwe.

⁴ Loyi a wulako aku: Nza mu tiva, na a nga hlayisi a milayo yakwe, wa hemba, ni zinene a zi kona ka yena.

⁵ Kanilezi ni wihi a hlayisako a mhaka yakwe, hakunene a liranzo la Nungungulu li mbhelelisilwe ka yena. Hi laha hi zi tivako lezaku hi kona ka yena. Joh. 14:23

⁶ Loyi a wulako aku i tshama ka yena, i yimelwe hi ku famba kota lezi yena a nga fambisa zona. Mat. 11:29; Joh. 15:4, 5; 1 Ped. 2:21

A nayo muswa.

⁷ Varanzekako, a nzi mu tsaleli a nayo muswa, kanilezi i nayo wa kale lowu mu nga hi nawo hi kusanguleni; a nayo lowu wa kale hi mhaka leyi mu yi zwileko. 2 Joh. 5

⁸ Ahembalezoke, nza mu tsalela a nayo muswa, lowu wu nga zinene a ka yena ni ka nwina; hakuva a munyama wa hunza, ni kuwonekela ka zinene ka woninga. Joh. 1:9; 13:34; Rom. 13:12

⁹ Loyi a wulako aku i le kuwonekeleni, na a venga a makabye wakwe, wa ha hi munyameni ni lezi.

¹⁰ Loyi a ranzako makabye wakwe i le kuwonekeleni, a ku na xikhunguvanyiso ka yena. 2 Ped. 1:10

¹¹ Kanilezi loyi a vengako makabye wakwe i le munyameni, i famba munyameni, a nga ku tivi laha a yako kona, hakuva a munyama wu dele a mahlo yakwe. Joh. 12:35

¹² Nza tsala ka nwina, vanana va tsongwani, hakuva a zionho za nwina zi tsetselelwe hi kota ya vito gakwe. Mat. 4:12; Lu. 24:47

¹³ Nza tsala ka nwina, vadadani, hakuva ma mu tiva loyi a nga hi kona hi le kusanguleni. Nza tsala ka nwina, majaha, hakuva mu hlulile loyi wa kubiha. Vanana, nzi mu tsalele, hakuva ma mu tiva Dadani.

¹⁴ Vadadani, nzi mu tsalele, hakuva ma mu tiva loyi a nga hi kona hi le kusanguleni. Majaha, nzi mu tsalele, hakuva mu na ni ntamu; a mhaka ya Nungungulu yi tshamile ka nwina, mu mu hlulile loyi wa kubiha. Efe. 6:10

¹⁵ Mu nga ranzi tiko, hambu ni zilo lezi zi nga lomu tikweni. Loku munhu a ranza tiko, a liranzo la Dadani a li kona ka yena. Mat. 6:24; Rom. 12:2

¹⁶ Hakuva zontlhe lezi zi nga laha tikweni: a kunavela ka nyama, ni kunavela ka mahlo, ni kutikulisa hi kota ya zilo za loku kuhanya, a ziti hi ka Dadani, kanilezi zita hi lomu tikweni.

¹⁷ Kanilezi a tiko ga hunza, ni kunavela ka gona; kanilezi loyi a mahako kuranza ka Nungungulu i ta tshama kala kupinzuka. 1 Kor. 7:31; Jak. 4:14; 1 Ped. 1:24

Mukaneti wa Kristu.

¹⁸ Vana vanga, makunu xikhati xo gumesa; kota lezi mu nga zizwa lezaku wata Mukaneti wa Kristu, hambu ni lezi va kona vanyingi vakaneti va Kristu; hi kota ya lezo ha zi tiva lezaku xikhati xo gumesa. Mat. 24:5; 2 Tes. 2:3; Maheb. 1:2

¹⁹ Va humele xikari ka hina, kanilezi va wa nga hi va hina; hakuva loku va wa hi va hina, ngha va simamisile zinwe na hina; kanilezi va lo huma kasi ku fela ku woneka lezaku vontlhe a hi va hina. Joh. 6:37; Miti. 20:30; 1 Kor. 11:19

²⁰ Nwina mu totilwe hi Loyi wa Kubasa, ma zi tiva zilo zontlhe. Joh. 10:4, 5; Miti. 3:14; Maheb. 1:9

²¹ Nzi mu tsalele, na ku nga hi lezaku mo kohlwa hi zinene, hakuva ma zi tiva, mu tiva ni lezaku a wunwa a gi humi lomu zineneni.

²² Himani Muhembi, loku ku nga hi yena loyi a kanetako lezaku Jesu hi Kristu ke? A Mukaneti wa Kristu hi yena loyi a kanetako Dadani ni Nʼwana.

²³ Kani himani a kanetako Nʼwana, yaloye a nga na Dadani; loyi a vumelako a Nʼwana i na ni Dadani kambe. Joh. 14:7, 9, 10; 15:23; 2 Joh. 9

²⁴ Lezi mu nga zizwa hi kusanguleni a zi tshame ka nwina. Loku zi tshama ka nwina lezi mu nga zizwa hi kusanguleni, nwinawu mu ta tshama ka Nʼwana ni ka Dadani. Joh. 14:23; 2 Joh. 6

²⁵ A xitsumbiso lexi a nga hi tsumbisa xona hi lexi, a wutomi ga pinzukelwa. Joh. 17:3

²⁶ Nzi mu tsalele a timhaka leti hi kota ya vona lava va lavako ku mu kanganyisa.

²⁷ Kanilezi a kutotiwa loku mu ku amukeleko hi ka yena ku tshamile ka nwina, a za ha laveki lezaku mu gonziswa hi munhu; kanilezi kota lezi a kutota kakwe ku mu gonzisako zontlhe zi nga zinene, na ku nga hi na wunwa, tshamani ka yena kota lezi ku mu gonzisileko. Jer. 31:33; Joh. 14:26; Maheb. 8:10

²⁸ Makunu, vana vanga, tshamani ka yena; lezaku hi fela kuva ni kutiya hi siku legi a ta nga wonekeliswa ha gona, hi nga hi na tingana mahlweni ka yena a kuwuyeni kakwe.

²⁹ Loku mu tiva lezaku yena i lulamile, zi tiveni lezaku ni wihi loyi a mahako lezi zi lulamileko i belekilwe hi yena. Miti. 22:14