1 Johani 1 - Tshwa Bible

A Gezu ga wutomi.

¹ Lexi xi nga wa hi kona hi le kusanguleni, lexi hi xi zwileko, lexi hi xi wonileko hi mahlo ya hina, ni ku xi khumba hi mandla ya hina, xungetano ni Gezu ga wutomi. Lu. 24:39; Joh. 1:1, 14; 20:27

² (Hakuva a wutomi gi lo wonekeliswa, hina hi gi wonile, hi maha wukustumunyu ha gona, hiba hungu ka nwina hi wutomi legi ga pinzukelwa, legi gi nga hi zinwe na Dadani, gi lo wonekeliswa ka hina,) Joh. 1:1, 2, 4; Rom. 16:26

³ lexi hi xi wonileko ni ku xizwa, hi lexo hi bako hungu ka nwina ha xona, kasi na nwinawu mu fela ku hlengela zinwe na hina; ina, a kuhlengela ka hina ku zinwe na Dadani ni Nʼwana wakwe Jesu Kristu. Miti. 4:20; 1 Kor. 1:9

⁴ Ha mu tsalela timhaka leti kasi a kutsaka ka nwina ka tatiseka.

Nungungulu hi kuwonekela.

⁵ A mhaka leyi hi yi zwileko ka yena hi leyi, ha mu tivisa yona, lezaku Nungungulu kuwonekela, a ku na munyama ka yena, ne ni kutsongwanyani.

⁶ Loku hi wula lezaku hi hlengele zinwe naye, kasi lezo ha ha famba munyameni, ha hemba wunwa, a hi mahi zinene. 2 Kor. 6:14

⁷ Kanilezi loku hi famba kuwonekeleni, kota lezi yena a nga kuwonekeleni, hina hi hlengele munwe ni munwani, ni nkhata wa Jesu a Nʼwana wakwe wa hi hlaza zionho zontlhe. Maheb. 9:14; 1 Ped. 1:19; Kuv. 1:5

⁸ Loku hina hiku ngalo a hi na kuonha, ha ti khohlisa, ni zinene a zi kona ka hina. 1 Tih. 8:96; Mat. 20:9

⁹ Loku hi vumela a zionho za hina, Nungungulu i tsumbekile ni kululama, lezaku a hi tsetselela a zionho za hina, ni ku hi hlaza kontlhe a kungalulami. Tis. 32:5; 51:2; Mat. 28:13

¹⁰ Loku hi wula lezaku a hi onhangi, ha mu maha muhembi, ni mhaka yakwe a yi kona ka hina.