యోబు 37 - తెలుగు సమకాలీన అనువాదం పవిత్ర గ్రంథం

¹ “వీటన్నిబట్టి నా హృదయం వణికిపోతుంది, దాని స్థలం నుండి దూకుతుంది.

² ఆయన స్వరం గర్జించడం వినండి, ఆయన నోటి నుండి వచ్చే ఉరుమును వినండి.

³ ఆయన తన మెరుపును ఆకాశమంతటి క్రింద విప్పుతారు దానిని భూమి చివర్లకు పంపుతారు.

⁴ దాని తర్వాత ఆయన గర్జన శబ్దం వినిపిస్తుంది; ఆయన తన గంభీరమైన స్వరంతో ఉరుముతారు. ఆయన స్వరం ప్రతిధ్వనిస్తున్నప్పుడు, ఆయన ఏది వెనుకకు తీసుకోరు.

⁵ దేవుని స్వరం అద్భుతమైన విధానాల్లో ఉరుముతుంది; మనం గ్రహించలేని గొప్ప వాటిని ఆయన చేస్తారు.

⁶ ఆయన మంచుతో, ‘భూమిపై పడు’ వాన జల్లుతో, ‘కుండపోత వర్షంగా కురువు’ అని ఆజ్ఞాపిస్తారు.

⁷ తద్వార మనుష్యులందరు ఆయన కార్యాన్ని తెలుసుకుంటారు, ఆయన ప్రజలందరినీ తమ ప్రయాసం నుండి విరమింపజేస్తారు.

⁸ జంతువులు వాటి గుహల్లోకి వెళ్లి వాటిలో దాక్కుని అక్కడే నివసిస్తాయి.

⁹ తుఫాను దాని స్థానం నుండి బయటకు వస్తుంది, వీచే గాలుల నుండి చలి వస్తుంది.

¹⁰ దేవుని ఊపిరి మంచును పుట్టిస్తుంది, మహా సముద్ర ఉపరితలాలు గడ్డకడతాయి.

¹¹ ఆయన దట్టమైన మేఘాలను తేమతో నింపుతారు; మేఘాలలో తన మెరుపులను వ్యాపింపజేస్తారు.

¹² భూమి అంతటి ఉపరితలం మీద ఆయన ఆజ్ఞాపించిన వాటన్నిటిని చేయడానికి, ఆయన నిర్దేశించిన మార్గంలో అవి చుట్టూ తిరుగుతాయి.

¹³ ప్రజలను శిక్షించడానికి లేదా తన భూమికి నీళ్లు పోయడానికి, తన ప్రేమను చూపించడానికి ఆయన మేఘాలను రప్పిస్తారు.

¹⁴ “యోబూ, ఇది విను; ఆగి దేవుని అద్భుతాలను గురించి ఆలోచించు.

¹⁵ దేవుడు మేఘాలను ఎలా అదుపు చేస్తారో తన మెరుపులను ఎలా ప్రకాశింపజేస్తారో నీకు తెలుసా?

¹⁶ మేఘాలు ఎలా సమతుల్యంగా వ్రేలాడుతున్నాయో, పరిపూర్ణ జ్ఞానం గలవాని అద్భుతకార్యాలు నీకు తెలుసా?

¹⁷ దక్షిణపుగాలికి భూమి ప్రశాంతంగా ఉన్నప్పుడు మీ బట్టలలో మీకు చెమట పడుతుంది,

¹⁸ ఇత్తడితో పోతపోసిన అద్దంలా, ఆకాశాలను విస్తరింపజేయడంలో ఆయనతో నీవు జత కలుస్తావా?

¹⁹ “మేము ఆయనతో ఏమి మాట్లాడాలో మాకు చెప్పు; మా చీకటిని బట్టి మా వాదనను సరిగా వినిపించలేము.

²⁰ నేను మాట్లాడతాను అని ఆయనకు చెప్పబడాలా? మ్రింగివేయబడటానికి ఎవరైనా అడుగుతారా?

²¹ గాలి వీచి మేఘాలు తొలగిపోయి తేటగా ఉన్నప్పుడు ఆకాశాల్లో ప్రకాశిస్తున్న సూర్యుడిని ఏ ఒక్కరు చూడలేరు.

²² అలాగే ఉత్తర దిక్కునుండి బంగారు తేజస్సుతో ఆయన వస్తున్నారు; భీకరమైన మహిమతో దేవుడు వస్తున్నారు.

²³ సర్వశక్తిమంతుడు మనకు మించినవాడు శక్తిలో ఉన్నతమైనవాడు; తన న్యాయం గొప్ప నీతిని బట్టి, ఆయన అణచివేయడు.

²⁴ కాబట్టి ప్రజలు ఆయన పట్ల భయభక్తులు కలిగి ఉంటారు, తమకు జ్ఞానముందని అనుకునేవారిని ఆయన లెక్కచేయరు.”