Yude 1 - Musamu wu Mubwe

Mabwehe

¹ Me Yude, muviha a Yisu Kristo na mwana a ngu a Yaki. Me ndi mu utsonehe muhanda mowunuwu, huli boosi ba Taata Nzambi hateele, ba nde hatondo na ba nde ubaakeelese mu Yisu Kristo.

² Nyaha kwili lingebe, hyenze na litondo bi byafulala, bava huli benu.

Yude akebisi Bamukristo mu ndongisili yi mapfuta

³ Bambaahi ba me ba litondo, me amba na lehemene li lafulala mu usonehele benu muhanda, mu tonyi itwadi hi liyobolo la bisu a benu. Me moni ti, me apfwana usonehele benu nde, mu uhwadisa benu mu ulwana mu tonyi a hiitu hi Nzambi haviidi va limosi, huli bisu a benu baatu bangidi.

⁴ Me ndi mu utsonehele benu, mu tonyi ati, ŋa hati la benu baatu bababi bakima, baamiiyakotelele benu mu tswehi. Bo bali baatu ba baavelekinza Nzambi a bisu, mu usobo bubwe bwa nde mu mbili a bo yi bumbembo. Na bo bali mu utunala ka Yisu Kristo, Mulongisi na Pfumu a bisu mumosi wu. Ka umata beleve, Libuuku la Ngidi laamiiyabisa tsyembili yi bo buyaka.

⁵ Eye, benu laamiikwayaba maana moosi nzyeni. Ka me ndi mu unzibwala benu monyi, buni Pfumu hayobili bisu Isereli hu tsi a Ngipiti. Na buni nde hadubi banga mutima ngototo.

⁶ Yibwalaani monyi mu bapofi ba baavelikeelese butsitu bwa biita la bo na ba baatimbi nzo a bo. Nzambi amiihada bo mu mapanga ma bitali, hutso a pipidi yinene, tswamina ilumbu hya tsundusu mu uto.

⁷ Yibwalaani ka monyi mu bisu Sodoomo na Ngomooro, na ba misyenge mikima mya bebele. Ba baakatsahala mu misyenge momiina, baaba na mbiili yi butsutsungu we yi bapofi mobaana. Baatu mobaana baakasa bumbembo, na mayamba. Bo bali na tsyembili ya mbaahu yi bilima na bilima. Yina yili kebisili huli baatu boosi.

⁸ Bumosi ka mu baatu ba baakotilili benu mu tswehi, bubaalooto ma mubaabehe tsumili mu manyutu ma bo. Bo bali mu urokolo lituma la Nzambi, na bo bubaatuha bapofi ba muyusu a hu yulu.

⁹ Tso mukuutu bapofi Mikayeli, a hasa buuna ve. Mu tangu yi nde hakasa litsotso na Satana mu tonyi a mvumbi a Moose, Mikayeli a hakesili nde tsyembili bituhi ve. Ka ndulu nde aleeli bunubu: «Nyaha Pfumu asyembe we!»

¹⁰ Ka baatu mobaniba bali mu urokolo bi bo baaveletsikaha. Na bi bo baayaba, bo baayaba byo we bibulu bya bwadi bi byavele buyedi. Mbiili moyina yili mu ubungasana bo.

¹¹ Lingebe huli bo! Mu tonyi ati, bo baasumihi we musumihi Kayini. Bo baadungi mu tonyi a lingi la mbongo, we bu mumbihuli Balaami hasiidi. Bo baakwidi mu tonyi ati, bo baatumbihi we bu Kore hasiidi.

¹² Baatu mobaana, bubaayungasa na bubaabiyasa mikuungi mya benu mi udya, mi itwadi hya baana bangu. Bo bubaadya itwadi na benu hwavele buyumu, na bo ubaatsima ndulu bo mwakulu. Bo bali we mayidu ma maleme, ma mavelenohese mvula, ma bifula bibaabita. Bo bali we miti mi myavelebuta mbutu, tso ŋa mwanga. Na bu bamitupala myo, myo mibaakwa kwa yoole.

¹³ Bo baafwanina na mapo ma mifudi ma mubu. Bo bali mu utswamisa ŋa busu bwa bo, mavanga ma bo ma tsonyi. Mavanga mo maana mali we mafudi ma mbindu yi mapo mubaatsindala. Bo bali we bamvwelele ba mikila. Na Nzambi amiiswehele bo mbuha a nzyeni hutso butsuhu bu bwafulala pipidi.

¹⁴ Enooke, kaaha a bisu wu mutsambu mu imbisa hya Adami, abihuli mu tonyi a baatu mo bababi baana. Nde abihuli: «Yuhani: Pfumu sa aya na biveeve na biveeve bi bapofi ba nde bangidi,

¹⁵ mu utsundasa baatu boosi. Pfumu sa asyembe banga masumu boosi mu tonyi mavanga mamabi. Pfumu sa asyembe bo, mu tonyi bituhi bi baatu mobaniba, ba baavele na buyumu baapalisi mu nde.»

¹⁶ Baatu mobaana a bubaaba na kinya ve, bo bali mu uŋono tangu yoosi mu idiingu hya bo. Bo bali mu udukala manzala ma linyungi la bo. Minywa mya bo mili mu upalisa mambu ma nyehe, ma usohese baatu mu ubaha kaluha.

Mukami mu ukangama mu Pfumu

¹⁷ Ka huli benu bambaahi ba me, yibwalaani monyi mu mambu ma bilumbi bya Pfumu a bisu Yisu Kristo, byayabisi benu hu tsomi.

¹⁸ Byo baayabisi benu: «Hu tsukusu a tangu, sa huba na bakwedi. Bo bukaakwede Nzambi na baatu ba nde. Na ba bukaadyata we bu huli matsimi mamabi, ma mu utahusa bo na Nzambi.»

¹⁹ Ni bo baana, bali mu ubehe burandu! Bo bubaaduukala matsimi ma nyutu a bo, na Livupu la Nzambi a lili mu bo ve.

²⁰ Ka benu, bambaahi ba me ba mutima, hwadaani mu ukula mu imiinu hya ngidi hya benu. Sambilaani mu matwala ma Livupu la Ngidi.

²¹ Kwilalaani ka hutso litondo la Nzambi, mu ukeele Pfumu a bisu Yisu Kristo. Mu bubwe bwa nde, benu luubaha monyi wu bilima na bilima.

²² Baani na kwili lingebe mu baatu ba bakini na matsika.

²³ Huli na bakima ba benu luutwala uyobolo, mu upalisa bo hutso a mbaahu. Huli bakima ka, kwilaani bo lingebe, kwili lingebe yi buyedi bwosi. Ka mu ukwila bo lingebe, baakelaani ukubaana bikutu bya bo, bi bili na mapiti ma mavanga ma bo ma musunya.

Muula a tsyelele

²⁴ Nzambi li na matwala ma ukeelese benu, mana benu livelebwa mu masumu. Na nde ni wu usa ti, benu limonehele baatu ba baavele ipiha, na ba baaluula mu kinya ŋa busu bu muyusu a nde.

²⁵ Nde li Nzambi mosi ndulu, ni nde ayobili bisu mu likumbasa la Yisu Kristo, Pfumu a bisu. Nyaha muyusu, bunene, matwala na lituma, biba na nde umata pangili a tsi, bunubu na mu bilima na bilima! Ameni.