Yowani 1 - Musamu wu Mubwe

Nziili Mukuma wu liyalala na wa monyi mu tsi

¹ Ŋa mbandu hwaba na Mukuma. Mukuma aba itwadi na Nzambi. Mukuma aba ni Nzambi.

² Buuna ŋa mbandu, Mukuma aba itwadi na Nzambi.

³ Byosi bi Nzambi havangi, nde avangi byo mu Mukuma. A hu li na isiha hi nde havangi hwavele Mukuma ve.

⁴ Mukuma aba ni suhu la monyi. Monyi mowuuna aviidi liyalala huli baatu boosi.

⁵ Liyalala libaayalusa piipidi. Ka piipidi a yaatwali udimasa lo ve.

⁶ Nzambi atsindihi muutu nga nduhi Yowani.

⁷ Nde ayidi we mbangi, mu uyata imbangi mu liyalala, mana baatu basa imiinu mu lo.

⁸ Yowani a habeedi liyalala ve. Ka nde ayidi mu uta imbangi mu liyalala.

⁹ Liyalala moliina laaba ni liyalala la mbuli a mbuli, li lili mu uya mu tsi. Lo lili mu uyalusa baatu boosi.

¹⁰ Mukuma aba mu tsi, na Nzambi avangi tsi mu nde. Ka baatu ba tsi a baadihuli nde ve.

¹¹ Nde ayidi huli baatu ba nde, ka baatu ba nde a baayaki nde ve.

¹² Ka boosi ba baayaki nde, na huli boosi ba baasiidi imiinu mu nde, nde aviidi bo muswa mu uba baana ba Nzambi.

¹³ Bo a bali baana ba Nzambi mu makila, buuve mu litondo li musunya ve, a tso mu litondo la muutu ve. Ka bo baabutimi baana ba Nzambi mu litondo la nde.

¹⁴ Mukuma akituhi musunya na nde atsahili ŋa hati la bisu, wu aluula mu hyese na imbuli. Bisu laakengisi muyusu a nde, muyusu wu Mwana wu livingu ali mu uyaka huli Taata a nde.

¹⁵ Yowani atiili nde imbangi na asiidi ileedi mohinihi: «Ni mu nde me anzambili ŋa me andeeli bunuubu: “Nde uya humbisa a me, ka nde akulala me, mu toni ati nde abeedi monyi tehele babuta me.”»

¹⁶ Bisu boosi laayaki ikuuku hi busina bwa hyese hya nde. Nde ayitili bisu lisyeme li lilahi.

¹⁷ Ni mbuli, Nzambi asalili Moose mu uva bisu Mikele. Ka ni mu Yisu Kristo, Nzambi habehili bisu hyese na imbuli bya nde.

¹⁸ A hu li na muutu wu amiimono Nzambi ve. Ka ndulu Mwana wu livingu, wu li Nzambi na wu ubaatsahala ŋa tsoho a Taata, ni nde amwese bisu buni Nzambi ali.

Imbangi hya Yowani Mutondihi

¹⁹ Bakuutu ba Bayudaayo ba Yeruselemi, baatsindihi banganga ba Nzambi na basalili ba mu nzo a Nzambi huli Yowani. Bo baayafuula nde bunuubu: «We na we li?» Mono imbangi hi Yowani hatiidi.

²⁰ Nde a haabisi uva bo mvutu ve. Ka nde asilisi payalala ŋa busu bwa boosi: «Me a handi Kristo ve.»

²¹ Na bo baafuuli nde: «Ka we ka na li? We ni Eliya?» Nde afutili bo: «Naana, me a handi Eliya ve.» Bo baabwefuula nde bunuubu: «We ka mumbihuli wu Nzambi hu utsindaha?» Na nde afutili ti «Naana!»

²² Bunuubu, bo baafuuli nde: «Ka we ka na li? Bisu lafwana uva mvutu huli ba batsindihi bisu. We ki lo leeli mu we mwakulu?»

²³ Yowani afutili bo ti: «Me ni “ndaha ya nde wuuna wu li mu uta ibila mu kumu: Vangimasaani nzila yi yasungama mu toni a Pfumu!”» Buuna ni bu mumbihuli Esaya hayaabisi.

²⁴ Baatu ba baatsindihi huli Yowani, aba Bafarisi.

²⁵ Bo baabwefuula nde bunuubu: «Ka we mu hima we ubaatondehe baatu, tso we a hali Kristo ve, buuve Eliya, buuve mumbihuli wu Nzambi hu utsindaha?»

²⁶ Yowani afutili bo bunuubu: «Me, me ndi mu utondehe benu mu mamba. Ka ŋa hati la benu, hu li na muutu wu benu laaveleyaba.

²⁷ Nde uya humbisa a me, ka me a handi wu akuha mu unyangula mikudu mi bikoodi bya nde ve.»

²⁸ Maana moosi mavangimi hu Betanya, hu simu lina la Yolodaani, hu Yowani hakatondehe baatu.

²⁹ Ilumbu hi hyadukili, nde amoni Yisu mu uyiila nde. Yowani aleeli: «Monwaani Limeme la Nzambi li libaamaasa masumu ma baatu.

³⁰ Ni mu toni a nde wunuuwu me andeeli: “Humbisa a me muutu mumosi li mu uya, ka nde akulala me. Mu toni ati, nde ateehili me uba monyi.”

³¹ Me a hakanzaba nde ve. Ka me anzidi mu utondehe mu mamba, mana buli li Isereli liyaba nde.»

³² Yowani atiidi imbangi mohinihi: «Me miimono Livupu la Ngidi mu ukulamana umata hu yulu mu ifwani hi libembe, na utsahala ŋa yulu a nde.

³³ Me a hakanzaba nde ve. Ka Nzambi atsindihi me mu utondehe mu mamba. Nde aleeli me bunuubu: “Nde wuuna wu we umono Livupu mu ukulamana na utsahala ŋa yulu a nde, ni nde wuuna utondehe mu Livupu la Ngidi.”

³⁴ Me miimono miina, buleeli Yowani, na me tiidi imbangi ti nde ni Mwana a Nzambi.»

Yisu li mu uteele bayihi ba nde baatsomi

³⁵ Ilumbu hi hyakaduukala, Yowani ayafutaha ŋaana na bayihi ba nde boole.

³⁶ Bu nde hamoni Yisu mu uvyoho, nde aleeli: «Monwaani Limeme la Nzambi!»

³⁷ Bayihi baboole ba Yowani baayuhi mambu momaana, na baaduukili Yisu.

³⁸ Yisu atali mbisa na amoni ti bo baakaduukala nde, na nde aleeli bo: «Benu hima lili mu usaha?» Bo baafutili: «Rabi, we huni ubaatsahala?» Mbindulili a Rabi: «Mulongisi».

³⁹ Nde afutili bo: «Yaani na benu sa limono.» Bo baayeni na nde, na baamoni hu nde hakatsahala. Bo baavyosi muyilala mowuuna na nde. Aba bebele na nguunga yi mana humbisa a mwangulu.

⁴⁰ Andele, muhehe a Simoni Peetelo, aba mumosi mu baboole ba baayuhi mambu ma Yowani na baaduukili Yisu.

⁴¹ Nde ayamono tsomi mwana a ngu a nde Simoni na aleeli nde: «Bisu limiisoolo Masiya!» Masiya mbindulili ni «Kristo».

⁴² Na nde abiti Simoni huli Yisu.Yisu atali nde swii, na aleeli: «We ni Simoni, mwana a Yowani. Sa bateele we Kefasi.» Kefasi mbindulili ti: «Manya».

⁴³ Mu ilumbu hi hyakaduukala, Yisu akani ufutaha hu Ngalili. Nde abwani na Filipo, na aleeli: «Duukala me!»

⁴⁴ Filipo aba musi Betesayida, musyenge a Andele na Peetelo.

⁴⁵ Titswene Filipo abwani na Natanayeli, na aleeli: «Bisu limiisoolo muutu wu Moose hasonihi mu muhanda Mikele, wu mimbihuli myasiidi lahi mu nde. Ni Yisu, mwana a Yosefi, musi Nazareti.»

⁴⁶ Natanayeli afuuli Filipo: «Hu Nazareti kaka, utwala uyiila dyambu li libwe?» Filipo afutili nde: «Yaanga, we sa mono!»

⁴⁷ Bu Yisu hamoni Natanayeli mu uyiila nde, nde aleeli nde: «Me lolo moni musi Isereli wa mbuli a mbuli. Bahala molinili kaka utwala upfuta!»

⁴⁸ Natanayeli afuuli nde: «We huni ayaaba me?» Yisu afutili nde: «Tswamina Filipo mu uteele we, me mbeedi amiimono we, ŋa we beedi hutsina muti a fiige.»

⁴⁹ Na Natanayeli abweleele nde: «Rabi, we li Mwana a Nzambi, we li Mutumi Isereli!»

⁵⁰ Yisu afutili nde: «Mu toni a bu me ndeeli we ti me moni we hutsina muti a fiige, we miisiila me hiitu? We sa mono mavanga ma maalutala bunene.»

⁵¹ Na nde abweleele: «Mu mbuli, mu mbuli me ndi mu undeele benu, benu sa limono mayulu bwasi, na bapofi ba Nzambi mu ukuma, na ukulamana ŋa yulu a nde Mwana a Muutu!»