Yaki 5 - Musamu wu Mubwe

Nzibusili huli bisina

¹ Bunuubu benu bisina, yuhani me! Lilaani, yayanani mu tonyi mapasi ma mu ubwila benu!

² Busina bwa benu buli bu bwabolo, na bikutu bya benu batsyedidi baamiisyehe byo.

³ Wolo na mbongo a benu, byamiiluula mu malali. Na malali momaana, mu uba huli benu we bambangi ba bu ukese benu. Na mo mu utsuha nyutu a benu yoosi we mbaahu. Buuna ni busina, bu benu laamiitsonzehe mu bilumbu mo bya tsukusu biniibi!

⁴ Monwani! Benu a laava pfuta basali ba matsyehe ma benu ve. Yuhani minyongo mya bo. Bililu bya bo, byamiito nate mu matswi ma Nzambi, Pfumu a tsi yoosi.

⁵ Benu laatsahili ŋa toto, hutso makinya na hutso a bya talu. Benu laanyebi we bibulu bi bali mu utsuha, mbadi bahehe byo makingu.

⁶ Benu laabelisi, benu laadubi wu asungama, hwavele uva nde muswa, wu ukalana linyutu la nde.

Ukeele pfutihili a Pfumu

⁷ Ni mu buuna, susaani pumi baana ba ngu, nate mu pfutihili a Pfumu. Tsimaani musali mangundu: nde li na isusi mu ubaakeele milunda mya toto mya talu, nate bu nde hu uyaka milunda mya tsomi na bikootele.

⁸ Benu kaka, susaani pumi, hwadisani mitima, mu tonyi ati, pfutihili a Pfumu yaka bebele.

⁹ Nyahani bikumini benu na benu baana ba ngu, kini Nzambi utsundasa benu. Mutsundisi amiikwateleme ŋa munywa a nzo.

¹⁰ Baana ba ngu, mimbihuli mi myakatoyo mu nduhi a Pfumu, myakasa mukonono bu baakamono pasi. Volwani ifwani hya bo.

¹¹ Eye! Bisu libaaleele, kinya huli ba baamiisa mukonono. Benu laayuhi buni Yobi hakuundi pasi. Na benu laamoni tsukusu yi Pfumu hasiili nde. Ka Pfumu aluula mu litondo, na lingebe.

Ngu musamu

¹² Hati a tsomi, baana ba ngu, a lilaba milabu, tso mu yulu, tso mu toto, tso mu pasi ndabili. Ka eye a benu, yiba «eye», naana a benu yiba «naana». Saani buuna, mana benu livelebwa mu tsyembili a Nzambi.

Lisambulu li itwadi

¹³ Muutu ŋa hati la benu li na pasi? Nyaha asambila. Muutu mumosi li mu kinya? Nyaha ayimba nyimbu.

¹⁴ Muutu ŋa hati la benu li na ubeele? Nyaha ateele bakuutu ba libundu, mana basambila mu nde, na bakuba nde maadi, mu nduhi a Pfumu.

¹⁵ Lisambulu la nga imiinu, lu ufuuhasa mubeedu mowuuna. Na Pfumu utelemese nde. Tso nde hasa masumu, nde uyaka kolo-kolo mu mo.

¹⁶ Baasiingani masumu ma benu ŋa busu bu bambaahi. Na baabitasanani bana mu masambulu, mana benu libeloho. Ŋa muutu wu akuha ubaasambila, lisambulu la nde, libaaba na mifudi.

¹⁷ Eliya aba muutu we bisu a benu. Nde asambili na mukonono mana mvula avelenoho ŋa toto. Buuna, bilima bitatu na batsungi basamunu, mvula a hanohi ŋa toto ve.

¹⁸ Titswene, nde abwesambila na Nzambi anohisi mvula, toto yabuti mimbutu.

Usaha na uyafutala ba baadimbala mu nzila

¹⁹ Baana ba ngu a me, tso muutu mumosi ŋa hati la benu tahuhi na imbuli, yabaani ti mukima utwala uyafutala nde.

²⁰ Muutu wu ubaayafutala musumihi mowuuna mu nzila, ufuuhasa muvumu a nde mu lipfu, na ufungala limya li masumu.