Yaki 4 - Musamu wu Mubwe

Susahani huli Nzambi

¹ Midingu na iboho bya benu, huni bili mu umata? Byo bili mu umata mu manzala ma benu ma nyinga, ma mali mu ulwana pasi tangu, mutso mitima mya benu.

² Benu libaanyungala isiha, ka benu utwala ubaha hyove. Ni mu buuna, benu lamiivangama mu uduba. Benu libaasaha ubaha isiha, ka benu utwala ubaha hyove. Ni mu buuna, benu libaakakana na libaalwana. Benu laavelebaha bi benu lili na byo nzala, mu tonyi ati, benu a lili mu uvondo byo huli Nzambi ve.

³ Ŋa benu libaavondo, benu libaaveleyaka, mu tonyi ati, masambulu ma benu mali we pinda bipolo. Na bi benu libaavondo, bili ndulu bi usalila mu uywatisa manzala ma benu mamabi.

⁴ Bimbembo mobinibi! Benu a liyabi ve ti, utondo mambu ma tsi, ni ubelele hwa Nzambi? Ni mu buuna, tso muutu tondi uba mbaahi a tsi, nde aka muboho a Nzambi.

⁵ Benu libaatsima ti, Libuuku la Ngidi mu pu laatoyo ŋa baaleele ti: «Nzambi ubaasa bisu likwabi mu livupu li nde hasusa mu bisu.»

⁶ Ka hyese hi Nzambi ubaava, hyabwefulala bunene. Hyo hibaaleele ti: «Nzambi abelele banga isaayi, ka nde ubaava lisyeme la nde, huli baatu banga a kulimini.»

⁷ Ni mu buuna, singalaani Nzambi, bisalaani Satana, na nde ubata benu.

⁸ Yasusahani huli Nzambi, na nde uyasusaha huli benu. Swahani myoho mya benu, benu baatu banga masumu. Tsyemesaani mitima mya benu, benu banga a moole-moole.

⁹ Baani mu lingebe, lilaani na nyongwani. Nyaha hyenze hya benu, hikituha ililu, na kinya a benu yikituha lingebe.

¹⁰ Kulamanaani ŋa busu bwa Nzambi, na nde usyenolo benu.

¹¹ Baana ba ngu, a litatasana benu na benu ve. Woosi wu uli mu utata mwana a ngu a nde, buve utsundasa nde, li mu urokolo Mikele na utsundasa myo. Buuna, pasi nde wu utsundasa Mikele, nde a hali mu ubwesalila myo ve, ka nde amiibinuha mutsundisi.

¹² Ni Nzambi siha li Musundi Mikele, na Mutsundisi. Nde utwala ufuuhasa, tso uduba byosi. Ka we, na we li, mu utsundasa muutu na we?

Ubata isayi

¹³ Bunuubu, yuhani me, benu ba libaaleele: «Loloyi buve ngwali, bisu lu uyene hu musyenge mowunuwu, bisu lu uvyoso ilima huuna. Bisu lu usa mumbungu a bisu, na bisu lu ubaha kaluha yindahi.»

¹⁴ Benu a liyabi ma mu uyiila benu ngwali ve. Mu tangu moyiina, idiingu hya benu buni hyu uba? Benu lili we libungi, li libaamonehele mu mwana tangu hole, na libaadimbala.

¹⁵ Monwani buni benu laafwana uleele: «Tso Pfumu tondi, bisu lu uba monyi na bisu lu usa hinihi, buve hinihi.»

¹⁶ Ka mu mbuli, benu lili baduni na banga livama. Mbiili ya pila moyiina, yili yimbi.

¹⁷ Ni mu buuna, tso muutu yabi uvanga lilibwe, na nde a havangi love, nde li mu usa lisumu.