Yaki 2 - Musamu wu Mubwe

Uvelesa burandu

¹ Baana ba ngu a me, a laapfuuta burandu na imiinu hi lili na hyo mu Pfumu a bisu a benu Nga Muyusu, Yisu Kristo ve.

² Monwani: isina imosi hyalwata mulunga a wolo na bikutu bi bibaamwedeme. Hyo hiyakoto mutso libundu la benu. Humbisa a kotili a nde, iyaha kaka hiyakoto na bikutu bya mbindu.

³ Bu benu lili mu utasila wu alwata bikutu bi bibaamwedeme, benu lu uleele nde: «We, tsahala ŋa mbuha yi likinzu yi!» Ka benu lu uleele huli iyaha: «We, ba mutele ŋana!» Buve: «Tsahala hutsina isuusili hya me hya milu!»

⁴ Ni buuna kaka, benu lili mu usa burandu ŋa hati la benu mwakulu. Benu lili banzonzi banga matsimi mamabi.

⁵ Yuhani baana ba ngu a me ba litondo, Nzambi asooli biyaha bya ŋa toto, mana byo biba bisina mu imiinu. Bisina mu imiinu byuba babahi ba mukobe a Ipfumu hi Nzambi hasiidi lahi, huli ba bubaatondo nde.

⁶ Ka benu limiikumba iyaha! A li buni! Bisina ti ni bi bili mu ukwamisa benu, na ubita benu mu manzo ma tsundusu. A ni buuna ve?

⁷ Ni byo bili mu ubaya nduhi yi likinzu, ya nde wuuna wu uli Pfumu a benu.

⁸ Ubamono ti benu likuhisi mukele Ipfumu hya Nzambi, we bu baasonehe mu Muhanda a Ngidi: «We utondo muutu na we, we we mwakulu.» Tso benu lisiidi buuna, benu livangi bubwe.

⁹ Ka tso benu libaamwese burandu, benu lili mu usa lisumu. Na benu laamiikwayaba ti laamiidyata Mikele mya Nzambi.

¹⁰ Ka tso muutu li mu udukala mikele myosi, na bwidi ndulu mu inzandi imosi ŋa hati li mikele, nde miibwa mu mikele myosi.

¹¹ Ni mu buuna, Nzambi wu aleele ti: «A hasa mayamba ve», aleele kaka ti: «A haduba ve». Tso we velisa mayamba, ka we li mu uduba, we li mutsali Mikele.

¹² Ka toywani na dyataani we baatu ba bu uyaka tsundusu, hutsina mikele mi bunyanga.

¹³ Mu tonyi ati, tsundusu yili yi yavele na lingebe, huli ba bubaavelemwese lingebe. Fula-fula lingebe libaabingala tsundusu.

Imiinu hi hyavele na mavanga hili hi hyakwa

¹⁴ Baana ba ngu a me, ki kaluha yili huli muutu mu ubaaleele ti: «Me ndi na imiinu», tso nde a hali mu umwese mavanga mamabwe ve? Imiinu hya buuna, utwala ufuuhasa nde ve.

¹⁵ Monwani: mwana a ngu buve kedi veli na hi ulwata, na kondiini byudya bya pasi ilumbu.

¹⁶ Mumosi mu benu leeli nde: «Yene mu hyenze, lwata ikutu hya piyu, na dya bubwe!» Tso nde leeli buuna, hwavele uva nde bi nde ali na byo nzala mu linyutu, tsoongo a mambu momaana ki yo?

¹⁷ Ni bumosi kaka mu imiinu. Tso hyo a hili na mavanga mamabwe ve, hyo hili hi hyakwa.

¹⁸ Ka muutu aleele: «We li na imiinu; me ndi na mavanga.» Mwese me imiinu hya we, hwavele mavanga. Na me, mu mavanga ma me, me umwese we imiinu.

¹⁹ We li mu usa hiitu ti, Nzambi ndulu mosi? Maana ni mambu mamabwe. Matengo kaka mali na hiitu mohiina, na mo mali mu utsula likamba.

²⁰ Ka we, itsuudu mohinihi, we afwana uyaba ti imiinu hi hyavele na mavanga mamabwe, hili hya mu pu!

²¹ Nzambi asilisi Abrahami kaaha a bisu a benu. Nde amoni nde muutu wu akuha mu tonyi mavanga mamabwe, bu nde hayayeholo mwana a nde Isaki mu bungodu ŋa yulu a diiku la tsuhili bungodu.

²² We li mu umono ti, imiinu hya nde hyakayene butsitsa na mavanga ma nde. Ni mu mavanga momaana, nde hakuhisi imiinu hya nde.

²³ Ni buuna hwavangimi ma baasonehe mu Mabuuku ma Ngidi: «Abrahami asiidi hiitu mu Nzambi, na Nzambi amoni nde wu akuha mu imiinu hya nde.» Na Nzambi ateeli nde mbaahi a nde.

²⁴ Benu lili mu umono ti, ni mu mavanga muutu ubaamonehele wu akuha, ka ndulu a mu imiinu ve.

²⁵ Bumosi kaka Rahabi, mukaasu nga mayamba, amonihili wu akuha ŋa busu bwa Nzambi, mu mavanga ma nde. Mu tonyi a bu nde hayaki bilumbi, na bu hafutili byo mu nzila kima.

²⁶ Ni we bu nyutu yi yavele na ilunzi, yili yi yakwa, bumosi kaka, imiinu hi hyavele na mavanga mamabwe, hili hi hyakwa.