Tiite 2 - Musamu wu Mubwe

Ndongisili huli baatu ba baakula

¹ Ka we Tiite, longese ma maayelemene na ndongisili yi yasungama.

² Leele huli babahala ba baakula, baba na mbiili yi yasungama na yi butsitu. Bo baafwana uba na tsiki, babaahwada mu imiinu, na mu litondo, na mu mukami.

³ Leele ka bumosi huli bakaasu ba baakula, bo baba na ndyatili yi yi umwese Nzambi kinya. Bo babaavelekusa, na uveleba baviha ba nwyili malamu yinono. Bo babaalongese mamabwe,

⁴ mana banumba batondo balumi na baana ba bo.

⁵ Bo bafwana uba banga butsitu na ba baatsyeme mu mitima. Bo bafwana uba na bisalili bibibwe, mu manzo ma bo ma makwele. Bo bafwana uluula mu bubwe na mu kulimini ŋa busu bu balumi ba bo. Buuna, muutu tso mumosi a hutwala ubaya mambu ma Nzambi ve.

Ndongisili huli bafudu

⁶ Ni bumosi, hwadisa ka pfudu-mbahala, mana baba na tsiki mu bitoyili bya bo.

⁷ We mwakulu Tiite, afwana umwese mbiili yimbwe, mana baatu badukala ifwani hya we. Ndongisili a we, yafwana uba ya mbuli na yi likinzu.

⁸ Mikuma mya we myafwana uba mi myaleme, mi baatu buuvelesa paha. We usa buuna, bambene ba we buukwa tsonyi, na uvelebaha dyambu li buusyembe bisu.

Ndongisili huli baviha

⁹ Tuma baviha, basingala bapfumu ba bo mu pasi dyambu. Bo bafwana ubamwese bapfumu ba bo kinya, mu ubaaveletungalala bo,

¹⁰ na uveleyibala bo pasi isiha. Ka baviha bafwana umonehele tangu yoosi, basalili bababwe. Moosi ma bo buupalisa, bo baafwana uvangimasa mo. Bo bavanga buuna, baatu sa bava muyusu mu mambu ma bisu libaalongese mu Nzambi Muyobili a bisu.

Buli la Yisu Kristo

¹¹ Eye, Nzambi amwesi mamabwe ma nde, mu tonyi ati nde asooli nzila yi uyobolo baatu boosi.

¹² Liyobolo mo lili mu ulongese bisu mu uveletahuha na Nzambi, na ubisa linyungi. Bisu livanga buuna mu tangu moyiniyi, bisu luuba na idingu hya tsiki, hya tsitsa na hi likinzu mu Nzambi.

¹³ Ni buuna, bisu lafwana ukeele ilumbu hya kinya hi bisu lili mu usa hiitu. Ilumbu mohina, Nzambi a bisu wu munene, wu uli Mufuhisi a bisu Yisu Kristo, sa amonehele hutso muyusu a nde.

¹⁴ Nde ayehuli nyutu a nde, mu unyahula mamabi ma bisu moosi. Eye, nde anyahuli mamabi ma bisu, mana nde akitula bisu ibandu hya nde hi hyatsyeme, hi hili na lehemene mu ukuhasa mavanga mamabwe.

¹⁵ Ni mu buuna, we afwana ulongese na uhwadisa ba bubaayuhala we. We afwana usyembe libundu na ibahala hyosi. Ba na buyedi, mana muutu tso mumosi a hapenye we.