Tiite 1 - Musamu wu Mubwe

Mabwehe

¹ Me Pahuli ndi mu utsonehele we muhanda mowunuwu. Ni me ndi muviha a Nzambi na ilumbi hya Yisu Kristo. Nzambi amiiva me isalu mu ubita baatu ba nde hamiisoolo, mu nzila imiinu. Nzambi amiiva me ka isalu hi uyabisa bo imbuli hi hyafwana, mana bo badyata mu mbiili ya ba baakinza Nzambi.

² Me ndi mu unzabisa bo imbuli, mana bo baba na hiitu hi ubaha monyi wu bilima na bilima wu li mu Nzambi. Monyi mowuna, Nzambi wu ubaavelepfuta, asiidi bisu lahi umata pangili a tsi.

³ Mu tangu yi nde hasooli, Nzambi Mufuhisi a bisu, ayabisi mambu ma nde. Ndongisili moyiina ni yi nde haviidi me mu ulongese baatu.

⁴ Ni huli we Tiite, me ndi mu utsonehe muhanda mowunuwu. We ni mwana a me wu litondo mu itwadi hi imiinu hi hyapfuuta bisu a we. Nyaha Nzambi Taata na Kristo Yisu Mufuhisi a bisu, basyeme we na uva we hyenze!

Isalu hya Tiite hu libundu la Kerete

⁵ Me atsiisi we hu iliiŋa hya Kerete, mu umanisala isalu. Na we soolo bakuutu ba libundu mu pasi musyenge, mu usalila tumili yi me apiidi we.

⁶ Mukuutu libundu afwana uba wu avele masyembo, na nde utwala uba ikama ve. Baana ba nde baafwana uba na hiitu mu Kristo, na bo utwala umwese imbangi hi ibi mu ndyatili a bo, buve umwese kene ve.

⁷ Pasi mukuutu libundu, ahwama na mupfuna a mambu ma Nzambi. Nde afwana ubaaba muutu wu avele na masyembo. Nde utwala uba nga isaayi tso nga makesi ve. Nde utwala uba ikolo-mbungu, tso nga bisongi, tso nga ngaabi.

⁸ Ka nde afwana uba muyaki a byenyi, buuna ni bubwe. Nde afwana utondo mavanga mamabwe, muutu nga tsiki, wu asungama, wa ngidi, wu ayaba ukuka linyutu la nde.

⁹ Mukuutu libundu afwana uba muutu wu akangama na mifudi, mu mambu ma mbuli, ma maabambana na Tsangu ya Mbuli yi bubaalongese nde. Buuna, nde afwana uba muutu wu ubaahwadisa bakima, na wu ubaava bo ndongisili ya mbuli. Nde afwana uba na matwala ma usyembe ba bubaabisa ndongisili a nde.

Pahuli ayelisi Tiite mu milongisi mi mapfuta

¹⁰ Yaabani ti, hu li na baatu babalahi ba bubaavelesingala bana na ba bubaapfuta bambaahi mu mambu ma maavele lisunga. Ŋa hati la bo, babalahi bali Bakristo ba baamata hu bula bu Bayudaayo.

¹¹ We afwana ukala bo mu utoyo. Mu tonyi ati, bo bali mu udimbasa imiinu hi mabuli ma baatu, mu ubaalongese ma mavelefwana. Bo bali mu ulongese mambu momaana, mu tonyi ati bo bayaka pfuta mu ngaabi.

¹² Mumosi ŋa hati la bisu iliiŋa mohiina, mumbihuli a bo mwakulu, aleeli bu: «Bisu Kerete bali banga mapfuta pasi tangu. Bo bali bibulu bi bukanyi, babolo na banga mubaka udya.»

¹³ Imbangi mohinihi, hili hya mbuli. Ni mu buuna, fwengele bo na mifudi, mana bo basa imiinu hya mbuli.

¹⁴ Bo babwevelekangama mu masahu ma ikulu hi Bayudaayo. Bo babwevelekangama mu mikele mya baatu ba bali mu utehele mambu ma mbuli mbisa.

¹⁵ Byosi bili bi byatsyeme, huli ba bali batsyeme. Ka isiha tso imosi a hili hi hyatsyeme, huli ba baasumaha na ba baavelesa hiitu ve. Mu tonyi ati, buyedi bwa ba baasumaha na matsimi ma mitima mya bo, bili bi byasumaha.

¹⁶ Bo bali mu uleele ti bo baayaba Nzambi. Ka mavanga ma bo, mali mu umwese ti bo bubaatunala nde. Bo bali banga muwala, ba baavele na lisingala, na ba baavelesa isalu tso imosi hi ibwe.