Ngalaatiya 6 - Musamu wu Mubwe

Ubitasana mipfuna

¹ Baana ba ngu, tso bayabiisa muutu bikuma mu uvanga lilibi, benu ba lili na livupu la Nzambi, sungahani nde mu bulembo. Na kebe we mwakulu kaka, mu uvelebwa mu lobese.

² Baabitasanani mipfuna: buna benu sa likuhasa mukele a Kristo.

Ukengese mavanga

³ Tso muutu li mu unyeme mu biita la nde, hwavele uba na tsongo, nde li mu upfuta nde mwakulu.

⁴ Pasi muutu abaakengese mavanga ma nde mwakulu. Buuna, nde utwala unyeme mu nde mwakulu, ka a mu muutu mukima ve.

⁵ Mu toni ati, pasi muutu ahwama na mavanga ma nde.

⁶ Nyaha muutu wu bamiilongese mambu ma Nzambi, akaba bi nde ali na byo na mulongisi a nde.

⁷ Kebaani: Nzambi a bubaakwede ve. Bi muutu ubaakuna, ni bi nde ubaakukaha.

⁸ Woosi wu ubaakuna mu musunya, nde sa akuukaha bi byabolo; bi bibaabita hu lipfu. Ka woosi wu ubaakuna mu Livupu, nde wuuna sa akuukaha bya monyi wu bilima na bilima.

⁹ A likolo mu uvanga mamabwe ve. Mu toni ati, sa likuukaha mu tangu yi yafwana, tso livelimwese ikolili.

¹⁰ Ni mu buuna, bu tangu yimonihili, libaavangani mamabwe huli pasi muutu, fula-fula huli baana ba ngu ba imiinu mu Kristo.

Mandongi ma tsyelele na mabwehe

¹¹ Me mwakulu ndi mu utsonehele benu mu tangu moyiniyi, we bu benu lili mu udihula bunene bu bisono bya me.

¹² Boosi ba bali mu ukwamisa benu ketili, bali mu usaha umonehele mu imuutu hya bo. Bo bali mu ukwamisa benu ketili, mana a batsundasa bo we ba bali mu usa imiinu mu kwili a Kristo ŋa kuruwa.

¹³ Ka ba baakete bo mwakulu a bali mu ukinza Mikele ve. Bo batondi ti bakete benu, mana bo basa nyeme mu ketili a benu.

¹⁴ Ka mu me, nyeme a me a yili mu biina byosi ve, ndulu mu kwili a Pfumu a bisu Yisu Kristo ŋa kuruwa. Mu nde mavanga mamabi moosi mamiikwa. Me kaka amiikwa ŋa busu bu mavanga ma tsi.

¹⁵ Ni mu buuna, tso huli wu baakete, buve wu baavelekete, tsongo yove: hya tsongo, ni mu ukituha muutu wu munyatihi.

¹⁶ Huli boosi ba bali mu usiingala ndongisili a me, me ndi mu undeele bunuubu: Nyaha hyenze na bubwe bwa Nzambi, biba mu bo na mu buli la Nzambi loosi!

¹⁷ Bunuubu, muutu a habwesa me mangongo. Mu toni ati, bikidi bi me ndi na byo, ni biliimbu bi bili mu umwese ti me aka wa Yisu.

¹⁸ Baana ba ngu mu Kristo, nyaha lisyeme la Pfumu a bisu Yisu Kristo, liba na benu boosi! Ameni!