Ngalaatiya 5 - Musamu wu Mubwe

Kristo li mu uva bunyanga

¹ Kristo ava bisu bunyanga mana bisu liba bunyanga mu mbuli. Ni mu buuna, hwadaani mu ubwevelefutaha hutso a ikoholo hi buviha.

² Yuhaani! Me Pahuli ndi mu undeele benu lo: Tso baketi benu mu uba ba baasungama ŋa busu bwa Nzambi, buuna Kristo a hasaali na tsoongo huli benu ve.

³ Me ndi mu umbwetsitasa lo siitasa likima, huli pasi muutu wu bali mu ukete: nde afwana ubaasiingala Mikele myosi.

⁴ Benu ba libaasaha usungama ŋa miisu ma Nzambi, ndulu mu kuhisili Mikele, benu laamiitahuha na Kristo. Benu lamiipala mu lisyeme la Nzambi.

⁵ Ka bisu, ba laasa hiitu hya bisu mu Nzambi, bisu lili mu ukeele mu mutima a bisu woosi. Nde sa asungaha bisu ŋa busu bwa nde, mu matwala ma Livupu.

⁶ Ka, mu Kristo Yisu hya tsoongo, ni imiinu hi hili mu umwese mavanga mu mukele litondo, ka a mu uba wu baakete, buve wu baavelekete ve.

⁷ Hu mbandili, ndyatili a benu aba yimbwe. Na akubasa benu baku, mu ubwevelesingala imbuli?

⁸ Ma bali mu uleele benu mu ubaha benu, a mali mu umata huli Nzambi wu li mu uteele benu ve.

⁹ Baatu ba baaleele: «Mwana a levini hoole, libaapfunasa lidaama loosi.»

¹⁰ Ka, mu bungodu bwa Pfumu, me ndi na hiitu mu toni a benu. Me ndi na imiinu ti benu a lu uba na matsimi ma maasobono na ma me ve. Ka, pasi nde wu li mu udungasa benu, nde sa ayaka tsingili a Nzambi.

¹¹ Ka mu ma mamiitala me, baana ba ngu, tso me ndi mu undoongese ketili, mu ki toni bali mu ubwetsuta me? Tso ni mu buuna, me undongese maana, musamu lipfu la Yisu ŋa muti, utwala ubwekubasa pasi muutu baku ve.

¹² Ba bali mu ubehe budyabidi ŋa hati la benu, a basuka ndulu mu ukete ve. Bo ni bayene nate mu ukese nyutu a ibahala hya bo!

Ukumbasana

¹³ Baana ba ngu, benu lili ba baateele mu uba bunyanga. Ka ndulu, benu a lisalila bunyanga mobuuna, mu ukuhasa mapeyu ma musunya ve. Ka nyahani mukele litondo atuma benu, mana benu li baasalasana.

¹⁴ Mu toni ati Mikele myosi mya kuukama mu dyambu limosi; ni linili: «Tondo muutu na we, we we mwakulu.»

¹⁵ Ka tso benu lili mu udyata we bibulu, mu ubaakahasana tso ubaabakasana, buuna benu lafwana ukele: Benu sa limana mu udubasana.

Udyata mu tumili Livupu

¹⁶ Ni mu buuna, me ndi mu undeele bu: Nyahani Livupu libaatuma idiingu hya benu. Tso lisidi buuna, benu alubwesingala tso hole, lituma li mapeyu ma musunya ve.

¹⁷ Mu toni ati musunya na mapeyu ma maakakana na ma Livupu; na Livupu kaka lili mapeyu ma maakakana na ma musunya. Bo baboole bali mu ulwana. Ni mu buuna, benu libaaveletwala usa libwe li benu litondi usa.

¹⁸ Ka tso Livupu lili mu ubita benu, benu a lili hutso a tumili Mikele ve.

¹⁹ Ka mavanga ma musunya mali ma maamonehele: ni bumbembo, mayamba, mbiili ya yayuhu,

²⁰ tsalili bifwita, bunganga, iboho, midiingu, nyengi mu bana, mitsotso, mafufu, kabwili, maakabu ma mabuli,

²¹ peyu ubaha, kolili malamu, mikuungi mi mubaka udya na unywa na mavanga makima ma pila moyiina. Me apfwana ubweyibusa benu we bu me mbedi amiitswamina uleele: ba bali mu usa mavanga momaana, a bu ukoto mu Ipfumu hya Nzambi ve.

²² Ka mimbutu mi Livupu ni litondo, kinya, hyenze, taasili a bana, mutima wu mubwe, kangimini,

²³ bulembo na uyaaba utuma linyutu. Mikele a mili mu ulwanisa mavanga ma pila moyiina ve.

²⁴ Ka boosi ba bali mu Yisu Kristo baamiiduba linyutu la bo li masumu, na mapeyu na manzala ma lo.

²⁵ Livupu laava bisu monyi. Buuna, livaani lo bunyanga mana lo lituma ndyatili a bisu.

²⁶ Bisu a liba banga a nyeme ve. Na lipala mu ipfu hi ubaasongosono. A liba kaka na linyungi benu na benu ve.