Ngalaatiya 4 - Musamu wu Mubwe

¹ Mono ma me tondi uleele: Bu mubyalili mukobe akini mwana a ngebe, lisobosono love ŋa hati la nde na muviha. Tso bu babaaleele ti byosi bya nde.

² Nde li hutsina lituma la keedi a nde, na la baatu ba bali mu ukeelese busina bwa nde, nate mu tangu yi taata a nde hakese.

³ Bisu kaka ni pila mosi, bu laaba bikenyi, bisu laabeedi baviha ba mavupu ma mali mu utuma toto.

⁴ Bu tangu yi baakese yaatoodi, Nzambi atsindihi Mwana a nde: Wu mukaasu habuti, wu aba hutsina Mikele mi Bayudaayo.

⁵ Mwana mo hayidi mu uyobolo ba baaba hutsina lituma li Mikele, na mu uva bisu bunyanga mu ukituha baana ba Nzambi.

⁶ Mu toni ati, benu ni baana ba nde, Nzambi atsindihi mutso mitima mya bisu, Livupu la Mwana a nde, Livupu li libaafulaha: «Abba! Taata!»

⁷ Ni mu buuna, we a hasaala muviha ve, ka we mwana. Mu toni ati we li mwana, we mubyalili mukobe, wu Nzambi haswehele baana ba nde.

Boomo bwa Pahuli mu toni a bisu Ngalatiya

⁸ Hutsomi, benu aba a laayaba Nzambi ve. Benu laabedi baviha ba banzambi ba bali binzanzambi.

⁹ Ka bunuubu, bu benu limiiyaaba Nzambi, buve, bu Nzambi amiyaaba benu, buni benu lu ubwefutahala hutso lituma li mavupu momaana? Mavupu ma mavele na matwala na tsongo, na ubwekituha baviha ba mo?

¹⁰ Benu lili mu uvolo tangu yindahi, mu ubaatsikaha bilumbu, batsungi, makesili ma matangu na bilima.

¹¹ Me ndi na boomo ti, isalu hi me anzatsala ŋa hati la benu, hiba hya mu pu.

¹² Baana ba ngu, me ndi mu unzayaana huli benu. Baani we me mu toni ati, me ndi we benu. Benu a laavangila me dyambu li libi tso limosi ve.

¹³ Yibwalani monyi ti, tangu yi me anzabisi benu Musamu wu Mubwe, yaabisa la tsomi, me amba mubeedu.

¹⁴ Na mu bubeedu bwa me, bu bwakakwamisa benu, benu a laanyasuli me, tso ubelele me ve. Ka benu laayaki me we pofi a Nzambi, we Yisu Kristo nde mwakulu.

¹⁵ Ki pila a kinya benu laaba na yo! Ka hima hya yiila benu? Me ndi mu utiila benu imbangi mohinihi: tso hwafwani uba buuna, kini benu laasonzili miisu ma benu, mu uva me mo.

¹⁶ Bunuubu, me ka muboho a benu bu me miinzabisa benu imbuli?

¹⁷ Baatu mobaana, ba bali mu usaha uyaabisa benu Musamu wu Mubwe mukima, lehemene la bo mu benu a lili li libwe ve. Bo bali mu usaha utahusa benu na me, mana benu likangama mu bo.

¹⁸ Hwafwana bubwe mu ubaamwese lehemene la benu pasi tangu, mu mavanga mamabwe. Ka ndulu a mu tangu yi me ndi ŋa hati la benu ve.

¹⁹ Baana ba me, we mukaasu nga misoongo, me ndi mu umbwemono misoongo mu benu, we me wu li mu ubwebuta benu. Misoongo momiina myukwilala nate bu Kristo huuba monyi mu benu.

²⁰ Me tondi uba itwadi na benu, na usobo bitoyili. Mu toni ati, matsimi ma me mali mu uhelene mu benu.

Lahi li buviha na lahi li bunyanga

²¹ Leelaani ati me, benu ba litondi uba hutsina lituma li Mikele, benu a lili mu uyuha ma Mikele mili mu uleele ve?

²² Mu toni ati, mu mabuuku ma Moose baasonehe ti Abrahami abahi baana boole ba babahala. Mumosi wu a na mukaasu wu muviha, wuna na mukaasu wu bunyanga.

²³ Ka wu nde habuti na mukaasu wu muviha, baabuti nde mu litondo li musunya. Wu nde habuti na mukaasu wu bunyanga, baabuti nde mu nzila ya lahi la Nzambi.

²⁴ Kuma moyiniyi, yili na mbindulili yi yasweme: bakaasu baboole bali mu umwese malahi moole. Lahi limosi mu mamoole, li baasiidi ŋa yulu isyelo hya Sinayi. Ni mu lo baabuti baana babali baviha, mu nzila ya Agali.

²⁵ Buuna Agali ni isyelo hya Sinayi hu tsi a Arabiya. Nde li mu ufwanina na Yeruselemi la loloyiniyi. Mu toni ati, nde li mu buviha na baana ba nde.

²⁶ Ka Yeruselemi ya hu yulu, yili bunyanga. Yo ni ngu a bisu.

²⁷ Mu toni ati, baasonehe: «Ba mu kinya! We mukasu inguma, we wu avele na baana, fulaha mu kinya! We wu aveleyaaba misoongo mya mbutili! Mu toni ati, litangu la baana ba mukaasu wu baatimba, lu ulutaala la baana ba mukaasu wu baakwele.»

²⁸ Ka benu, baana ba ngu, benu lili we Isaki: baana ba baabuta we bu huli lahi la Nzambi!

²⁹ Ka we mu tangu a tsomi, mwana wu baabuti mu makila akatsuta wu baabuti mu Livupu la Nzambi. Loloyi kaka, huli mu uvagama buuna.

³⁰ Ka ma basonehe ma Ngidi, mali mu uleele bunuubu: «Binga muviha mowunuwu na mwana a nde. Mu toni ati, a hwafwana ti mwana wu mukaasu muviha abuta, akaba mukobe a taata na mwana wu mukaasu bunyanga abuta ve.»

³¹ Ni mu buuna, baana ba ngu, bisu a benu a lili baana ba mukaasu wuli muviha ve. Ka bisu a benu baana ba mukaasu wuli bunyanga.