Ngalaatiya 3 - Musamu wu Mubwe

Mikele tso imiinu

¹ Benu bisu Ngalatiya, ba baavele buyedi! Na aloho benu? Baamwesi benu pa yalala, buni baakomini Yisu Kristo ŋa muti.

² Me tondi ti benu liva me ndulu mvutu mu hyuhu mohinihi: Benu laayaka Livupu la Nzambi, mu toni a bu benu laakuhasa Mikele mya Moose myosi? Vooti mu toni ati benu laasiidi imiinu mu Musamu wu Mubwe wu benu laayuhi?

³ Buni benu lu utwala uba na butsudu bwa pila yi? Bi benu laabandiha mu Livupu la Nzambi, benu litondi usukasa mu mifudi mya benu mwakulu?

⁴ Moosi ma benu laabingala, maka ma mu pu? Naana! Mo utwala uba ma mu pu ve!

⁵ Ni buuna, Nzambi wu ava benu Livupu la nde na wu li mu uvanga bipadi ŋa hati la benu, a hali mu ukuhasa maana mu toni ati benu lili mu udyata hutso Mikele mya nde ve. Ka mu toni, ati benu lili mu usa imiinu mu Musamu wu Mubwe.

⁶ Abrahami asiidi imiinu mu Nzambi, na Nzambi amoni nde muutu wu akuha, mu toni imiinu mohina.

⁷ Benu lafwana mu uyaaba lo: Babali na imiinu mu Nzambi, ni bo bali baana ba Abrahami.

⁸ Nzambi aleeli mu mambu ma nde, ti nde sa akitusa babavele Bayudaayo mu uba baatu ba baakuha mu imiinu ŋa busu bwa nde. Ni mu buuna, nde abweleele huli Abrahami dyambu lilibwe li: «Nzambi sa asyeme bibandu bya ŋa toto byosi, mu toni a we.»

⁹ Abrahami asiidi imiinu mu Nzambi na baasyemi nde. Ni mu buuna, boosi babali mu usa imiinu sa basyeme bo, we bu baasyemi Abrahami nga imiinu.

¹⁰ Ka babali mu usingama mu Mikele mya Moose, baamikoto mu tsingili, we bu baasonehe bunuubu: «Aba wu baasinga, woosi wu avelehwada mu usalila moosi ma baasonehe mutso muhanda Mikele.»

¹¹ Imbuli ni ti, a huli na muutu tso mumosi wu utwala uba wu akuha ŋa busu bwa Nzambi mu toni Mikele ve. Mu toni ati, hutso Muhanda Mikele baasonehe bunubu: «Woosi wu Nzambi hubaasa ti nde aba wu akuha mu imiinu hya nde, sa aba monyi.»

¹² Ka Mikele a myasingama mu imiinu ve. Na baabwesonehe bu: «Woosi wu li mu usalila mamali mu Mikele, sa aba monyi mu myo.»

¹³ Bu Kristo akituhi iloho hya tsingili ŋa mbuha a bisu, nde ayobili bisu mu tsingili Mikele. Ma baasonehe ma Ngidi mali mu uleele: « Aba wu baasinga, pasi nde wu akwa mu swe ŋa muti.»

¹⁴ Ni mu buuna, lisyeme li baasiidi Abrahami lahi, laatoodi kaka huli bangoyi, mu toni a Yisu Kristo, na mu nzila imiinu, bisu boosi lili mu uyaka Livupu li Nzambi asiidi lahi.

Mikele na lahi

¹⁵ Baana ba ngu, me polo benu ifwani mu mbiili a bisu ya pasi ilumbu, mana benu litsikaha ma me tondi uleele: ŋa muutu amiisonehe lahi la nde bu hwafwana, teehele nde mu ukwa, tso muutu mumosi utwala utuna lo, tso ubwese iloho imosi ŋa yulu ve.

¹⁶ Ni buuna ka, Nzambi hasiidi malahi ma nde huli Abrahami na huli mwana a nde. Ma baasonehe a mali mu uleele ve ti: «Huli baana ba nde». Ka we wu uleele ti, hi hyabaha babalahi. Ma basonehe ma Ngidi mali mu uleele ti: «Huli mwana nde.» Ni mu umwese ti ndulu muutu mumosi akangama mu lo, ni Kristo.

¹⁷ Me tondi uleele bunuubu: Nzambi abandihi usa lahi we bu hwafwana. Mikele mya Moose mi myayidi humbisa maakama mana maku matatu ma bilima, utwala ufwinzala kesili moyiina, tso umaasa lahi la Nzambi ve.

¹⁸ Ka tso mukobe wu Nzambi ubaava, li mu uyila mu nzila Mikele, buuna a husaali mu toni a lahi ve. Ka Nzambi aviidi Abrahami lisyeme mu nzila a lahi.

¹⁹ Tsalu Mikele aba ki yo? Baabwesi Mikele ndulu mu umwese huli baatu, mavanga ma bo mamabi. Sa huba buuna, nate bu imbisa hya Abrahami hi baasiili lahi, hyuya. Mikele mominimi bapofi baasanguli myo, humbisa a nzonzi mumosi, Moose.

²⁰ Nzonzi ubaateleme ŋa boole bamiikakana. Ka mu toni a lahi, Nzambi ndulu siha ali.

²¹ Utwala mu uleele ti Mikele mili mu ulwanisa malahi ma Nzambi? Naana! Utwala uvangama ve! Tso baaviidi matwala huli mukele mu uva monyi huli baatu, buuna mukele akiikitusa baatu baba ba baakuha.

²² Ka ma baasonehe ma Ngidi, mali mu uleele ti toto yoosi yili hutso lituma li masumu. Toto yili yi yasumaha, mana banga a imiinu mu Yisu Kristo bayaka bungodu bu Nzambi hasiidi bo lahi.

Imiinu na mukobe wu baasiidi lahi

²³ Tswamina imiinu mu uya, bisu laabedi hutsina Mikele, baakatihala, mu ubaakeele tangu yi Nzambi hubangula bisu imiinu.

²⁴ Ni mu buuna, Mikele myaba we keedi wu ubita bisu huli Kristo. Mana bisu liba ba baakuha ŋa busu bwa Nzambi, mu nzila imiinu.

²⁵ Ka bu imiinu hyamiiya, bisu a laasaala hutsina lituma la keedi mowuuna ve.

²⁶ Mu tangu moyiniyi, benu boosi laaka baana ba Nzambi mu imiinu mu Yisu Kristo.

²⁷ Mu toni ati, benu boosi ba baatondehe mu Kristo, benu laamiilwata Kristo.

²⁸ A husaali na lisobosono ŋa hati li Muyudaayo na Mungeleke ve, ŋa hati li muviha na wu li bunyanga, ŋa hati li mukaasu na bahala. Benu boosi laaka mumosi mu Yisu Kristo.

²⁹ Umono ti benu lili ba Kristo, benu lili imbisa hya Abrahami. Na benu sa liba babyalili ba mukobe wu Nzambi hasiidi lahi huli Abrahami.