Ngalaatiya 1 - Musamu wu Mubwe

Mabwehe

¹ Me Pahuli, wu li ilumbi hya Nzambi, me a handi ilumbi hya Nzambi mu tsolili a baatu, tso mu litondo la muutu ve. Ka me ndi ilumbi mu teelili a Yisu Kristo na Nzambi Taata, wu asuula nde ŋa hati la ba bakwa.

² Me na baana ba ngu boosi ba bali na me huni, lili itwadi mu utsindaha muhanda mowunuwu, huli mabundu ma itanzi hya Ngalatiya.

³ Nyaha Nzambi Taata a bisu na Pfumu a bisu Yisu Kristo, basyeme benu na bava benu hyenze.

⁴ Kristo wu asiinga, we bu hwaba litondo la Nzambi, mu uyeholo muvumu a nde we bungodu, mu uyobolo bisu mu masumu ma bisu, mu upatula bisu mu matwala ma mabi ma tsi moyiniyi.

⁵ Nyaha muyusu akwilala huli Nzambi Taata a bisu, mu bilima na bilima! Ameni!

Velo-velo a bisu Ngalatiya

⁶ Me ndi mu ukimuha bu benu laaveletamba mu umiinguha Nzambi. Nde wu ateele benu mu hyese hya Kristo. Benu laaka mu ukiinguha mu uyuha Musamu wu Mubwe mukima.

⁷ Ka, a huli na Musamu wu Mubwe mukima ve. Bunuubu, huli na baatu ba bali mu usa muyungisi ŋa hati la benu, na ba batondi usobo Musamu wu Mubwe wa Kristo.

⁸ Ka tso bisu mwakulu, buve pofi a hu yulu, yayabisa benu Musamu wu Mubwe wu asoboono na wu bisu laayabisi benu, nyaha Nzambi asinga nde!

⁹ Bisu laatswamini uleele benu lo, na me mbwendeele lo loloyi: tso muutu yayabisa benu Musamu wu Mubwe wu asoboono na wu benu laayaka, nyaha Nzambi asinga nde.

¹⁰ Na bunuubu, benu litsimi ti me ndi mu utsaha ti baatu basilasa me? Naana! Nzambi ni wu afwana usilasa me. Benu lili mu utsima ti me na nzala umonehele wu mubwe ŋa hati la baatu? Naana! Tso me ndi mu utsaha ti baatu bakubala me tsambi, me a hakiimba musalili a Kristo ve.

Buni Pahuli hakituhi ilumbi hya Nzambi

¹¹ Me ndeele benu lo baana ba ngu, Musamu wu Mubwe wu me umbaanzabisa benu, a hali wu matsimi ma muutu ve.

¹² Mu toni ati, a muutu alongese na uyakisa me nde ve. Ka Yisu Kristo nde mwakulu ni wu abaanguli me nde.

¹³ Benu laayuhi buni mbiili a me yaaba tangu a tsomi bu me akatsalila bukulu bu Bayudaayo. Me akatsuta libundu la Nzambi mu iteesi hi hyafulala na ubaatsala lo.

¹⁴ Me akapfula ubwaha ŋa hati li Bayudaayo ba tungi la me, mu ukuhasa bukulu bu Bayudaayo. Me amba apfulala bo lehemene ŋa busu bu bukulu bu bakaaha ba bisu.

¹⁵ Ka Nzambi asooli me tswamina mbutili a me. Na mu hyese hya nde, nde ateeli me mu uba musalili a nde.

¹⁶ Tangu yi nde havoli kesili mu ubangula me Mwana a nde, mana me nzabisa Musamu wu Mubwe huli ba baavele Bayudaayo, me a hapondi buyedi huli pasi muutu ve.

¹⁷ Me a hakumisi hu musyenge a Yeruselemi mu uyabwana na ba baatswamini me, mu uba bilumbi bya Nzambi ve. Ka me anzyeni hu tsi a Arabiya, titswene me anzapfutaha hu musyenge a Damaseko.

¹⁸ Humbisa bilima bitatu, me akumisi hu Yeruselemi, mu uyabana na Peetelo. Me apyosi bilumbu kuumi na bitaanu huli nde.

¹⁹ Ka me a hamoni bilumbi bya Nzambi bikima ve, ŋa yulu a Yaki, mwana a ngu a Pfumu.

²⁰ Nzambi li mbangi a me! Bu me ndi mu utsonehele benu mambu momanima, me a handi mu upfuta ve.

²¹ Titswene, me anzyeni hu bitanzi bya Siriya na Silisiya.

²² Mabundu ma Bakristo ba itanzi hya Yuda, aba kini abaayabi me ve.

²³ Mo maayuhi ndulu ti: «Wu akakwamisa bisu hu tsomi, aka mu ulongese loloyi Musamu wu Mubwe wu imiinu, wu nde hakasaha utsala».

²⁴ Na mabundu maakayusa Nzambi mu toni a me.