Mavanga 9 - Musamu wu Mubwe

Sahuli miikingula buyedi

¹ Mu tangu moyina, Sahuli a hakoli ukanina na usaha nzila yi uduba bayihi ba Pfumu ve. Nde ayamono mukuutu banganga ba Nzambi,

² avondi nde mihanda mi uva nde muswa a kotili mu manzo ma masambulu ma Bayudaayo ma hu musyenge a Damaseko. Nde hasiidi buuna, mana bu nde hu ubiisa baatu, babahala tso bakaasu, ba baakaduukala nzila a Pfumu, nde akanga bo na ubita bo hu musyenge a Yeruselemi.

³ Sahuli akayene hu Damaseko, nde aba bebele na musyenge mowuna. Mu mawasa, liyalala laamati hu yulu na laayadiinga nde.

⁴ Nde abwidi ŋa toto na ayuhi ndaha mosi yakaleele nde: «Sahuli, Sahuli, mu hima we li mu ukwamisa me?»

⁵ Sahuli afuuli: «We ni na Pfumu?» Na ndaha yayahuli: «Me ni Yisu, wu we li mu ukwamisa.

⁶ Ka teleme, koto mutso musyenge mowuna, na huuna sa baleele we ma we afwana uvanga.»

⁷ Bambaahi ba mudyenge ba Sahuli baatsikimi, hwavele a ndaha mu tsisu. Bo baakayuha ndaha, ka bo a baakamono muutu ve.

⁸ Buuna Sahuli atelimi, ka nde adibula miisu, a hakabwemono ve. Baakangi nde mu hoho na baayeni na nde hu musyenge a Damaseko.

⁹ Mu bilumbu bitatu, nde aba inzimana, hwavele udya na unywa.

¹⁰ Kaahu hu musyenge a Damaseko, hwaba na muyihi mumosi nduhi a nde Ananya. Pfumu ayamonehele na nde mu imono-miisu na aleeli nde: «Ananya!» Nde ayahuli: «Me ndyowu, Pfumu.»

¹¹ Pfumu aleeli nde: «Yene masulubete mu nzila yi bali mu uteele “nzila yi yasungama”, mu nzo a Yuda. We fuula muutu wu bubaateele Sahuli, musi Tarese. Nde mu usambila ali mu tangu yi.

¹² Mu imono-miisu, nde ni umono bahala limosi nduhi a nde Ananya, mu ukoto mu nzo a nde na mu usuusala nde myoho, mana miisu ma nde madibuma.»

¹³ Ananya afutili: «Pfumu, baatu ba balahi baabehele me tsangu a muutu mowunuwu na uyabisa mamabi ma nde ali mu uvangila ba we bangidi babali hu musyenge a Yeruselemi.

¹⁴ Na nde miiya huni na lituma li bakuutu ba banganga ba Nzambi baaviidi nde, mu ukanga boosi ba bubaasambila we.»

¹⁵ Ka Pfumu afutili huli Ananya: «Yene, ka me miitsoolo nde mana me tsalila nde. Ni nde uyayabisa nduhi a me huli boosi ba baavele Bayudaayo na bapfumu ba bo, napa huli bisu Isereli.

¹⁶ Me tsa mwese nde me mwakulu, mapasi moosi ma nde humono mu nduhi a me.»

¹⁷ Humbisa, Ananya ayeni, na akoti mu nzo. Nde asuusili Sahuli myoho, na aleeli nde: «Sahuli, mwana a ngu a me, Pfumu Yisu wu ayamonehele na we mu nzila yi we akayiila mu yo, miitsindaha me huli we. We sa bwemono na we sa luula mu Livupu la Ngidi.»

¹⁸ Mu mawasa, mu miisu ma Sahuli, bisiha bi byafwanina na mahahala byabwidi, na miisu ma nde maadibumi. Buuna nde atelimi, na ayaki tondihili.

¹⁹ Titswene nde adidi na abahi mifudi. Sahuli avyosi mwa bilumbu na bayihi ba baaba hu Damaseko.

Sahuli alongisi Tsangu Yimbwe hu musyenge a Damaseko

²⁰ Ni mu tangu moyina, Sahuli habaandihi ulongese Tsangu Yimbwe mu manzo ma masambulu ma Bayudaayo. Na nde akayabisa ti Yisu ni Mwana a Nzambi.

²¹ Boosi ba baakayuha nde baakimuhi na baakafulasana: «Be wunuuwu, a ni muutu wu akakwamisa mu mifudi baatu ba baakayusa Nzambi mu nduhi a Yisu hu musyenge a Yeruselemi ve? Na nde a hayidi huni mu usa ukana, mu uyakaanga bo na ubita bo huli bakuutu ba banganga ba Nzambi ve?»

²² Ka matwala ma Sahuli makavyohelele mifudi mu bilongisili bya nde, ti Yisu ni Masiya. Ni mu buuna, Bayudaayo ba hu Damaseko a baabweba na dyambu li uleele ve.

²³ Bilumbu bibilahi bivyoho, Bayudaayo baakuti pfuundu mu uduba Sahuli.

²⁴ Ka baatu baayibusi Sahuli mu pfuundu Bayudaayo yi baakakutala nde. Butsuhu na nyangu, bo baakakelese bikotili bya mumbu wu akadinga musyenge, mu uduba nde.

²⁵ Ka ŋa butsuhu, bayihi ba Sahuli baabiti nde mana bavyoso nde hu yulu a mumbu a musyenge. Bo baasutisi nde mutso a poonzi.

Baranabasi miimwese Sahuli huli bilumbi, hu Yeruselemi

²⁶ Bu nde hayato hu musyenge a Yeruselemi, Sahuli ayehili upfuutana na bayihi. Ka boosi baaba na boomo bwa nde, mu toni a bu baaveli na hiitu ti mbuli nde kaka muyihi a Yisu.

²⁷ Baranabasi avoli nde, abiti nde huli bilumbi. Nde ayabisi bo buni Sahuli hamoni Pfumu mu nzila, na buni Pfumu hatoyi na nde. Nde abweyabisa bo ka buni Sahuli halongisi mu nduhi a Yisu na hiitu hyosi hu musyenge a Damaseko.

²⁸ Umata tangu moyina, Sahuli aba itwadi na bilumbi. Nde akayene na uya mu tso musyenge a Yeruselemi na ubaayambila na hiitu hyosi mu nduhi a Pfumu.

²⁹ Nde akabaamoho ka na Bayudaayo ba baakayambila ndaha yi Bangeleke, na usanzasana matsimi na bo. Ka bo baniiba, baakasaha uduba nde.

³⁰ Ŋa banga hiitu baayabi dyambu molina, bo baabiti Sahuli hu musyenge a Sezare. Umata huuna, bo baatsindihi nde hu musyenge a Tarese.

³¹ Libundu laaba mu hyenze mu bitanzi byosi bya Yuda, bya Ngalili, na bya Samariya. Livupu la Ngidi laakakulasa libundu mu hiitu, na mu likinzu la Pfumu. Litangu la banga hiitu laabwefulala bulahi mu likumbasa li Livupu la Ngidi.

Peetelo miibeeloso Ene wu ararama mikangi

³² Peetelo wu akataangila tsi yoosi, ayeni ilumbu imosi huli banga hiitu, ba baakatsahala hu musyenge a Lida.

³³ Huuna, nde amoni bahala limosi, nga nduhi a Ene, wu aba ararama mikangi. Nde aba baalaasa ŋa taangi umata bilima poombo.

³⁴ Peetelo ni uleele nde: «Ene, Yisu Kristo miibeeloso we! Teleme na vanga taangi a we, we mwakulu.» Mu mawasa, Ene atelimi.

³⁵ Bisu Lida boosi na baatu ba hu kumu a Saroni, bu baamoni nde, baasobi mbiili na baasiidi hiitu hya bo mu Pfumu.

Hu musyenge a Yafa, Peetelo asuuli Dolokasi mu lipfu

³⁶ Hwaba hu musyenge a Yafa, mukaasu nga hiitu mu Yisu, nga nduhi a Tabita, mbindulili a yo mu ndaha yi Bangeleke «Dolokasi» buve «tsyesi». Nde aba tangu yoosi ubaavanga mamabwe na ubaava likumbasa huli biyaha.

³⁷ Mu tangu moyina, nde akoto mu mbeelili, nde ni ukwa. Bu baamani uswaha mvumbi a nde, baasuusi yo mu itini hya nzo hya hu yulu.

³⁸ Bayihi ba hu musyenge a Yafa baayabi ti Peetelo aba hu musyenge a Lida. Musyenge mowuna aba bebele na Yafa. Bo baatsindihi nde babahala boole mu uyayabisa nde ti: «Kolo-kolo a we, a hadiinga mu uya huli bisu».

³⁹ Peetelo atelimi, ayeni na bo. Bu nde hayato, baabiti nde hu itini hya nzo hya hu yulu. Bakwili boosi baayasusaha bebele na nde mu ulila. Bo baamwesi nde bikutu na biyunga bi Tabita hatungi ŋa nde haba kini monyi.

⁴⁰ Peetelo atumi upalisa baatu boosi hu mbadi. Titswene nde atsokimi na asambili Nzambi. Nde akinguhi hu tsyelo a mvumbi, na aleeli: «Tabita, teleme!» Tabita adibuli miisu, na bu hamoni Peetelo, nde atsahili.

⁴¹ Peetelo akangi hoho hwa nde na atelimisi nde. Nde ateeli banga hiitu na bakwili, na nde amwesi bo Tabita wu aba monyi.

⁴² Tsangu yatsaamuhi mu musyenge woosi wa Yafa, na babalahi baasobi mbiili a bo na baasidi hiitu mu Pfumu.

⁴³ Peetelo atsahili matangu mamalahi hu musyenge a Yafa, hu uli mutsonzihi a bibaanda bi banyama, nga nduhi a Simoni.